वीरगंज । आगामी फागुन २१ गते हुने प्रतिनिधि सभा निर्वाचनका लागि पर्सा जिल्लाका चारै निर्वाचन क्षेत्रमा निर्वाचन अधिकृतको कार्यालय स्थापना गरिएको छ । वीरगञ्जको राधेमाईस्थित जिल्ला समन्वय समिति कार्यालयमा मुख्य निर्वाचन अधिकृतको कार्यालय सञ्चालनमा ल्याइएको हो ।
जिल्ला निर्वाचन कार्यालय पर्साकी जिल्ला निर्वाचन अधिकारी अनामिका रौनियारका अनुसार निर्वाचन कार्यक्रमलाई व्यवस्थित, पारदर्शी र समयमै सञ्चालन गर्न कार्यालय स्थापना गरिएको हो । उनले तोकिएका सबै निर्वाचन क्षेत्रमा निर्वाचन अधिकृतको कार्यालय स्थापना गरी निर्वाचन प्रक्रिया सुरक्षित र सहज रूपमा अघि बढाइने बताइन् ।
मुख्य निर्वाचन अधिकृत तथा पर्सा जिल्ला अदालतका न्यायाधीश गायत्रीप्रसाद रेग्मीले निर्वाचन आयोगको निर्देशनअनुसार निर्वाचन कार्यक्रम अघि बढाइएको जानकारी दिए । उनले प्रशासन, सुरक्षा निकाय र सरोकारवालासँग समन्वय गर्दै निष्पक्ष, भयरहित र कानुनसम्मत निर्वाचन सम्पन्न गरिने प्रतिबद्धता जनाए ।
पर्सा जिल्लामा निर्वाचन क्षेत्र नं. २ को निर्वाचन अधिकृतको कार्यालय जिल्ला समन्वय समिति परिसरमै स्थापना गरिएको छ भने क्षेत्र नं. ३ को कार्यालय पोखरिया नगरपालिकास्थित विद्युत प्राधिकरणको कार्यालयमा र क्षेत्र नं. ४ को कार्यालय धोबिनी गाउँपालिका कार्यालय नजिकै सञ्चालनमा ल्याइएको छ ।
जिल्लामा कुल ४४३ वटा मतदान केन्द्रमार्फत मतदान गराइनेछ । तीमध्ये ४४१ वटा नियमित र दुई वटा अस्थायी मतदान केन्द्र रहेका छन् । अस्थायी मतदान केन्द्र वीरगञ्ज कारागार र नेपाली सेनाको श्रीजंग गणमा रहनेछन् । कारागारमा रहेका कैदीबन्दीले त्यहीँ मतदान गर्नेछन् भने सुरक्षाकर्मी तथा निर्वाचनमा खटिने कर्मचारीहरूले श्रीजंग गणबाट मत दिने व्यवस्था गरिएको छ ।
निर्वाचन क्षेत्रगत रूपमा क्षेत्र नं. १ मा १०३, क्षेत्र नं. २ मा ११० तथा क्षेत्र नं. ३ र ४ मा समान रूपमा ११४–११४ वटा मतदान केन्द्र तोकिएका छन् । यसैगरी जिल्लाभर १६७ वटा मतदान स्थल कायम गरिएका छन् ।
पर्सा जिल्लामा कुल मतदाता संख्या ३ लाख ७६ हजार ५१३ रहेको छ । जसमा १ लाख ६४ हजार ४२१ महिला, २ लाख १२ हजार ७७ पुरुष तथा १५ जना यौनिक तथा लैंगिक अल्पसंख्यक समुदायका मतदाता रहेका छन् । फागुन २० गतेसम्म १८ वर्ष पूरा गरेका मतदातालाई मतदाता सूचीमा समावेश गरिएको जिल्ला निर्वाचन अधिकारी रौनियारले जानकारी दिइन् ।
कार्यालय स्थापना कार्यक्रममा पर्साका प्रमुख जिल्ला अधिकारी भोला दहाल, प्रमुख प्रहरी उपरीक्षक सुदिपराज पाठक, सशस्त्र प्रहरी उपरीक्षक पुरणचन्द्र भट्ट, अनुसन्धान कार्यालय पर्साका उपनिर्देशक सन्तोष ढुङ्गेल तथा निर्वाचन अधिकृतहरूको उपस्थिति रहेको थियो ।
