सेढवा । थारु सम्बत २६५० को नयाँ वर्ष तथा थारु समुदायको महान पर्व माघीको अवसरमा जिराभवानी गाउँपालिका वडा नं. ३ नौकाटोला चौकमा माघी महोत्सव भव्य रूपमा सम्पन्न भएको छ।
जिराभवानी गाउँपालिकाको आयोजना तथा वडा नं. ३ का युवा समाजको व्यवस्थापनमा आयोजित उक्त महोत्सव वडा नं. ३ का वडाध्यक्ष सुरज राय थारुको सभापतित्व तथा मधेश प्रदेश सरकारका वन तथा वातावरण मन्त्री शंकर प्रसाद चौधरीको प्रमुख आतिथ्यमा सम्पन्न भएको हो।
महोत्सवका क्रममा थारु समुदायको दैनिकीमा प्रयोग हुने कुटो, कोदालो, माछा मार्न प्रयोग गरिने खोखी, डेली लगायत विभिन्न सामग्री तथा पम्प प्लेट बोकी बाजा–गाजासहित मन्त्री चौधरी, गाउँपालिकाका जनप्रतिनिधि र स्थानीयवासीहरूले गाउँ परिक्रमा गर्दै कार्यक्रम स्थल पुगेका थिए।
कार्यक्रममा वक्ताहरूले माघी पर्वको शुभकामना व्यक्त गर्दै थारु समुदायको कला, संस्कृति, पहिरन, भाषा र खानाका परिकारको संरक्षण तथा प्रवर्द्धनमा जोड दिएका थिए। साथै थारु समुदायभित्र लागू औषध दुर्व्यसन तथा भोज–भत्तेरमा हुने अनावश्यक खर्च न्यूनिकरण गर्न आग्रह गरिएको थियो।
महोत्सवमा राष्ट्रिय थारु कलाकार मुस्कान चौधरी, निशा चौधरी र नेपाली निरहुवाले आकर्षक सांस्कृतिक प्रस्तुति दिएका थिए। त्यसैगरी पालिकाभित्रका छात्रछात्राहरूले विभिन्न नृत्य प्रस्तुत गर्नुका साथै उत्कृष्ट विद्यार्थीहरूलाई मेडल तथा प्रमाणपत्र प्रदान गरिएको थियो।
कार्यक्रममा गाउँपालिका अध्यक्ष अनोज चौधरी, उपाध्यक्ष रेखा चौधरी, जनता समाजवादी पार्टीका नेता डा. कृपासिन्धु चौधरी, प्रमुख प्रशासकीय अधिकृत अमित कुमार गिरि, वडाध्यक्ष रामशरण ख्वास, महादेव महतो थारु, दारा सिंह राउत थारु लगायतले शुभकामना मन्तव्य व्यक्त गरेका थिए।
