वीरगंज । पर्सा निर्वाचन क्षेत्र नं. ३ अन्तर्गत पकहाँ मैनपुर गाउँपालिका वडा नं. ३ मा नेकपा (एमाले) वडा कमिटीको कार्यालय सञ्चालनमा आएको छ। एक कार्यक्रमका बीच एमाले पर्सा क्षेत्र नं. ३ का प्रतिनिधिसभा सदस्य उम्मेदवार रुपेश पाण्डेले कार्यालय उद्घाटन गरेका हुन्।
कार्यालय उद्घाटन गर्दै उम्मेदवार पाण्डेले क्षेत्र नं. ३ को विकासका लागि परिवर्तन आवश्यक रहेको उल्लेख गरे । उनले आफू नेता नभई सेवकको भूमिकामा काम गर्न आएको बताउँदै भने, “म तपाईंहरूको नेता होइन, सेवक बन्न आएको हुँ। एकचोटि मौका दिनुहोस्, म गरेर देखाउँछु।”
पाण्डेले भाषणभन्दा कामलाई प्राथमिकता दिने प्रतिबद्धता व्यक्त गर्दै अवसर पाए क्षेत्रको मुहार फेर्ने दाबी गरे । देशको समग्र विकासका लागि सुशासन अपरिहार्य रहेको बताउँदै उनले सुशासन कायम राख्दै शिक्षा, स्वास्थ्य, कृषि लगायत सबै क्षेत्रको विकासमा ध्यान केन्द्रित गर्ने प्रतिवद्धता जनाए ।
कार्यक्रममा पकहाँ मैनपुर गाउँपालिकाका पूर्व अध्यक्ष विजय चौरसिया, नेता शिव पटेल, बिन्धान्चल ठाकुर, रामबाबु चौरसिया, तेजप्रकाश निषाद, राजकिशोर साह तेली, नवल पटेल, मोटर कुमार, जानमहमद आलम लगायतको उपस्थिति रहेको थियो।
