वीरगंज । नेपाली कम्युनिष्ट पार्टी (नेकपा) पर्सा निर्वाचन क्षेत्र नं. १ को क्षेत्रीय भेला शनिबार सम्पन्न भएको छ । भेलाले पार्टीका केन्द्रीय सदस्य बाबुराम कौशिकको संयोजकत्वमा ५५१ सदस्यीय निर्वाचन परिचालन समिति गठन गरेको छ। समितिको सह–संयोजकमा राज कुमार घिमिरे रहेका छन्।
भेलालाई सम्बोधन गर्दै पर्सा क्षेत्र नं. १ का प्रतिनिधि सभा सदस्य उम्मेदवार सीए अजय चौरसियाले आफू पहिलेदेखि नै शोषित, पीडित तथा मधेसका उत्पीडित वर्गको हक–अधिकारका पक्षमा संघर्ष गर्दै आएको बताए। उनले निर्वाचनको समयमा विभिन्न किसिमका प्रलोभनमा नपरी सही र योग्य व्यक्तिको छनोट गर्नुपर्ने आवश्यकता औंल्याए।
चौरसियाले शिक्षित युवा उम्मेदवारका रूपमा उच्च मनोबलका साथ जनताबीच जाने प्रतिबद्धता व्यक्त गर्दै जनताको हकअधिकारका लागि निरन्तर संघर्ष गर्ने बताए। आफू निर्वाचित भएर प्रतिनिधि सभामा पुगे जनताका समस्या समाधानका लागि नीति–नियम सुधारमा सक्रिय भएर काम गर्ने प्रतिबद्धता उनले व्यक्त गरे।
कार्यक्रममा वक्ताहरूले नेपाली कम्युनिष्ट पार्टीले विगतदेखि गर्दै आएको संघर्ष र योगदानलाई जनतामाझ अझ प्रभावकारी रूपमा पुर्याउनुपर्ने समय आएको बताएका थिए। पर्सा क्षेत्र नं. १ मा पार्टीको संगठन मजबुत बनाउँदै आगामी निर्वाचनमा जनताको विश्वास जित्न एकताबद्ध भएर लाग्नुपर्ने धारणा उनीहरूले राखे।
केन्द्रिय सदस्य काैशिककाे अध्यक्षतामा भएकाे भेलामा नेकपाका केन्द्रीय सदस्य बालगोपाल थापा, रामबाबु बैठा, मुस्कान खातुन, नेता रामदरश कुश्वाहा लगायतले मन्तव्य राखेका थिए भने कार्यक्रमको सञ्चालन प्रमु यादवले गरेका थिए।
