सेढवा । संघीय कृषि तथा पशुपन्छी विकास मन्त्री डा. मदन प्रसाद परियारले कृषि तथा पशुपन्छी सेवा केन्द्रबाट किसानले धेरैभन्दा धेरै फाइदा लिनुपर्नेमा जोड दिएका छन् । पर्साको जिराभवानी र पटेर्वासुगौली गाउँपालिकामा निर्माण गरिएका कृषि तथा पशुपन्छी सेवा केन्द्रका नव–निर्मित आधुनिक भवन पालिकालाई हस्तान्तरण तथा उद्घाटन गर्दै मन्त्री परियारले यस्तो बताएका हुन्।
उनले कतिपय स्थानमा करोडौंको लगानीमा बनेका सरकारी संरचना प्रयोगविहीन भई खण्डर बन्दै गएको उल्लेख गर्दै, अब यी भवन पालिकाको स्वामित्वमा आइसकेपछि प्रभावकारी रूपमा सञ्चालन गरी आम नागरिकलाई सरल र सुलभ सेवा दिन जनप्रतिनिधिलाई आग्रह गरे।
मन्त्री परियारका अनुसार यी सेवा केन्द्रमार्फत किसानले माटो परीक्षण, बीऊ परीक्षण, बालीमा लाग्ने विभिन्न रोगको सूक्ष्म परीक्षण तथा उपचार सेवा लिन सक्नेछन् । साथै पशुपन्छीको रक्त परीक्षणमार्फत रोग पहिचान गरी समयमै उपचार गर्दा व्यवसायिक तथा परम्परागत पशुपालनमा हुने ठूलो क्षतिबाट किसान जोगिन सक्ने उनले बताए । यसका लागि भवनको नियमित मर्मत, आधुनिक उपकरणको संरक्षण, आवश्यक केमिकल तथा दक्ष जनशक्तिको व्यवस्था गर्नुपर्नेमा उनले जोड दिए।
कार्यक्रममा संघीय सरकार कृषि तथा पशुपन्छी विकास मन्त्रालय अन्तर्गत ग्रामीण उद्यम तथा आर्थिक विकास आयोजनाका निर्देशक डा. चन्द्र प्रसाद रिसालले विश्व बैंकको ऋण सहयोगमा यो आयोजना देशका ६ प्रदेशका ३५ जिल्लामा सञ्चालन भइरहेको जानकारी दिए। उनका अनुसार १७१ पालिकामध्ये ७४ पालिकामा आयोजना लागू भएको छ भने मधेश प्रदेशमा मात्र ८४ पालिकामा काम भइरहेको छ । हालसम्म २५ पालिकामा भवन हस्तान्तरण सम्पन्न भइसकेको उनले बताए।
ग्रामीण उद्यम तथा आर्थिक विकास आयोजना तथा आर्थिक करिडोर कार्यालय बर्दिबास, महोत्तरीको आयोजनामा जिराभवानी गाउँपालिका वडा नं. ३ मा नव–निर्मित कृषि तथा पशुपन्छी सेवा केन्द्र भवनको हस्तान्तरण तथा उद्घाटन गरिएको थियो । जिराभवानी गाउँपालिका अध्यक्ष अनोज चौधरीको सभापतित्वमा भएको कार्यक्रममा उपाध्यक्ष रेखा चौधरी, प्रमुख प्रशासकीय अधिकृत अमित कुमार गिरी, आर्थिक करिडोर बर्दिबासका प्रमुख राजेश यादव, कृषि अनुसन्धान निर्देशनालय परवानीपुरका प्रमुख बिशेश्वर प्रसाद यादव, जनप्रतिनिधि तथा किसानहरूको सहभागिता रहेको थियो।
त्यस्तै, पटेर्वासुगौली गाउँपालिकाको आयोजनामा सम्पन्न कार्यक्रममा गाउँपालिका अध्यक्ष दिनेश कुमार चौधरीले सभापतित्व गरेका थिए । दुई तल्ले आधुनिक भवनमा कृषि तथा पशुपन्छी सम्बन्धी परीक्षणका अत्याधुनिक उपकरण, फर्निचर, अपाङ्गमैत्री तथा महिलामैत्री संरचना रहेको प्रमुख प्रशासकीय अधिकृत प्राण मेहताले वताए । साथै पशुपन्छी रोगका कारण मृत्यु भएमा सम्भावित जीवाणु वातावरणमा फैलिन नदिन आधुनिक प्रविधिबाट नष्ट गर्ने प्रणाली समेत जडान गरिएको जनाइएको छ ।
