वीरगंज । नेपाली कम्युनिष्ट पार्टी (नेकपा) पर्सा क्षेत्र नं. २ को क्षेत्रीय भेला शनिबार वीरगंजमा सम्पन्न भएको छ। वीरगंजको रानिघाटस्थित बिन्दवासिनी होटल एण्ड पार्टी प्यालेसमा सम्पन्न भेलाले पार्टीका केन्द्रीय सदस्य रामचन्द्र साहको संयोजकत्वमा १५१ सदस्यीय निर्वाचन परिचालन समिति गठन गरेको छ । समितिको सह–संयोजकमा विपिन यादव रहेका छन्।
क्षेत्रीय भेलालाई सम्बोधन गर्दै पर्सा क्षेत्र नं. २ का प्रतिनिधि सभा सदस्यका उम्मेदवार मनोज चौधरीले नेकपाले मात्र जेन–जी आन्दोलनका मागहरू पूरा गर्न सक्ने दाबी गरे। उनले हालका निवर्तमान सांसद नै मन्त्री रहेको सरकारका कारण जेन–जी आन्दोलन भएको र त्यसबाट देशले ठूलो क्षति व्यहोर्नु परेको बताए ।
त्यस्तै व्यक्तिहरू र पार्टी पुनः सरकारमा गए देश ठूलो दुर्घटनातर्फ जान सक्ने चेतावनी दिँदै चौधरीले नेकपाका उम्मेदवारलाई चुनाव चिन्ह तारा छापमा मतदान गरी विजयी गराउन आग्रह गरे।
पार्टीका केन्द्रीय सल्लाहकार समिति सदस्य रामश्रय रामको अध्यक्षता तथा केन्द्रीय सदस्य नागेन्द्र चौधरीको प्रमुख आतिथ्यतामा सम्पन्न भेलामा केन्द्रीय सदस्य रामचन्द्र साह, समानुपातिक उम्मेदवारसमेत रहेकी केन्द्रिय सदस्य सावित्री पाेखरेल, केन्द्रीय सदस्य विपिन यादव, बिरेन्द्र यादव, फिरोज बादसाह लगायतका नेता तथा कार्यकर्ताहरूको उल्लेखनीय उपस्थिति रहेको थियो। कार्यक्रमको सञ्चालन केन्द्रीय सदस्य बृजलाल पासवानले गरेका थिए।
