वीरगंज । पर्सा निर्वाचन क्षेत्र नं. २ मा नेपाली कांग्रेसबाट विद्रोह गर्दै स्वतन्त्र उम्मेदवारी दिएका पूर्व प्रदेश सभा सदस्य राजेश्वर प्रसाद साहले आफ्नाे उम्मेदवारी फिर्ता लिएकाे स्पष्टिकरण दिएका छन्।
सामाजिक सञ्जाल फेसबुकमार्फत सार्वजनिक वक्तव्य जारी गर्दै साहले देशको वर्तमान चुनावी परिस्थिति र पार्टीको प्रतिष्ठालाई मध्यनजर गर्दै कम समयमै उम्मेदवारी फिर्ता लिने निर्णयमा पुगेको बताएका छन्। केही दिनअघि समर्थक, शुभेच्छुक तथा स्थानीयको सल्लाह, सहयोग र समर्थनमा प्रतिनिधि सभा सदस्य निर्वाचनका लागि स्वतन्त्र उम्मेदवारी दर्ता गरेको उल्लेख गर्दै उनले आफ्नो पछिल्लो निर्णयले समर्थकहरूलाई दुख पुगेकोप्रति गहिरो अनुभूति भएको बताएका छन्।
साहले समर्थकहरूको शब्द, सामाजिक सञ्जालका प्रतिक्रिया र मौन पीडा सबै आत्मसात गरेको उल्लेख गर्दै भरोसामा चोट पुगेको सत्यबाट भाग्न नचाहेको र हृदयदेखि नै क्षमायाचना गरेका छन्। उनले परिवर्तन, सुशासन, विकास र नयाँ राजनीतिक संस्कृतिको सपना कहिल्यै नछाडेको स्पष्ट पार्दै उक्त सपना समर्थकहरूसँगै देखेको र आज पनि त्यही विश्वास बोकेको बताएका छन्।
उम्मेदवारी फिर्ता लिने विषयमा फैलिएका हल्लाप्रति प्रतिक्रिया जनाउँदै साहले कुनै दल वा व्यक्तिसँग पद, पैसा, प्रलोभन वा दबाबमा कुनै गोप्य सहमति नगरेको स्पष्ट पारेका छन्। ती सबै हल्ला असत्य भएको उनको दाबी छ।
स्वतन्त्र रूपमा चुनाव लड्नु भावनात्मक रूपमा आकर्षक भए पनि दीर्घकालीन परिवर्तनलाई अझ गाह्रो बनाउने जोखिम रहेको उल्लेख गर्दै साहले आफ्नो निर्णय भावनामा नभई जिम्मेवारी र रणनीतिक परिस्थितिको मूल्यांकनका आधारमा लिएको बताएका छन्। दलभित्रै बसेर सुधार र परिवर्तनको संघर्ष कठिन भए पनि दीर्घकालीन परिवर्तनका लागि यही बाटो उपयुक्त ठानेको उनको भनाइ छ।
हालै सम्पन्न नेपाली कांग्रेसको विशेष महाधिवेशनबाट चयन भएको नयाँ नेतृत्वको उद्देश्य परिवर्तन र पुस्तान्तरण नै रहेको उल्लेख गर्दै साहले व्यक्ति विशेषभन्दा लोकतान्त्रिक प्रक्रिया र संगठनात्मक अनुशासनको सम्मानमा आफू उभिएको स्पष्ट पारेका छन्। उनले आफ्ना विचार त्यागेको नभई तिनलाई अझ इमानदार र जिम्मेवार ढंगले अघि बढाउने प्रतिबद्धता जनाएका छन्।
अन्त्यमा साहले समर्थकहरूसँग थोरै समय दिन आग्रह गर्दै आजको निर्णयभन्दा भोलिका काम र व्यवहारका आधारमा मूल्याङ्कन गर्न अनुरोध गरेका छन्। आफू सधैं समर्थकहरूसँगै रहेको र परिवर्तनको यात्रामा निरन्तर साथ रहने विश्वास दिलाएका छन्।
