वीरगंज । राष्ट्रिय मुक्ति पार्टी नेपालले पर्सा क्षेत्र नं. ३ मा शनिबार पोखरिया नगरपालिका–९, शिवर्वा टोलमा आफ्नो क्षेत्रीय बैठक सम्पन्न गरेको छ । बैठकको अध्यक्षता क्षेत्र नं. ३ का उम्मेदवार मनोज पण्डित कुम्हालले गरेका थिए ।
उक्त बैठकमा पार्टीका सह–महासचिव नेजामुद्दीन शमानी, संविधान सभा सदस्य इस्लाम हवारी, पर्सा क्षेत्र नं. २ का उम्मेदवार फिरोज मियाँ, जिल्ला सचिव फहिम हवारी, शेषमन पटेल लगायतका नेता तथा कार्यकर्ताहरूको उल्लेखनीय उपस्थिती रहेको थियो।
बैठकमा आगामी निर्वाचनलाई केन्द्रमा राख्दै पार्टीको संगठन सुदृढीकरण, जनसम्पर्क विस्तार, चुनावी रणनीति र प्रचार–प्रसारका विषयमा विस्तृत छलफल गरिएको छ। साथै क्षेत्र नं. ३ मा पार्टीको पक्षमा जनसमर्थन थप सुदृढ बनाउने निर्णय समेत गरिएको छ।
पार्टी नेताहरूले आगामी निर्वाचनमा एकजुट भएर काम गर्ने र जनताको विश्वास जित्ने रणनीतिमा जोड दिएको बताएका छन्।
