वीरगंज । निमा पुस्तक प्रकाशन, काठमाडौंको आयोजनामा शनिबार वीरगंजमा शिक्षक अन्तरक्रिया तथा प्रशिक्षण कार्यक्रम सम्पन्न भएको छ।
ज्ञानदा एकेडेमी, वीरगंजमा सम्पन्न कार्यक्रममा विज्ञान तथा प्रविधि, सामाजिक अध्ययन र अंग्रेजी विषय अध्यापन गराउने शिक्षकहरूलाई ग्रिड (विषयवस्तु विशिष्टीकरण तालिका), प्रश्न निर्माण (आइटम मेकिङ) तथा यसको प्रयोगसम्बन्धी व्यावहारिक प्रशिक्षण प्रदान गरिएको थियो।
कार्यक्रममा राष्ट्रिय निजी तथा आवासीय विद्यालय अर्गनाइजेशन नेपाल (नेशनल प्याब्सन) वीरगंज महानगर समितिका अध्यक्ष जियालाल गुप्ता प्रमुख अतिथिका रूपमा उपस्थित हुनुहुन्थ्यो भने ज्ञानदा एकेडेमी वीरगंजका प्रमुख कार्यकारी अधिकृत राजेन्द्र कोइराला विशेष अतिथिका रूपमा सहभागी हुनुहुन्थ्यो।
कार्यक्रममा कक्षा ६ देखि १० सम्म अध्यापन गराउने विज्ञान, सामाजिक अध्ययन र अंग्रेजी विषयका शिक्षकहरूको उल्लेख्य सहभागिता रहेको थियो । विशेषगरी कक्षा १० का लागि प्रत्येक विद्यालयबाट कम्तीमा दुई जना शिक्षक सहभागी गराइएको उक्त कार्यक्रममा कुल १८० जना शिक्षकहरूले सक्रिय सहभागिता जनाएका थिए।
आयोजकका अनुसार कार्यक्रमको मुख्य उद्देश्य शिक्षकहरूलाई पाठ्यक्रममा आधारित प्रश्न निर्माण, मूल्यांकन प्रणाली तथा शैक्षिक गुणस्तर अभिवृद्धिमा दक्ष बनाउनु रहेको छ। प्रशिक्षण सत्रमा निमा पुस्तक प्रकाशनका लेखक तथा प्रशिक्षकहरू डा. हिरालाल सुवेदी, जगन्नाथ कपाली र मानबहादुर सुनारले सहजीकरण गर्नुभएको थियो।
ज्ञानदा एकेडेमीमा सम्पन्न यस कार्यक्रमले शिक्षकहरूको व्यावसायिक दक्षता अभिवृद्धिमा महत्वपूर्ण योगदान पुर्याउने अपेक्षा गरिएको छ। निमा पुस्तक प्रकाशनले आगामी दिनहरूमा पनि यस्ता अन्तरक्रिया तथा क्षमता अभिवृद्धि कार्यक्रमहरू निरन्तर सञ्चालन गर्ने प्रतिबद्धता जनाएको छ।
