वीरगंज । डी.ए.भी. आर.बी. केडिया स्कूलद्वारा सञ्चालित “श्री शंकरलाल केडिया स्मृति अन्तर–विद्यालय फुटबल प्रतियोगिता २०८२” अन्तर्गत आइतबार प्रतियोगिताको पहिलो दिन दुई खेल सम्पन्न भएका छन्।
आइतबार सम्पन्न पहिलो खेलमा साउथ जोन सेकेन्डरी स्कूलले गौतम सेकेन्डरी स्कूललाई ३–१ गोल अन्तरले पराजित गरेको छ। प्रतिस्पर्धात्मक खेलमा साउथ जोन सेकेन्डरी स्कूलका ज्ञानराज चौधरी उत्कृष्ट प्रदर्शन गर्दै ‘म्यान अफ द म्याच’ घोषित भए।
त्यसैगरी दोस्रो खेलमा मेरीगोल्ड सेकेन्डरी स्कूलले बिकन सेकेन्डरी स्कूललाई २–० गोल अन्तरले पराजित गर्दै विजयी सुरुवात गरेको छ। उक्त खेलमा मेरीगोल्ड सेकेन्डरी स्कूलका निखिल चौधरी उत्कृष्ट खेल प्रदर्शनका कारण ‘म्यान अफ द म्याच’ बन्न सफल भए।
प्रतियोगिताबारे जानकारी दिँदै डी.ए.भी. आर.बी. केडिया स्कूलका प्रिन्सिपल राकेश मिश्राले विद्यालयस्तरमा खेलकुदको विकास, अनुशासन तथा आपसी सद्भाव अभिवृद्धि गर्ने उद्देश्यले प्रतियोगिता आयोजना गरिएको बताए। उनका अनुसार आगामी दिनहरूमा अझै रोचक र प्रतिस्पर्धात्मक खेलहरू हुनेछन्।
उक्त प्रतियोगितामा वीरगंजका विभिन्न १४ वटा विद्यालयहरूको सहभागिता रहेको आयोजकले जनाएको छ।
