वीरगंज । रक इन्टरनेशनल प्रा.लि. ले वीरगञ्जस्थित स्काईलाइन इन्फ्रा लिमिटेड समेतका विरुद्ध पर्सा जिल्ला अदालत र उच्च अदालत पाटनमा दर्ता गराएका दुवै मुद्दा आफ्नै दाबी प्रमाणित गर्न नसक्ने जनाउँदै फिर्ता लिएको छ।
स्काईलाइन इन्फ्रा लिमिटेड र महाजोङ होल्डिङ्स प्रा.लि. बीच भएको सम्झौता अनुसार वीरगञ्जको स्काईलाइन मलभित्र रहेको होटल सरोवर मा क्यासिनो सञ्चालनमा आएको थियो। सो क्यासिनो सञ्चालनमा रोक लगाउनुपर्ने माग गर्दै रक इन्टरनेशनलले अदालतमा मुद्दा दायर गरेको थियो। क्यासिनो आफूले सञ्चालन गर्न पाउनुपर्ने रक इन्टरनेशनलको दाबी रहेको थियो।
तर अदालतमा पेश गरिएका प्रमाणहरूबाट आफ्नो दाबी सावित गर्न नसक्ने भएपछि रक इन्टरनेशनल स्वयंले दुवै अदालतमा दर्ता गराएको मुद्दा फिर्ता लिएको स्काईलाइन इन्फ्रा लिमिटेडले जनाएको छ।
यसैबीच, केही स्थानीय अनलाइन सञ्चारमाध्यमहरूले यथार्थ नबुझी स्काईलाइन इन्फ्रा लिमिटेडसँग कुनै सम्बन्ध वा जिम्मेवारी नरहेका प्रतिष्ठित व्यवसायी राजेश अग्रवाल को नाम जोडेर “राजेश अग्रवाल अदालत तानिए” तथा “स्काईलाइन लिमिटेडमा क्यासिनो सञ्चालनमा रोक” जस्ता झुठा र भ्रामक शीर्षक प्रयोग गरी समाचार प्रकाशन गरेकोप्रति स्काईलाइन इन्फ्रा लिमिटेडले खेद प्रकट गरेको छ।
सरोकारवाला व्यक्ति वा संस्थासँग सम्पर्क नगरी तथ्य नबुझी प्रकाशित गरिने यस्ता समाचार पत्रकारिता आचारसंहिता तथा प्रचलित ऐन–कानून विपरीत हुने कम्पनीको भनाइ छ। आगामी दिनमा समेत यस्तै खालका भ्रामक तथा चरित्रहत्या गर्ने समाचार प्रकाशित वा प्रसारित भए कानूनी कारबाहीमा जान सकिने चेतावनी स्काईलाइन इन्फ्रा लिमिटेडका प्रशासन प्रमुखले दिएका छन्।
स्काईलाइन इन्फ्रा लिमिटेडले मधेस प्रदेशको वीरगञ्जमा सुविधासम्पन्न स्काईलाइन मल निर्माण गरी सञ्चालनमा ल्याइसकेको छ। मधेस प्रदेशकै उत्कृष्ट परियोजनामध्ये एक मानिने यस मलअन्तर्गत चारतारे होटल सरोवर पोर्टिको, क्युएफएक्स सिनेमा, केएफसी, विभिन्न ब्रान्डका विद्युतीय उपकरण बिक्री कक्ष, एप्पल मोबाइल शोरुमलगायतका सेवा उपलब्ध छन्।
त्यसैगरी मलभित्र फिटनेस सेन्टर, स्पा, ब्युटी प्रोडक्ट्स शोरुम तथा ब्याङ्क्वेट हलको सेवा पनि सञ्चालनमा रहेको कम्पनीले जनाएको छ।
