वीरगंज। २०७० सालमा सम्पन्न दोस्रो संविधान सभा निर्वाचनमा तत्कालीन पर्सा निर्वाचन क्षेत्र नम्बर–२ बाट मधेसी जनअधिकार फोरम नेपालका उम्मेदवार बनेका प्रदीप यादव झिनो मतान्तरले पराजित भएका थिए। तर त्यसपछि भएका संसदीय निर्वाचनहरूमा उनले कहिल्यै पराजय व्यहोर्नु परेन।

२०७४ र २०७९ सालमा सम्पन्न प्रतिनिधि सभा निर्वाचनमा पर्सा निर्वाचन क्षेत्र नम्बर–१ बाट लगातार दुई पटक विजयी हुँदै यादवले नयाँ इतिहास रचेका छन्। पर्सा–१ मा यसअघि कसैले पनि एक पटकभन्दा बढी निर्वाचन जित्न नसकेको अवस्थामा यादवले लगातार दुई जित निकाल्दै आफूलाई क्षेत्रको बलियो नेताका रूपमा स्थापित गरेका हुन्।

२०७४ को प्रतिनिधि सभा निर्वाचनमा तत्कालीन संघीय समाजवादी पार्टीबाट उम्मेदवार बनेका यादवले नेपाली कांग्रेसका उम्मेदवार अनिल रुंगटालाई पाँच हजारभन्दा बढी मतान्तरले पराजित गर्दै पहिलो पटक संघीय सांसद बनेका थिए। त्यसैगरी २०७९ को निर्वाचनमा तत्कालीन जसपा नेपालबाट उम्मेदवार बनेका उनले स्वतन्त्र उम्मेदवार अजय द्विवेदीलाई एक हजार सात सयभन्दा बढी मतान्तरले हराउँदै दोस्रो पटक सांसद बन्न सफल भए।

अब फागुन २१ गते हुन लागेको प्रतिनिधि सभा निर्वाचनमा यादव नेकपा एमालेबाट उम्मेदवार बनेर पर्सा–१ बाट तेस्रो पटक विजयी हुने लक्ष्यसहित चुनावी मैदानमा उत्रिएका छन्।

यादवले भने, “पर्सा–१ मा यसअघि कसैले पनि लगातार दुई पटक चुनाव जितेको इतिहास थिएन। मैले २०७४ र २०७९ मा लगातार चुनाव जित्दै इतिहास रचेँ। यसपालि पनि यही क्षेत्रबाट उम्मेदवार बनेको छु र जितको ह्याट्रिक पूरा गर्नेमा म विश्वस्त छु।”

विगतका दुई कार्यकालमा पर्सा–१ का जनताको सुख–दुःखमा सधैं साथमा रहेको दाबी गर्दै उनले जनताले आफ्नो कामको मूल्यांकन गरेर पुनः विजयी बनाउने विश्वास व्यक्त गरे।

खानेपानी मन्त्री हुँदा वीरगञ्जमा देखिएको खानेपानी संकट समाधानका लागि आफूले विशेष पहल गरेको स्मरण गर्दै यादवले भने, “वीरगञ्जमा खानेपानीको हाहाकार भएका बेला संयोगले म खानेपानी मन्त्री थिएँ। मन्त्रालयमार्फत पर्याप्त बजेट ल्याएर घर–घरमा पानी पुर्‍याउने काम गरियो। विश्व बैंकसँग पहल गरी वीरगञ्जको दीर्घकालीन खानेपानी समाधानका लागि साढे चार सय करोडभन्दा बढीको आयोजना निर्माण प्रक्रिया सुरु भइसकेको छ।”

त्यस्तै, हैजा महामारीका बेला काठमाडौंबाट विशेषज्ञ स्वास्थ्यकर्मीको टोली ल्याएर नियन्त्रणमा भूमिका खेलेको तथा कोरोना महामारीका समयमा पनि घरमै नबसी जनताको घरदैलोमा पुगेको उनले बताए।

यस निर्वाचनमा फरक दलबाट उम्मेदवार बन्नुको कारण स्पष्ट पार्दै यादवले संविधान, संघीयता र लोकतन्त्रको रक्षाका लागि एमाले रोजेको बताए। “राष्ट्रप्रेम र विकासका सवालमा केपी शर्मा ओलीको चट्टानी अडानबाट प्रभावित भएर एमालेमा प्रवेश गरेको हुँ,” उनले भने, “एमालेमा प्रवेश गरे पनि मधेस आन्दोलनका मुद्दा मैले छोडेको छैन। बाँकी रहेका मधेसका मुद्दा समाधान गर्ने सामर्थ्य एमालेसँग छ।”

पर्सा–१ मा एमालेका प्रदीप यादवसँगै नेपाली कांग्रेसका अनिल रुंगटा, राष्ट्रिय स्वतन्त्र पार्टीका हरि पन्त, जसपा नेपालका रामरेश प्रसाद यादव, राप्रपाका नन्दकिशोर (नन्दु) श्रीवास्तव, उज्यालो नेपाल पार्टीका रामकिशोर सिंह पराग, नेपाल कम्युनिष्ट पार्टीका अजयकुमार चौरसिया, जनमत पार्टीका ओमप्रकाश सर्राफलगायत करिब ३० जना उम्मेदवार चुनावी प्रतिस्पर्धामा रहेका छन्।

वीरगंज । पर्सा निर्वाचन क्षेत्र नम्बर ३ मा रुपेश कुमार पाण्डेय प्रतिनिधिसभा सदस्य निर्वाचनका लागि चुनावी मैदानमा उत्रिएका छन् । आगामी फागुन २१ गते हुने प्रतिनिधिसभा निर्वाचनमा उनी नेकपा एमालेबाट उम्मेदवार बनेका हुन् ।

युवा नेता पाण्डेय भाषणमा मात्र सीमित नभई आफ्नो गाउँ–ठाउँको सुख–दुःखमा सधैं साथ दिने जनप्रिय नेताका रूपमा परिचित छन् । जनताको पीडा बुझ्ने, समस्या सुन्ने र समाधानतर्फ अघि बढ्ने आत्मविश्वास नै आफ्नो सबैभन्दा ठूलो शक्ति भएको उनले बताएका छन् ।

चुनावी प्रतिबद्धता सार्वजनिक गर्दै पाण्डेयले निर्वाचन जितेपछि स्वास्थ्य, कृषि, शिक्षा, किसान र श्रमिक क्षेत्रलाई प्राथमिकतामा राखेर काम गर्ने स्पष्ट योजना अघि सारेका छन् । स्वास्थ्य क्षेत्रमा गाउँ–गाउँमा आधारभूत स्वास्थ्य सेवा विस्तार, गुणस्तरीय अस्पताल र आपतकालीन सेवामा सहज पहुँच सुनिश्चित गर्ने उनको प्रतिबद्धता छ ।

त्यसैगरी कृषि क्षेत्रमा किसानलाई मल, बीउ, सिँचाइ, बजार तथा उत्पादनको उचित मूल्यको व्यवस्था गरिने उनले बताएका छन् । शिक्षा क्षेत्रमा गुणस्तरीय शिक्षा, आधुनिक प्रविधिको प्रयोग र युवालाई सीपमूलक तालिममार्फत रोजगारीमुखी बनाउने योजना रहेको पनि पाण्डेयले उल्लेख गरे ।

किसान र श्रमिकको मेहनतको सम्मान, अधिकारको रक्षा तथा आत्मनिर्भरताका कार्यक्रमलाई प्रभावकारी रूपमा अघि बढाइने उनको भनाइ छ । उनले भने, “मेरो सोच विकास कागजमा होइन, जमिनमा देखिनुपर्छ । राजनीति पदका लागि होइन, सेवाका लागि हुनुपर्छ ।”

पर्सा क्षेत्र नं. ३ को समग्र विकास, सुशासन र उज्यालो भविष्यका लागि युवा सोच, स्पष्ट दृष्टि र दृढ आत्मविश्वासका साथ आफू अघि बढेको पाण्डेयले बताएका छन् ।