काठमाडौं । काठमाडौं महानगरपालिकाका मेयर बालेन साहले सिंहदरबारमा आगलागी हुँदा महानगरको दमकल निष्क्रिय भएको वा आफूले आगो लगाएको भन्ने आरोप असत्य र भ्रामक भएको बताएका छन्।

फेसबुकमार्फत लामो स्पष्टीकरण सार्वजनिक गर्दै मेयर साहले भनेका छन्, “यत्रो सिंहदरबार जल्दा काठमाडौं महानगरको दमकल कहाँ गयो? तीन दिनसम्म जलेको हेरेर बस्यो?” भन्ने प्रश्न र आरोपहरू बेबुनियाद छन्।
उनका अनुसार, गत भदौ २४ गते देशभर अराजक स्थिति सिर्जना भएको बेला पनि महानगरको टिमले निरन्तर उद्धार र आगो नियन्त्रण कार्यमा खटिन छोडेको थिएन।

साहले भनेका छन्, “त्यो दिन देशमा सरकार थिएन, तर स्थानीय सरकार — काठमाडौं महानगर — आफ्नो जिम्मेवारीबाट पछि हटेको थिएन। हाम्रो टिमले आगो निभाउनेदेखि घाइतेको उपचार, खाना र औषधि व्यवस्थापन, लास व्यवस्थापनसम्मका काममा दिन–रात खटिएको थियो।”

उनका अनुसार आन्दोलनकारीको अवरोधका कारण सिंहदरबारतर्फ दमकल तत्काल पुग्न सकेको थिएन। “भिड शान्त भएपछि २४ गते साँझ ८:१५ बजे काठमाडौं महानगरको दमकल सिंहदरबार पुगेको थियो,” उनले लेखेका छन्।

साहका अनुसार, काठमाडौं महानगरसँग हाल न्युरोड, बालाजु र रामहिटी गरी पाँच वटा दमकल सञ्चालनमा छन्, जसमा ४४ जना कर्मचारी तीन सिफ्टमा काम गर्छन्। आन्दोलनको क्रममा २३ देखि २८ गतेसम्म महानगरका दमकलहरूले सिंहदरबार मात्र होइन, संसद भवन, अख्तियार दुरुपयोग अनुसन्धान आयोग, सर्वोच्च अदालत, विभिन्न बैंक र व्यापारीक क्षेत्रलगायत ५० भन्दा बढी स्थानमा आगो निभाएको विवरण पनि उनले सार्वजनिक गरेका छन्।

त्यससँगै, महानगरले स्वास्थ्यकर्मी, औषधि, रगत, खाना तथा आवास व्यवस्थापनमा समेत अग्रसर भूमिका खेलेको उनले बताएका छन्। “उपचारको लागि अभिभावक नभएका बिरामीहरूको अभिभावक हाम्रो टिम बनेको थियो,” साहले लेखेका छन्।

अन्त्यमा, मेयर साहले जनतालाई अफवाहमा नपर्न आग्रह गर्दै भनेका छन्, “सत्य बुझौं, अफवाह फैलाउने काम नगरी सुरक्षित र मानवताप्रधान समाज बनाऔँ। देशलाई अहिले एकता र साँचो कुराको खाँचो छ, हल्ला र झूटको होइन।”

काठमाडौं । गृह मन्त्रालयले देशभर आगामी दुई दिन सार्वजनिक विदा दिने घोषणा गरेको छ। जल तथा मौसम विज्ञान विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणबाट प्राप्त जानकारी अनुसार असोज १८ देखि २० गतेसम्म देशका विभिन्न भागमा भारीदेखि अति भारी वर्षा हुने पूर्वानुमान भएकाले यस्तो निर्णय गरिएको हो।

मन्त्रालयले आज जारी गरेको सार्वजनिक सूचनामा भनिएको छ, “वर्षाका कारण बाढी, डुबान, भू–क्षय लगायतका जोखिम उच्च रहेको र सडक तथा हवाई यातायातमा असर पर्ने सम्भावना भएकाले असोज १९ र २० गते नेपाल राज्यभर सार्वजनिक विदा दिने निर्णय गरिएको छ।”

सार्वजनिक विदा अवधिमा विपद् व्यवस्थापन र अत्यावश्यक सेवासँग सम्बन्धित कार्यालयहरू भने सञ्चालनमा रहनेछन्।

गृह मन्त्रालयका सहसचिव तथा प्रवक्ता आनन्द काफ्लेले जारी गरेको सूचनामा सबै नागरिकलाई अनावश्यक रूपमा घर बाहिर ननिस्कन, सुरक्षित स्थानमा बस्न र सम्बन्धित निकायका निर्देशनहरू पालना गर्न अनुरोध गरिएको छ।

सूचनामा देशभर बढ्दो वर्षा र सम्भावित विपद् जोखिमका बीच सतर्क रहन सबै पक्षलाई सचेत गराइएको छ।