वीरगंज । पर्सा जिल्लाको निर्वाचन क्षेत्र नम्बर–३ मा यसपटकको प्रतिनिधिसभा निर्वाचनले पुरानो राजनीतिक धरातललाई चुनौती दिने संकेत देखिएको छ। लामो समयदेखि सक्रिय राजनीतिमा रहेका नेपाली काँग्रेसका उम्मेदवार सुरेन्द्र चौधरी विरुद्ध जनअसन्तुष्टि बढ्दै गएको चर्चा चलिरहँदा परिवर्तनको पक्षमा माहोल बनेको स्थानीय स्तरमा आँकलन गरिएको छ।

फागुन २१ गते हुने निर्वाचनमा नेकपा एमालेका युवा उम्मेदवार रूपेश कुमार पाण्डेप्रति मतदाताको आकर्षण बढ्दो रहेको बताइन्छ। घरदैलो अभियान, टोल–टोल भेटघाट तथा जनसंवाद कार्यक्रममा पाण्डेको सक्रियताले मतदातामाझ सकारात्मक सन्देश प्रवाह गरेको समर्थकहरूको भनाइ छ।

स्थानीय मतदाताहरूले विगतमा पटक–पटक सांसद र मन्त्री हुँदा पनि अपेक्षित क्षेत्रीय विकास हुन नसकेको विषय उठाउँदै नेतृत्वको कार्यशैलीमा परिवर्तन आवश्यक रहेको धारणा व्यक्त गर्ने गरेका छन्। पटेर्वा सुगौलीका एक मतदाताले भने, “भाषणभन्दा काम र परिणाम जनताको प्राथमिकता हो।”

यता रूपेश कुमार पाण्डेले रोजगारी, सुशासन, पारदर्शिता तथा स्थानीय पूर्वाधार विकासलाई आफ्नो मुख्य एजेन्डा बनाउँदै आएका छन्। विभिन्न स्थानमा उनलाई खादा र टीका लगाएर स्वागत गरिएको तथा अग्रिम शुभकामना दिइएको दृश्यहरू पनि देखिएका छन्।

यस क्षेत्रमा नेकपा (एकीकृत समाजवादी) का छोटेलाल यादव र राष्ट्रिय स्वतन्त्र पार्टीका रमाकान्त चौरसिया पनि प्रतिस्पर्धामा छन्। यद्यपि समग्र राजनीतिक समीकरण हेर्दा मुख्य प्रतिस्पर्धा एमाले र काँग्रेसबीच केन्द्रित रहेको विश्लेषण भइरहेको छ।

पर्सा–३ मा यसपटकको निर्वाचन केवल दलगत प्रतिस्पर्धा नभई पुस्तान्तरण, कार्यशैली र विकासका मुद्दासँग जोडिएको रूपमा हेरिएको छ। मतदाताहरूले वाचा भन्दा परिणाम र भाषणभन्दा कामलाई प्राथमिकता दिने संकेत दिएका छन्।

वीरगंज । पर्सा जिल्लाको बहुदरमाई नगरपालिका वडा नं. ४ मा जनता समाजवादी पार्टी (जसपा) प्रति आकर्षण बढ्दै गएको देखिएको छ। पर्सा निर्वाचन क्षेत्र नं. २ अन्तर्गत पर्ने उक्त वडामा विभिन्न दल परित्याग गरी सयौं जना युवा, बुद्धिजीवी तथा स्थानीय अगुवाहरू जसपामा प्रवेश गरेका छन्। सामूहिक रूपमा आयोजित प्रवेश कार्यक्रमले क्षेत्रमा जसपाको चुनावी अभियानलाई नयाँ ऊर्जा दिएको पार्टीले जनाएको छ।

नवप्रवेशीहरूलाई स्वागत गर्न आयोजित कार्यक्रममा पर्सा क्षेत्र नं. २ का प्रतिनिधिसभा सदस्य उम्मेदवार अशोक टेमानी, जसपाकी नेतृ करिमा बेगम, पार्टी नेता सन्तोष तिवारी तथा वडा नं. २५ का वडाध्यक्ष आशुतोष चतुर्वेदी लगायतको उपस्थिति रहेको थियो। नेताहरूले अबिर, टीका र फूलमाला लगाएर नवप्रवेशीहरूलाई पार्टीमा स्वागत गरेका थिए। कार्यक्रममा देखिएको उत्साहले जसपाप्रति स्थानीय तहमा बढ्दो विश्वास झल्काएको सहभागीहरूको भनाइ थियो।

उक्त अवसरमा सोही स्थानमा जसपाको नयाँ पार्टी कार्यालयसमेत सञ्चालनमा ल्याइएको छ। कार्यालयको उद्घाटन प्रमुख अतिथिका रूपमा रहेका उम्मेदवार अशोक टेमानीले गरेका थिए। स्थानीय स्तरमै पार्टी कार्यालय सञ्चालनमा आएपछि संगठन सुदृढीकरण, जनसम्पर्क विस्तार तथा चुनावी गतिविधि सञ्चालनमा सहजता आउने अपेक्षा गरिएको छ।

कार्यक्रममा बोल्दै नवप्रवेशीहरूले जसपालाई विकास र परिवर्तनको आशा बोकेको शक्ति भएको धारणा व्यक्त गरे। विगतमा विभिन्न दलका उम्मेदवारलाई निर्वाचित गराउँदा अपेक्षित विकास हुन नसकेको अनुभव सुनाउँदै उनीहरूले यसपटक जनचासो र आवश्यकता नजिकबाट बुझेका उम्मेदवारलाई साथ दिने बताएका छन्।

उम्मेदवार टेमानीले उपस्थित सबैलाई धन्यवाद दिँदै क्षेत्रको विकास, सुशासन र जनसेवामुखी राजनीति आफ्नो प्राथमिकता रहेको बताए। स्थानीय युवाशक्ति र बुद्धिजीवीहरूको साथले चुनावी अभियान थप मजबुत बन्ने विश्वास उनले व्यक्त गरे।

बहुदरमाई–४ मा भएको यस सामूहिक प्रवेश कार्यक्रमलाई जसपाको चुनावी रणनीतिका दृष्टिले महत्वपूर्ण कदमका रूपमा हेरिएको छ। स्थानीय तहमा पार्टी संरचना मजबुत बनाउँदै मतदातासँग प्रत्यक्ष सम्पर्क विस्तार गर्ने उद्देश्यले यस्ता कार्यक्रमलाई निरन्तरता दिने तयारी पार्टीले जनाएको छ।

वीरगंज । पर्सा निर्वाचन क्षेत्र नम्बर–३ मा प्रतिनिधि सभा सदस्यका युवा उम्मेदवार रुपेश कुमार पाण्डेले आफ्नो चुनावी अभियान तीव्र बनाएका छन्। फागुन २१ गते हुने प्रतिनिधिसभा निर्वाचन लक्षित गर्दै पाण्डेको घरदैलो, जनदर्शन र मतदाता भेटघाट कार्यक्रमले स्थानीय समुदायबाट व्यापक समर्थन जुटाइरहेका छन्।

“गयो दिन भाषणको, अब परिणाम चाहियो” भन्ने स्थानीय जनआवाजलाई आत्मसात गर्दै पाण्डेले विकास, सुशासन र जवाफदेहिताको एजेन्डा सहित मतदातासँग प्रत्यक्ष संवाद गरेका छन्। आम नागरिकले खोक्रा आश्वासन होइन, काम गर्ने नेतृत्व खोजिरहेको सन्देश घरदैलो कार्यक्रममार्फत प्रष्ट देखिएको छ। युवापुस्ताको भरोसा र अग्रजहरूको आशीर्वादले पाण्डेको उम्मेदवारी थप मजबुत बन्दै गएको छ।

बुधबार पकहाँमैनपुर गाउँपालिकामा सम्पन्न घरदैलो तथा जनता दर्शन कार्यक्रममा एमालेका नेता तथा कार्यकर्तासहित स्थानीय बासिन्दाहरूको उल्लेखनीय सहभागिता देखियो। कार्यक्रममा नेकपा (एमाले) का केन्द्रीय सदस्य प्रभु हजरा, निर्मला देवकोटा, सल्लाहकार परिषद् सदस्य शिव पटेल, संविधानसभा सदस्य प्रधुमन चौहान, अखिल नेपाल पिछडावर्ग (ओबिसी) महासंघ अध्यक्ष तेजप्रकाश निषाद, उपाध्यक्ष तथा युवा नेता अकलेश कुमार साह, पालिका इन्चार्ज विजय चौरसिया लगायत नेताहरूको सक्रिय उपस्थिति रहेको थियो।

कार्यक्रममा स्थानीयले क्षेत्रको विकास, रोजगारी, शिक्षा, स्वास्थ्य र पूर्वाधार निर्माणमा ठोस पहल गर्नुपर्ने माग राख्दै पाण्डेप्रति आफ्नो विश्वास व्यक्त गरे। यसरी जनसमर्थन बढ्दै जाँदा पर्सा–३ मा परिवर्तनको संकेत स्पष्ट भएको छ।

सेढवा । पर्सा ठोरी गाउँपालिका–३ अन्तर्गत दुर्गम बस्ती शिकारीबासमा पहिलाे पटक मत माग्न उम्मेदवार पुगेका छन् । जनता समाजवादी पार्टी (जसपा) का उम्मेदवार डा. कृपासिन्धु चौधरीले पहिलोपटक शिकारीबासमा मत माग्दै घरदैलो कार्यक्रम सञ्चालन गरेका हुन्।

उम्मेदवार चौधरीले शिक्षा, स्वास्थ्य, कृषि, रोजगारी, भौतिक पूर्वाधार र पर्यटनलाई विकासको मुख्य आधार बनाउँदै आफ्नो चुनावी प्रतिबद्धता स्थानीय बासिन्दासमक्ष प्रस्तुत गरेका थिए । घरदैलोका क्रममा उनले प्रत्यक्ष संवाद गर्दै शिकारीबासका समस्याबारे जानकारी लिएका र मतदातासँग समर्थन मागेका छन् ।

स्थानीय सालिराम दिस्वाका अनुसार चौधरीले आफू निर्वाचित भए दुर्गम बस्तीका दीर्घकालीन समस्याको समाधानमा पहल गर्ने प्रतिबद्धता जनाएका छन्।

शिकारीबास पर्सा राष्ट्रिय निकुञ्ज र चितवन राष्ट्रिय निकुञ्जको दोसाँधमा अवस्थित छ । दुर्गम अवस्थिति र आधारभूत पूर्वाधारको अभावका कारण यहाँका बासिन्दाले वर्षौंदेखि विभिन्न चुनौती झेल्दै आएका छन् । गाउँमा व्यवस्थित सडकको अभाव, जंगली जनावरको आक्रमणबाट धनजनको क्षति, उत्पादन भएका बालीको नष्ट हुनु, असुरक्षित बसोबास, र बेरोजगारी मुख्य समस्या रहेका छन् ।

शिकारीबासमा ५५ घरधुरी रहेका छन्, जहाँ आदिवासी थारु समुदायको बाहुल्य छ । गाउँको कुल जनसंख्या करिब २६० रहेको र मतदाता संख्या करिब १४० जनाभन्दा बढी रहेको जनाइएको छ ।

वीरगंज । पर्सा क्षेत्र नं. २ का प्रतिनिधिसभा सदस्य पदका उम्मेदवार अशोक टेमानीले पर्सागढी नगरपालिका वडा नं. ७ मा घरदैलो अभियानलाई सशक्त बनाउँदै स्थानीय मतदातासँग प्रत्यक्ष संवाद गरेका छन् । जनता समाजवादी पार्टी (जसपा)का उम्मेदवार टेमानीले बुधबार फुलवरिया टोलमा पुगेका थिए।

उम्मेदवार टेमानीले घर–घरमा पुगेर मतदातासँग दैनिक जीवनसँग सम्बन्धित समस्या र अपेक्षा सुनेका थिए। स्थानीय बासिन्दाले खानेपानी, शिक्षा, स्वास्थ्य र कृषि क्षेत्रका चुनौती मुख्य रहेको गुनासो गरेका थिए। ग्रामीण भेगमा पर्ने पर्सागढीमा आधारभूत सेवा अभाव हुँदा जनजीवन प्रभावित भइरहेको जनाइएको छ।

स्थानीयले शुद्ध खानेपानीको अभाव, बिग्रिएका धारा, सीमित आपूर्ति, विद्यालयमा पर्याप्त शिक्षक र संरचना नहुँदा बालबालिकाको पढाइमा समस्या, स्वास्थ्य चौकीमा आवश्यक औषधि र दक्ष जनशक्तिको कमी, साथै कृषि क्षेत्रमा मल–बीउको अभाव र बजार नपाउनु मुख्य चुनौती भएको बताएका छन्।

सुनुवाइपछि टेमानीले निर्वाचित भएमा यी क्षेत्रमा प्राथमिकता दिँदै विकास योजनामा जोड दिने प्रतिबद्धता व्यक्त गरे। उनले ग्रामीण क्षेत्रको समग्र विकास बिना क्षेत्रीय समृद्धि सम्भव नभएको र जनताको सुझावलाई आफ्नो चुनावी एजेन्डामा समेट्ने बताए।

घरदैलो अभियानका क्रममा स्थानीयले विकास र रोजगारी सिर्जनामा विशेष ध्यान दिन आग्रह गरेका छन्। अभियानले गाउँ–गाउँमा राजनीतिक गतिविधि सक्रिय बनेको र चुनावी माहोल तताएको छ।