वीरगंज । पर्साको कालिकामाई गाउँपालिका–५ बिरन्चीवरवामा पाँच दिने ऐतिहासिक भवानी मेला भवानीको मूर्ति बिसर्जनसँगै विधिवत रूपमा सम्पन्न गरिएको छ।

वडाध्यक्ष जयनारायण पटेलले बिहान माता भवानीको पूजापाठ गरेपछि बाजागाजासहित सयौँ स्थानीयवासीहरूको सहभागितामा गाउँ परिक्रमा गरी गंगोल खोलामा मूर्ति बिसर्जन भएको हो ।

करिब सय वर्षअघि शुरू भएको यो मेला प्रत्येक वर्ष दशमीको दिन “धोबिन चरा” उडाएर उद्घाटन गर्ने परम्परासँग जोडिएको छ। स्थानीय विश्वासअनुसार, धोबिन चरा देखिएपछि वर्षभरको यात्रा सफल र शुभ हुने मान्यता रहिआएको छ।

यस वर्ष पनि सोही परम्परा अनुसार पर्सा क्षेत्र नं. ४ (ख) का प्रदेश सांसद तथा पूर्वमन्त्री सिंशासन साह कलवार र कालिकामाई गाउँपालिकाका अध्यक्ष बशिष्ठ गुप्ताले संयुक्त रूपमा धोबिन चरा उडाउँदै मेलाको उद्घाटन गरेका थिए।

मेलामा पर्सा सहित भारतको बिहार राज्यका पूर्वी र पश्चिमी चम्पारण क्षेत्रबाट हजारौं श्रद्धालु भक्तजनहरू सहभागी भएका थिए। मेलामा नाचगान, नृत्य प्रदर्शन तथा विभिन्न धामीझाँक्रीका सांस्कृतिक प्रस्तुति पनि देखाइएको थियो।

वडाध्यक्ष पटेलका अनुसार, सदियौँदेखि चलिआएको धार्मिक, सांस्कृतिक परम्पराको संरक्षणका लागि मेलाको आयोजना हरेक वर्ष गरिँदै आएको हो। यस वर्ष पूर्णिमाको दिन मंगलबार परेको र सो दिन मूर्ति बिसर्जन नगर्ने परम्परा भएकाले आज (बुधबार) बिसर्जन गरी मेला सम्पन्न गरिएको भवानी मन्दिरका पुजारी राजेश तिवारीले जानकारी दिए ।

पोखरिया । पर्साकाे पोखरिया नगरपालिका वडा नम्बर ५, सतवरियास्थित दलित बस्तीका ७५ जना बाढी पीड़ित परिवारलाई राहत सामग्री वितरण गरिएको छ । वितरण गरिएको सामग्रीमा चामल, दाल, नून, तेल, प्याज, आलु, सोयाबिन, तरकारी, मसला र त्रिपाल समावेश छन्।

अविरल वर्षाका कारण बस्ती पूर्ण रूपमा डुबानमा परेका थिए र जनजीवन अत्यन्त कष्टकर बनेको थियो । बाढी पीड़ितहरू खुलेआकाश मुनि रात कटाइरहेका थिए । पोखरिया नगरपालिकाका प्रमुख प्रद्युमन प्रसाद चौहानले पीड़ितहरूलाई कुनै पनि असुविधा वा आवश्यकतामा नगरपालिकाले सहयोग गर्ने प्रतिबद्धता जनाएका छन् ।

राहत वितरणमा प्रमुख प्रशासकीय अधिकृत रामविनय कुमार सिंह, वडा नम्बर ५ का वडाध्यक्ष महेन्द्र महतो, वडा सदस्य पन्नालाल, नगरपालिकाका प्रशासन शाखा प्रमुख संजय कुमार पाण्डेय, विपद् व्यवस्थापन शाखा प्रमुख राजेश पटेललगायत सहभागी थिए।