वीरगंज । नेपाली कांग्रेस पर्सा निर्वाचन क्षेत्र नं. २ का प्रतिनिधि सभा सदस्य उम्मेदवार अजय कुमार चौरसियाले राष्ट्रिय स्वतन्त्र पार्टीका वरिष्ठ नेता तथा प्रधानमन्त्रीका उम्मेदवार बालेन्द्र साह (बालेन) लाई लक्षित गर्दै कडा तथा विवादास्पद टिप्पणी गरेका छन्।
कांग्रेसले वीरगंजस्थित नगर सभागृहमा आयोजना गरेको क्षेत्रीय भेलालाई सम्बोधन गर्दै पूर्व मन्त्री तथा निवर्तमान सांसदसमेत रहेका चौरसियाले बालेन साहलाई ‘लुसिफर’को संज्ञा दिँदै उनको कारण सिंहदरबारलगायत देशका विभिन्न संरचना ध्वस्त भएको दाबी गरे। उनले बालेन साह प्रधानमन्त्री बने देशको अवस्था कस्तो हुन्छ भन्ने प्रश्न समेत उठाए।
सभामा बोल्दै चौरसियाले बालेन साहप्रति लक्षित गर्दै आपत्तिजनक आरोपसमेत लगाए। उनले भने, “बालेन गजेडी हुन्, गाँजा पिएर उनका रातो–रातो आँखा हुन्थे, अहिले उपचार गराएर चुनाव लड्न आएका छन्।” यसका साथै उनले बालेन साहको गायन शैली, र्याप संगीत र जीवनशैलीप्रति टिप्पणी गर्दै यस्ता व्यक्तिले देशको नेतृत्व गरे मुलुकको हालत के हुने भन्दै प्रश्न गरे।
उनले अमेरिकामा वृद्ध आमाबुबालाई घरमा नराखी आश्रममा राखिने प्रसंग जोड्दै बालेन साह त्यही सोचबाट सञ्चालित भएको दाबीसमेत गरे र त्यसैले कांग्रेसलाई मतदान गर्नुपर्ने बताए।
कार्यक्रममा चौरसियाले नेपाली कांग्रेसले देशभरका १६५ निर्वाचन क्षेत्रमध्ये १२० स्थानमा नयाँ उम्मेदवार अघि सारेको उल्लेख गर्दै पार्टीभित्र पुस्तान्तरण भएको दाबी गरे। पार्टी सभापति आफूभन्दा करिब १५ वर्ष कान्छो रहेको उदाहरण दिँदै उनले कांग्रेसकै नेतृत्वमा देशको विकास सम्भव हुने धारणा राखे।
कांग्रेस पर्सा २ का क्षेत्रिय सभापति महमद सहाबुदिनकाे सभापतित्वमा भएकाे क्षेत्रिय भेलामा कांग्रेस पर्सा क्षेत्र नं. का उम्मेदवार अनिल रुंगटा, ३ का उम्मेदवार सुरेन्द्र प्रसाद चौधरी, ४ का उम्मेदवार रमेश रिजाल लगायतकाे उपस्थिती रहेकाे थियाे ।
