वीरगंज । नेपाल कम्युनिस्ट पार्टी (एमाले)को दशौं केन्द्रीय कमिटी बैठकमा पर्साबाट निर्वाचित केन्द्रीय सदस्य अरविन्द सिंहले पार्टी नेतृत्व र हालको कार्यनीतिप्रति कडा असन्तुष्टि जनाउँदै १० वटा ठोस प्रश्न र सुझावहरू प्रस्तुत गरेका छन् ।
सिंहले पार्टीको राजनीतिक दिशा, निर्णय प्रक्रिया र नेतृत्व शैलीप्रति प्रश्न उठाउँदै पार्टीलाई “वस्तुनिष्ठ मूल्यांकन र संस्थागत अनुशासनतर्फ फर्कन” आग्रह गरेका छन् ।
भदौ २२ गते प्रस्तुत गरिएको ‘जस्तोसुकै चुनौतीको सामना गर्ने रेजिलिएन्ट दृढ अवस्था’ शीर्षकको राजनीतिक प्रतिवेदन २४ घण्टामै असफल भएको दाबी गर्दै उनले भने, “फेल भएको कार्यनीति बोकेर हामी आगामी पाँच वर्ष कसरी अघि बढ्ने?”
“नरसंहारको आरोपबाट सतही विश्लेषणले उन्मुक्ति मिल्दैन”
सिंहले भदौ २३ गतेको घटनालाई लिएर पार्टी र राज्य दुवैको भूमिकामाथि प्रश्न उठाउँदै त्यसबारे तथ्यपरक समीक्षा आवश्यक भएको बताए । उनले घटनालाई विदेशी षड्यन्त्रको आवरणमा ढाकछोप गर्ने प्रवृत्तिको पनि आलोचना गर्दै भने, “आफ्नो अकर्मण्यता लुकाउने नाममा घटनालाई षड्यन्त्रमा ढाल्नु फेरि पनि सतही समीक्षा मात्र हो ।”
“भ्रष्टाचारका आरोपमा नेतामाथि कारबाही किन छैन?”
डेढ दर्जनभन्दा बढी भ्रष्टाचार र व्यभिचारका आरोपमा संलग्न भनिएका नेतामाथि कारबाही नहुने अवस्थाप्रति असन्तुष्टि जनाउँदै उनले प्रश्न गरे, “पार्टीले यस विषयमा संस्थागत रूपमा कहिले बोल्ने? कि अब पनि मौन बस्ने?”
सिंहका अनुसार जनताको आक्रोश अहिले पार्टी भन्दा पनि अध्यक्ष र उनको वरिपरि घुम्ने सानो समूहमाथि केन्द्रित छ । “यो यथार्थ आत्मसात् गर्दै जिम्मेवारी हस्तान्तरण गर्नु नै पार्टीको भविष्य जोगाउने उपाय हो,” उनले भने ।
“सडकमा आएका युवा र विद्यार्थी जनआवाज हुन्”
सरकारविरुद्धको नागरिक आन्दोलनलाई प्रतिक्रान्तीका रूपमा व्याख्या गर्नु गलत भएको बताउँदै उनले भने, “कुशासन र भ्रष्टाचारविरुद्ध उठेका आवाजलाई प्रतिगमन भन्न मिल्दैन । पार्टीले यसबारे वस्तुनिष्ठ समीक्षा गर्नुपर्छ ।”
अनेरास्ववियुमा देखिएको अस्थिरता र नेतृत्व संकटलाई उदाहरण दिँदै उनले जनसंगठनहरूको कमजोर व्यवस्थापनप्रति पनि चिन्ता व्यक्त गरे ।
“दुई पटक संसद विघटनपछि पुनर्स्थापनाको माग हास्यास्पद”
सिंहले पार्टीले आफैं दुई पटक संसद विघटन गरेपछि पुनर्स्थापनाको माग गर्दै सडक आन्दोलनमा उत्रनु “घृणा र हासोको पात्र बन्ने काम” भएको टिप्पणी गरे । उनले भने, “चुनाव बहिष्कार नीति अर्को भिडन्त निम्त्याउने योजना हो, कमजोरी सच्याउँदै चुनावमा जानु नै एक मात्र विकल्प हो ।”
पूर्वराष्ट्रपति विद्या भण्डारीको पार्टी सदस्यता नवीकरण गरी सक्रिय रूपमा संलग्न गराउनुपर्ने सुझाव पनि उनले दिएका छन् ।
सिंहका ती प्रश्न र सुझावहरूले एमालेभित्र आत्मसमीक्षा, नेतृत्व परिवर्तन र आन्तरिक लोकतन्त्रबारे नयाँ बहसलाई गति दिएको राजनीतिक विश्लेषकहरूको टिप्पणी छ ।
