सेढवा । पर्साको ठोरी गाउँपालिका–३ अन्तर्गत पर्ने शिकारीबास गाउँमा फागुन २१ गते हुने प्रतिनिधिसभा निर्वाचन नजिकिँदै गर्दा आजसम्म कुनै पनि राजनीतिक दलका उम्मेदवार मत माग्न नपुगेको भन्दै स्थानीय बासिन्दाले गुनासो गरेका छन्।
देशभर निर्वाचनलाई लक्षित गर्दै चुनावी प्रचार–प्रसार, घरदैलो अभियान, पार्टीका झन्डा, पोस्टर र ब्यानरले माहोल तातेको देखिए पनि शिकारीबासमा त्यस्तो गतिविधि देखिएको छैन। वीरगञ्ज–ठोरी हुलाकी राजमार्गबाट करिब सात किलोमिटर जंगलभित्र अवस्थित यस गाउँमा उम्मेदवार नआएको स्थानीय प्रेम महतोले बताए।
वर्षौंदेखि विभिन्न समस्यासँग जुझ्दै आएको यस गाउँका बासिन्दाले चुनावको बेला आफ्ना पीडा र आवश्यकताहरू उम्मेदवारहरूलाई सुनाउने अवसर गुमाएको गुनासो गरे। “नेताहरू चुनावमा वाचा गरेर जान्छन्, जितेपछि अर्को चुनावसम्म फर्केर हेर्दैनन्,” स्थानीयले बताए। यद्यपि समस्या सुनाउँदा केही समाधान हुने आशा अझै बाँकी रहेको महतोले बताए।
गाउँमा सडकको अभाव, जंगली जनावरको आक्रमण, बेरोजगारी मुख्य चुनौतीका रूपमा रहेका छन्। किसानहरूले उत्पादन गरेका बालीनाली जंगली जनावरले नष्ट गर्ने गरेको र बासिन्दा जोखिमपूर्ण जीवन बिताउन बाध्य भएको जनाइएको छ।
स्थानीय स्रोतका अनुसार संघीयता कार्यान्वयनपछि केही समस्या आंशिक रूपमा समाधान भएका छन्। प्राथमिक उपचारका लागि स्वास्थ्य इकाइ स्थापना, खानेपानीका लागि बोरिङ, सोलार प्लान्टमार्फत विद्युत् सुविधा, निःशुल्क वाइफाइ, र नदी नियन्त्रण परियोजना जस्ता पहल भए पनि ती पर्याप्त नभएको स्थानीयले बताए।
शिकारीबासमा ५५ घरधुरी छन्, जसमा आदिवासी थारु समुदायको बाहुल्यता छ। कुल जनसंख्या करिब २६० रहेको छ भने करिब १४० मतदाता छन्। बासिन्दामध्ये एक जना प्रहरी सेवा, एक जना शिक्षण पेशामा कार्यरत छन्। चार जना करार सेवामा छन् भने दुई जना वैदेशिक रोजगारीमा छन्। बाँकी अधिकांश स्थानीय खेतीपातीमा निर्भर छन्।
स्थानीयका अनुसार उम्मेदवारले गाउँको वास्तविक समस्या बुझेर समाधानतर्फ ध्यान नदिँदा मतदाता बीचमा असन्तोष बढ्दै गएको छ।
