सेढवा । प्रतिनिधिसभा निर्वाचन नजिकिँदै गर्दा पर्सा निर्वाचन क्षेत्र नम्बर–४ मा जनता समाजवादी पार्टी (जसपा) का उम्मेदवार डा. कृपासिन्धु चौधरीले आफ्नो घरदैलो अभियान तीव्र बनाएका छन्। उनले मतदाताको घरदैलोमा पुग्दै शिक्षा, स्वास्थ्य, कृषि, रोजगारी, भौतिक पूर्वाधार र पर्यटनलाई क्षेत्रीय विकासको मुख्य आधारका रूपमा अघि सारेका छन्।
सो अवसरमा डा. चौधरीले जिराभवानी गाउँपालिका–५ अन्तर्गत शंकरसरैया, हरैया र सखुवनीयाका मतदातासँग भेटघाट गरी समर्थन मागेका थिए। साथै, ठोरी गाउँपालिकाको विजय बस्ती, निर्मलबस्ती, ब्रह्मानगर र शिकारीबास क्षेत्रमा समेत घरदैलो कार्यक्रम सम्पन्न गरिएको छ।
उम्मेदवार डा. चौधरीले सार्वजनिक गरेको चुनावी घोषणापत्र अनुसार शिक्षा क्षेत्रलाई पहिलो प्राथमिकतामा राखिएको छ। यसमा सामुदायिक विद्यालय र उच्च शिक्षाको गुणस्तर सुधार, SEE नतिजा अभिवृद्धि, गणित, विज्ञान, अंग्रेजी र कम्प्युटर शिक्षामा सुधार ल्याउने योजना समावेश गरिएको छ। साथै, Education with Skill अवधारणाअनुसार CTEVT मार्फत सीपमूलक, प्राविधिक र व्यावसायिक तालिम सञ्चालन गरी युवालाई आत्मनिर्भर बनाउने प्रतिबद्धता पनि गरिएको छ।
स्वास्थ्यतर्फ, आधारभूत स्वास्थ्य सेवाको पहुँच विस्तार, स्थानीय स्वास्थ्य संस्थाको सुदृढीकरण, मातृ–शिशु स्वास्थ्यमा सुधार र विपन्न नागरिकलाई लक्षित कार्यक्रम सञ्चालन गर्ने योजना घोषणापत्रमा उल्लेख छ।
कृषि क्षेत्रमा आधुनिक प्रविधिको प्रयोग, सिँचाइ सुविधा विस्तार, किसानलाई अनुदान र सहुलियत ऋण उपलब्ध गराउने र कृषि उत्पादनको बजार सुनिश्चित गर्ने नीति पनि समावेश गरिएको छ। रोजगारी सृजनाका लागि सीप विकास, स्वरोजगार प्रवर्द्धन र वैदेशिक रोजगारीबाट फर्किएका युवाको पुनःस्थापनालाई प्राथमिकता दिइएको छ।
यसैगरी, सडक, पुल, खानेपानी, विद्युत् र सञ्चार जस्ता भौतिक पूर्वाधार विकाससँगै पर्यटन प्रवर्द्धन मार्फत स्थानीय अर्थतन्त्र सुदृढ बनाउने लक्ष्य डा. चौधरीले घोषणापत्रमा उल्लेख गरेका छन्। उनले समावेशी विकास, सामाजिक न्याय र समान अवसर सुनिश्चित गर्दै पर्सा–४ को समग्र विकासमा प्रतिबद्धता व्यक्त गरेका छन्।
