वीरगंज । पर्सा जिल्लामा अविरल वर्षा भएको छ । गएको २४ घण्टामा जिल्लाको वीरगञ्ज क्षेत्रमा सबैभन्दा बढी १००.८ मिलिमिटर वर्षा रेकर्ड गरिएको छ।
त्यस्तै, कलैया स्टेशनमा ९० मिलिमिटरभन्दा बढी र परवानीपुर स्टेशनमा ७५ मिलिमिटरभन्दा बढी वर्षा मापन भएको हाइड्रोलोजी विभाग, केन्द्रीय विभाग (TU) का मौसमविद् आकाश मण्डलले जानकारी दिएका छन्।
लगातारको वर्षाका कारण केही स्थानमा पानी जमिन सक्ने र नदीनालामा पानीको सतह बढ्ने सम्भावना रहेको भन्दै जिल्ला वासिलाई आवश्यक सतर्कता अपनाउन आग्रह गरिएको छ।
वीरगंज । बडा दशैंको अवसरमा सशस्त्र प्रहरी बल, नेपाल नं.१३ गण हे.क्वा. पर्साले सीमावर्ती दलित बस्तीसँग विशेष सामुदायिक कार्यक्रम सञ्चालन गरेको छ।
बिहिवार वीरगंज महानगरपालिका–१६ पशुपतिनगरस्थित दलित बस्तीमा “सीमाबासीसँग सशस्त्र प्रहरी कार्यक्रम” अन्तरगत आयोजित कार्यक्रममा प्रमुख जिल्ला अधिकारी तोयनारायण सुवेदी प्रमुख अतिथि रहनुभएको थियो।
कार्यक्रम अन्तर्गत बस्तीका ५० जना विद्यार्थीलाई ३०० वटा कपि र ५०० वटा पेन्सिल, ३३ घरधुरीका अभिभावकलाई बाल्टिन, जग, पिउस, जीवनजल तथा साबुन वितरण गरिएको थियो। साथै, स्थानीय बासिन्दालाई हात धुने उपाय सिकाइएकाे र करिब २५० जनालाई सामूहिक खाजा खुवाइएको थियो। सो अवसरमा समुदायका वृद्धाबाट टिका–जमरा ग्रहण गरेका बालबालिकालाई पनि टिका लगाइने कार्यक्रम गरिएको सशस्त्र प्रहरी बल नेपाल नं. १३ गण पर्साका सूचना अधिकारी प्रहरी नायब उपरीक्षक सुरज कार्कीले जानकारी दिए ।
यस कार्यक्रममा नं.१३ गण हे.क्वाका गणपति सशस्त्र प्रहरी उपरीक्षक पुरन चन्द्र भट्ट, प्रस्तावित सीमा सुरक्षा गुल्म वीरगंजका गुल्मपति सशस्त्र प्रहरी नायब उपरीक्षक पुरुषोत्तम भण्डारी, प्रहरी चौकी ईनर्वाका प्रहरी सहायक निरीक्षक राजकुमार राय यादव, वडाध्यक्ष पर्शुराम चौरसिया, संचारकर्मी, भद्रभलादमी तथा करिब ३०० जना स्थानीयवासीको उपस्थिति रहेको थियो।
वीरगंज । पर्साको छिपहरमाई गाउँपालिका वडा नम्बर ३ जयमंगलापुरस्थित पुलमुनि शुक्रबार बिहान एक युवक मृत अवस्थामा फेला परेका छन्।
वडा नम्बर ३ कार्यालयदेखि करिब १०० मिटर पश्चिमतर्फ रहेको झलमहिया–भिस्वा जोड्ने कलभटको पुलमुनी खसेको अवस्थामा भारतीय नम्बर प्लेटको हुण्डा साइन मोटरसाइकलसहित झलमहिया गाउँकै २७ वर्षीय रमेश साह कानु मृत फेला परेका हुन्।
पुलमुनिको पानीमा वीर आर २२ ए एल १२७३ नम्बरको मोटरसाइकलसहित मृत भेटिएका साहको मृत्युको कारण अहिलेसम्म खुलेको छैन।
घटनास्थलमा इलाका प्रहरी कार्यालय पोखरियाका प्रहरी निरीक्षक स्वरुप शर्माको नेतृत्वमा प्रहरी टोली पुगेर घटना बारे अनुसन्धान गरिरहेको प्रहरीले जनाएको छ।
वीरगंज । पर्साको वीरगंज महानगरपालिका–१० गीता मन्दिर नजिक मंगलबार राति भएको युवकको हत्यामा सलंग्न ५ जनालाई प्रहरीले सार्वजनिक गरेको छ ।
मंगलबार राति करिब ११:३० बजे अपरिचित व्यक्तिहरूबीच कुटपिट हुँदा बारा परवानीपुर–९ घर भई हाल वीरगञ्ज–१० बस्ने २० वर्षीय शिवम साह कानु (गोल्डेन) गम्भीर घाइते भएका थिए । उनलाई उपचारका लागि राति ११:४० बजे नारायणी अस्पताल ल्याइएको भए पनि उपचारकै क्रममा ११:५० बजे चिकित्सकले मृत घोषणा गरेका थिए ।
घटनापछि जिल्ला प्रहरी कार्यालय पर्साका प्रमुख प्रहरी उपरीक्षक सुदीप राज पाठकको कमाण्डमा प्रहरी निरीक्षक निरोज चौलागाईसहित ३२ जना सुरक्षाकर्मी परिचालन गरी अनुसन्धान सुरु गरिएको प्रहरीले जनाएको छ ।
प्रहरीका अनुसार मृतक साहको समूह र प्रतिपक्षी युवाहरूबीच विगतदेखि नै विवाद हुँदै आएको र सोही रिसईवीको कारण उनलाई निशाना बनाई बाँसको लठ्ठी, हात–खुट्टा प्रयोग गरी कुटपिट गरी हत्या गरिएको प्रारम्भिक अनुसन्धानमा खुलेको छ ।
यस घटनामा संलग्न भएको आरोपमा वीरगंज–२४ रामगढवा बस्ने १९ बर्षिय गौतम पटेल, २० बर्षिय सुभांकर चौरसिया, २२ बर्षिय करण प्रसाद पटेल उर्फ अमिरी पटेल, २४ बर्षिय चन्दन चौरसिया र १९ बर्षिय अमन पटवालाई प्रहरीले नियन्त्रणमा लिएको छ ।
अनुसन्धानका क्रममा घटनास्थलको CCTV फुटेज, भिडियो रेकर्ड तथा CDR विश्लेषणमार्फत आरोपितहरूको संलग्नता पुष्टि भएको प्रहरीले जनाएको छ । प्रहरीका अनुसार आरोपितहरुलाई वीरगंज र भारत सिमानानजिकको भिस्वा क्षेत्रबाट पक्राउ गरिएको हो ।
प्रहरीले घटनाको कारण पुरानो रिस–आवेग, आफुलाई कु-ख्यात प्रदर्शन गर्ने (ग्याङ–स्टार) देखाउने प्रवृत्ति र व्यक्तिगत दुश्मनी रहेको निष्कर्ष निकालेको छ ।
प्रहरी नायब उपरीक्षक तथा सूचना अधिकारी हरि बहादुर बस्नेतका अनुसार घटनामा थप व्यक्तिहरूको संलग्नता रहन सक्ने भएकाले अनुसन्धानलाई अझै गहिरो पारिएको छ ।
कलैया । बारा जिल्ला अदालत बार एशोसिएशनले बारा जिल्ला अदालतका न्यायाधीश भोलानाथ ढकालको बेन्च बहिष्कार गर्ने निर्णय गरेको छ ।
बार एशोसिएशनले मिति २०८२ असोज ५ गते सम्पत्ति शुद्धिकरण मुद्दा (थान २) र राजश्व छली मुद्दा (थान १) सहित ३ वटा मुद्दामा फरार रहेका भारतीय नागरिक अशोक कुमार सिन्हालाई कानून विपरीत उनाउ व्यक्तिलाई हाजिर गराएको, धरौटीमा रिहा गरिएको कार्यप्रति गम्भीर आपत्ति जनाउदै कारवाही माग गर्दै न्याय परिषद काठमाडौंमा निवेदन समेत दिएको छ ।
बार एशोसिएशनका अध्यक्ष उमेश प्रसाद जयसवालद्वारा हस्ताक्षरित निवेदनमा सो आदेश विचौलियासँगको सेटिङमा रकम लिने–दिने आधारमा भएको भनी विभिन्न अनलाइन सञ्चारमाध्यममा प्रकाशित समाचारप्रति ध्यानाकर्षण भएको उल्लेख छ ।
“माननीय न्यायाधीश ढकालज्यूको उक्त आदेशले न्यायपालिकाप्रति जनविश्वास, कानूनी शासन र निष्पक्षताको आधारमा गम्भीर असर परेको महसुस गरिएको छ । त्यसैले यस विषयमा न्याय परिषदमार्फत सूक्ष्म अनुसन्धान गरी संलग्न न्यायाधीश, कर्मचारी तथा बिचौलियामाथि कानूनी कारबाही हुनुपर्छ,” निवेदनमा उल्लेख छ ।
बार एशोसिएशनले ठोस निर्णय नआएसम्म न्यायाधीश ढकालको इजलास बहिष्कार गर्ने निर्णय भएको जनाएको छ ।
यस सम्बन्धमा प्रधानमन्त्री तथा मन्त्रिपरिषद् कार्यालय, सर्वोच्च अदालत र गृहमन्त्रालयलाई समेत जानकारी गराइएको एशोसिएशनले जनाएको छ ।
वीरगंज । महानवमीको अवसरमा पर्साका विभिन्न मन्दिर तथा धार्मिक स्थलहरूमा कन्या पूजन गरी कुँवारी खुवाइएको छ ।
महानवमीका दिन परम्पराअनुसार नवदुर्गाको प्रतीक मानिएका बालिकाहरूलाई पूजा–अर्चना गरी प्रसादस्वरूप भोजन गराउने प्रथा रहिआएको छ । देवीलाई खुशी पार्न कन्यालाई देवीको रूप मानिने विश्वासका साथ नवदुर्गा मन्दिर, छिपहरमाई मन्दिर, कालिकामाई मन्दिर लगायतका स्थानमा भक्तजनहरूले पूजाआजा गर्दै बालिकाहरूलाई भोजन गराएका हुन् । यसका साथै केहि नवरात्रका भक्तजनहरु आ आफ्नो घरमा पनि कुँवारी खुवाएका हुन् ।
यस अवसरमा बालिकाहरूलाई अक्षता, फुलमाला, प्रसादसहित दक्षिणा प्रदान गरिएको थियो । कन्या पूजनका क्रममा सहभागी भक्तजनहरूले देवी दुर्गासँग परिवारको सुख, शान्ति र समृद्धिको कामना गरेका थिए ।
धार्मिक विश्वासअनुसार, महानवमीमा कन्या पूजन गरी भोजन गराउँदा वर्षभरि घर–परिवारमा शान्ति र समृद्धि कायम रहने जनविश्वास छ ।
वीरगंज । जिल्ला प्रहरी कार्यालय पर्साले भिमफेदी कारागारबाट फरार एक कैदीलाई वीरगंजबाट पक्राउ गरेको छ ।
प्रहरीका अनुसार, विशेष सूचनाको आधारमा खटिएको प्रहरी टोलीले वीरगंज महानगरपालिका–१६ बसपार्कमा बसोबास गर्दै आएका २५ वर्षीय अमजत मियालाई सोमबार बिहान ११ बजे नियन्त्रणमा लिएको हो ।
मिया लागुऔषध सम्बन्धी कसुरमा संलग्न रहँदै पर्सा जिल्ला अदालतको आदेशमा पुर्पक्षका लागि भिमफेदी कारागार, मकवानपुर पठाइएको थियो । तर, मिति २०८२ भदौ २५ गते जेन-जि आन्दोलनका क्रममा कारागारबाट फरार भएका थिए ।
पक्राउ परेका मियालाई जिल्ला प्रहरी कार्यालय पर्सामा ल्याई आवश्यक प्रक्रिया पूरा गरी सम्बन्धित कारागारमा पठाउने तयारी भइरहेको जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरि बहादुर बस्नेतले जानकारी दिए ।
वीरगंज । वीरगंजस्थित मानवसेवा आश्रममा आश्रय लिएकी एक महिलाले मंगलबार नारायणी अस्पतालमा छोरी जन्माएपछि बुधबार बिहान भावनात्मक पारिवारिक पुनर्मिलन भएको छ ।
असोज १४ गते बेलुकी ५:२३ बजे पेट दुखेपछि अस्पताल पुर्याइएकी करिब ३० वर्षीया पुनिता देवी रामले नारायणी अस्पतालमा स्वस्थ छोरीलाई जन्म दिएकी थिइन् । बच्चा जन्मिएको खबर विभिन्न सञ्चारमाध्यम, सामाजिक सञ्जाल, रेडियो तथा पत्रपत्रिकामा आएपछि महिलाको ससुरो सम्भु राम र सासु पाना देवी चमारले फेसबुकमार्फत जानकारी पाएर बुधबार बिहान ८ बजे बुहारी र नातिनी लिन अस्पताल पुगेका हुन् ।
उनीहरू पर्सागढी नगरपालिका–५, झिंग्नी निवासी हुन् । सासु–ससुराले दिएको जानकारी अनुसार, उनका श्रीमान् राम कारण राम भारतको पहाडी क्षेत्रमा ट्र्याक्टर चालकका रूपमा कार्यरत छन् भने पुनिता देवी मानसिक स्वास्थ्य समस्याका कारण घरबाट हराएकी थिइन् ।
बुहारी र नातिनीलाई घरमा ल्याउने क्रममा अस्पताल परिसरमै पारिवारिक पुनर्मिलन कार्यक्रम गरिएको थियो । उक्त अवसरमा मानवसेवा आश्रम वीरगंजका संस्थापक अभियन्ता देवेश गुप्ता, सामाजिक अभियन्ता प्रकाश थारु, लायन्स क्लब अफ वीरगंज सेस्मी एकेडेमीकी अध्यक्ष पिया सिंह, OCMC फोकल पर्सन हेमा थापा, समाजसेवी सन्तोष पटेल र पिन्टु रौनियारलगायत आश्रमका स्वयंसेवक र सुरक्षाकर्मीको उपस्थिति थियो ।
मानवसेवा आश्रमले समाचार सेयर गरेर सहयोग पुर्याउने सम्पूर्ण सञ्चारकर्मी र शुभेच्छुकप्रति विशेष धन्यवाद व्यक्त गरेको छ ।
यसअघि, असोज ११ गते शनिबार राति ९ बजे वडा प्रहरी कार्यालयका प्रहरी सहायक निरीक्षक भुलेन्द्र गिरी र सामाजिक अभियन्ता प्रकाश थारुले पेट ठूलो भएकी गर्भवती महिलालाई मानवसेवा आश्रम वीरगंज शाखामा ल्याएका थिए ।
वीरगंज । सर्लाही जिल्लाको हरिपुवामा ढिस्कोले पुरिँदा चार जनाको मृत्यु भएको छ ।
हरिपुवा नगरपालिका–१ हर्दी खोलाको किनारमा माटो खन्ने क्रममा महोत्तरीको सोनमा गाउँपालिका–६, मगरथानाका बासिन्दा ६५ वर्षीया सायदा खातुन, ६ वर्षीया सविवा खातुन, ८ वर्षीय डिल्लु मन्सुर र ९ वर्षीया नर्गिस खातुन ढिस्कोले पुरिँदा ज्यान गएको जिल्ला प्रहरी कार्यालयका सहायक प्रवक्ता बलिष्ठर सिंहले जानकारी दिए ।
ढिस्कोले पुरिएका उनीहरूलाई तत्काल उद्धार गरी स्थानीयले प्रादेशिक अस्पताल मलङ्गवा पुर्याए पनि अस्पताल पुगे लगत्तै चिकित्सकले मृत घोषणा गरेका थिए ।
वीरगंज । वीरगंज मेलामा मंगलबार राति भएको घटनामा मृत्यु भएका युवकको पहिचान खुलेको छ ।
मृत्यु हुनेमा बाराको परवानीपुर गाउँपालिका–५ बहुअरी स्थायी घर भई हाल वीरगंज महानगरपालिका–१० मा डेरामा बस्दै आएका करिब २२ वर्षीय शिवम साह कानु (गोल्डेन) रहेका छन्। मृतक कानु पेशाले ई–रिक्सा चालक थिए।
मंगलबार राति करिब १२ बजे माईस्थान–गीता मन्दिर जाने बाटोमा मेलामा घुमिरहेका युवाहरूबीच विवाद भई कुटाकुट भएको थियो। सो क्रममा कानुलाई बाँसले प्रहार गरिएको प्रहरीले जनाएको छ। गम्भीर घाइते भएका उनलाई उपचारका लागि नारायणी अस्पताल लैजाँदै गर्दा बाटोमै मृत्यु भएको हो।
उक्त घटनामा संलग्न रहेको आशंकामा प्रहरीले १० जनालाई नियन्त्रणमा लिएको छ। पर्सा प्रहरी प्रमुख प्रहरी उपरीक्षक (एसपी) सुदीपराज पाठकले घटनामा संलग्न व्यक्तिहरूको अनुसन्धान भइरहेको जानकारी दिए। उनका अनुसार, यो ‘ग्याङ फाइट’ नभई एक व्यक्तिलाई लक्षित गरेर गरिएको आक्रमण भएको प्रारम्भिक अनुसन्धानबाट देखिएको छ।
“घटना नशा सुरुमा भएको देखिन्छ । घटनाको मुख्य आरोपित पत्ता लागिसकेको छ र उनीविरुद्ध आवश्यक प्रमाण पनि फेला परिसकेका छन्,” एसपी पाठकले बताए।
मृतक कानुको शव पोस्टमार्टमका लागि नारायणी अस्पतालमा राखिएको छ ।
