वीरगंज । संघीय खानेपानी मन्त्री प्रदीप यादवले आफूलाई फोनमार्फत धम्की दिएको प्रकरणबारे आफ्नो धारणा सार्वजनिक गरेका छन्। उनले यसबारे फेसबुकमार्फत लामो अभिव्यक्ति दिँदै घटनाको सम्पूर्ण पृष्ठभूमि जनतासामु राखेका हुन्।

मन्त्री यादवले वीरगञ्ज आफ्नो जन्मथलो मात्र नभई राजनीतिक संघर्ष र स्वीकृतिको भूमि भएको उल्लेख गर्दै पछिल्लो समय देखिएका खानेपानी संकट र हैजा–झाडापखालाको महामारी नियन्त्रणमा आफू युद्धस्तरमा लागिपरेको बताए।

धम्की दिने महिलाप्रति व्यक्तिगत पूर्वाग्रह नरहेको स्पष्ट पार्दै उनले भने, “जनताले सरकारसँग प्रश्न गर्न पाउनुपर्छ भन्ने मेरो राजनीतिक संघर्षको ध्येय हो, तर धम्की र अफवाह फैलाउनु स्वीकार्य छैन।”

यादवले आफू प्रायः सबै फोन उठाउने गरेको, अज्ञात नम्बरको कलसमेत उठाउने बानी रहेको तर उक्त महिलाले गुनासो पोख्ने क्रममा ज्यान मार्ने धम्की दिएपछि पर्सा प्रहरीलाई जानकारी गराएको बताए।

उनले फोनकर्तालाई लोकतान्त्रिक अधिकार प्रयोग गर्न प्रोत्साहित गर्ने प्रतिबद्धता जनाउँदै प्रहरीसँग नरम व्यवहार गर्न आग्रह गरेकोसमेत जनाए। उनले थपे, “आशा छ आजको दिन फोनकर्ता महिलाको लागि फलदायी होला।”

यादवले समस्या प्रश्न गर्नुमा नभई हिंसात्मक भाषा प्रयोग हुँदा यस्तो स्थिति उत्पन्न भएको भन्दै कानुनभन्दा माथि कोही हुन नसक्ने र नहुने स्पष्ट पारे।

वीरगंज । पूर्व पत्रकार तथा जनमत पार्टीका केन्द्रीय सचिव विपि साहले २०७२ सालको तेस्रो मधेश आन्दोलनको स्मरण गर्दै हालका खानेपानी मन्त्री प्रदिप यादवको निडर छविलाई प्रश्न उठाएका छन् ।

आन्दोलनकै क्रममा नेपाल सरकार सुरक्षा परिषद्को निर्णयअनुसार आफ्नो अनलाइन समाचार पोर्टल नेपालभर बन्द गरिँदा प्रहरीले पक्राउ पुर्जी जारी गरेपछि भाग्दै वीरगंज पुगेको अनुभव साहले सुनाएका छन् । त्यही बेला प्रदिप यादव केही साथीहरूसहित मोटरसाइकलमा आएर “बीपी जी चलिए, आपको बीरगंजका लाइभ आन्दोलन दिखाते हैं” भन्दै सडकमै लगेका थिए ।

आन्दोलनमा मालबाहक ट्रक रोक्न बसेका आन्दोलनकारीको साथमा यादव निडर रूपमा उपस्थित थिए । राति २ बजेसम्म एक दर्जन ट्रकमा आगो लगाइएका घटनाको भिडियो र फोटो पत्रकारहरूले खिचेका थिए । त्यही बेला साहले यादवलाई “डर लाग्दैन ?” भनेर सोध्दा उनले उत्तर दिएका थिए – “ज्यादा से ज्यादा पक्रेगा, ज्यादा से ज्यादा गोली मार देगा।”

तर, आन्दोलनको चरम घडीमा समेत प्रहरी, प्रशासन र गोलीबाट नडराउने प्रदिप यादव आज एक युवतीको फोन कलबाट डराएको कुरा बाहिरिएपछि आश्चर्य व्यक्त गरिएको छ।

सचिव साहले भनेका छन्, “नेपाली सेनाको जवानले दिनरात सलाम गर्ने, प्रिस्टनको सुरक्षामा बस्ने मन्त्री भएर पनि सर्वसाधारण युवतीको फोन कलबाट डराउनु विरोधाभासी छ।”

उनले स्मरण गरेका छन् कि आन्दोलनकै बेला हिमालखबर पत्रिकाले यादवबारे नकारात्मक समाचार छाप्दा पनि उनी आफैं पत्रिका कार्यालय पुगेर धन्यवाद दिएका थिए। “आन्दोलनकै बेला बदनामीको डर नमानेका प्रदिप यादव आज युवतीको कलबाट किन डराउनुपर्‍यो ?” भन्दै साहले प्रश्न उठाएका छन्।

साहले जोड दिएका छन् कि आवेश र आक्रोशमा गरिएको फोन कलकै आधारमा युवतीलाई प्रहरी हिरासतमा पठाउनु उपयुक्त देखिँदैन।