पर्सा, १४ कात्तिक ।
कालिकामाई गाउँपालिकाको वोर्ड बैठकमा भएको हातपातको विवाद समाधान भएको छ । विरन्चीबर्वामा आज बसेको बैठकमा दुवै पक्ष विच मेलमिलाप भए पछि विवाद समाधान भएको हो । वडा नं. १, मुडलीका अध्यक्ष शिवनाथ राउत कुर्मी र वडा नं. ३, हरिहरपुरका अध्यक्ष संजय पटेलले बैठकमा हातमिलाउदै आफुहरु विच भएको विवाद समाधान भएको घोषणा गरेका हुन । अब एक आपसमा मिली वडा र गाउँपालिकाको विकासमा लाग्ने वडा अध्यक्षहरुले वताएका छन ।

कालिकामाई गाउँपालिकाको वडा नं. ५ विरन्चीबर्वामा भएको बैठकमा गाउँपालिका उपाध्यक्ष राजेश प्रसाद चौरसिया, राजेन्द्र प्रसाद कुर्मी, जयनारायण कुर्मी, रामनाथ कुशवाहा, पर्वत ठाकुर, ताजिन्द्र साह, पत्रकार छठु साह, प्रमुख प्रशासकिय अधिकृत देवनाथ साह, इलाका प्रहरी कार्यालयका प्रहरी सहायक निरिक्षक सुकेशवर महतो लगायतको सहभागिता रहेको थियो ।

वीरगंज, १४ कात्तिक ।
जिल्ला प्रहरी कार्यालय पर्सा तथा लागु औसध न्युनिकरण व्युरो शाखा कार्यालय बिरगंज पर्साबाट खटिएको टोलिले मंगलबार लागू औसध ईन्जेक्सन सहित २ जना युवकलाई पक्राउ गरेको छ ।

बिहान करिब ९:०० बजे बिरगंज १६ रजतजयन्ति चौक सडकमा विभिन्न सवारी साधन तथा पैदल यात्री समेतको चेक जाच गर्ने क्रममा भारत रक्सोल तर्फबाट बिरगंज तर्फ पैदल हिडि आउदै गरेको क्रममा पक्राउ गरिएको जिल्ला प्रहरी कार्यालयले जनाएको छ ।

पक्राउ पर्ने जिल्ला काभ्रे भकुण्डेवेशि न,पा,वडा न,३ बस्ने दोर्जे लामाको छोरा बर्ष २६ को बुद्ध लामा र जिल्ला पाचथर फिदिम न,पा,वडा न,५ घर भैइ हाल का,म,न,पा,वाड न,१५ मा डेरा गरि बस्ने पुर्ण बहादुर बुढाथोकीको छोरा बर्ष २८ को कुमार बुढाथोकी रहेको प्रहरीले जनएको छ ।

निजहरुको साथ बाट लागू औसध ईन्जेक्सन डाईजेलयाव १०० पिस,फनारेगन १०० पिस,र नर्फिन १०० पिस समेत फेला परेकोले सो लागू औसध सहित उनिहरुलाई नियन्त्रणमा लिईमुद्दा दर्ता गरि थप अनुसन्धान भैइ रहेको जिल्ला प्रहरी कार्यालय पर्साले प्रेस बिज्ञप्ति मार्फत जानकारी गराएको छ ।

बारा, १३ कात्तिक । बाराको कलैया उपमहानगरपालिका २३ का ६५ बर्षीय नन्दलाल राउत कुर्मीको हत्यामा संलग्न भएको अभियोगमा चार जना पक्राउ परेका छन् ।

उनको शनिबार राति धारिलो हतियारले घाँटी रेटेर हत्या भएको थियो । हत्याका मुख्य योजनाकार भएको अभियोगमा छिमेकी ४५ बषर्ीय वीरेन्द्र पटेल र साबिक अमृतगञ्ज गाबिस ९ का ५५ बर्षीय राम अयोध्या दास तत्मालाई प्रहरीले पक्राउ गरेको छ ।

त्यस्तै हत्यामा सहयोगीको भूमिका खेलेका कलैया २३ का १९ बर्षीय विशाल पटेल र ६५ बर्षीय बैजनाथ राउत कुर्मी पनि पक्राउ परेका छन् । विशाल वीरेन्द्र पटेलका छोरा हुन् ।

कर्तव्य ज्यान मुद्दामा जिल्ला अदालतबाट म्याद थप गरी अनुसन्धान भइरहेकोे बाराका प्रहरी प्रमुख एसपी सानुराम भट्टरार्इले जानकारी दिए । घटनामा संलग्न अन्य फरार रहेका अभियुक्तहरुको खोजी भइरहेको उनले बताए ।

किन भयो हत्या ?

मृतक नन्दलालका छोराछोरी छैनन् । दुई दाजुभाइ मध्ये उनी जेठा हुन् । कान्छो भाइ अम्बिका राउत कुर्मीको एक मात्र छोरा थिए । तीन छोरीका बाबु उनी करिव १०/१२ बर्षदेखि बेपत्ता छन् ।

त्यसैले यो परिवार सगोलमै चलेको छ । उनीहरुको प्रशस्त जायजेथा छ । नन्दलालको महंगो मुल्यमा बिक्री हुनसक्ने करिब २ बिगाह जमिनमा माछापालन गर्न भन्दै अभियुक्त वीरेन्द्र पटेलले पोखरी बनाइरहेका छन् ।

वीरेन्द्रले पोखरी खनेको ज्याला र अनुदानमा आएको पैसा नन्दलालसँग माग गरे । तर नन्दलालले अनुदानको पैसा चलाउन नदिने भनेपछि विवाद सुरु भएको थियो ।

‘नन्दलालको पोखरी खनिरहेको जनिम महँगो मुल्यमा बिक्री हुने खालको रहेछ, उनको भाइ पनि सोझा भएकाले सम्पत्तिकै लोभमा हत्या भएको हुनसक्छ’ बाराका प्रहरी प्रवक्ता नायब उपरिक्षक रञ्जीत सिँह राठौरले भने, ‘माछापालनका लागि अनुदानमा आएको पैसामा पनि वीरेन्द्रले आँखा गाडेको हुनसक्ने देखिन्छ । नन्दलालको हत्या गरेपछि पोखरीमा एकलौटी माछापालन गर्ने योजना वीरेन्द्रले बुनेको देखिन्छ ।’

हत्या गर्नुअघि वीरेन्द्रले नन्दलालको परिवारसँग नाता जोड्ने प्रयास गरेको खुलेको छ । वीरेन्द्रले आफ्नो छोरा विशालसंग नन्दलालका भाइका नातिनीको विवाह गराउन प्रस्ताव राखेका थिए । तर, नन्दलालले अस्वीकार गरे । त्यो रिसिइबी साँध्न पनि हत्या भएको हुन सक्ने प्रहरी अनुसन्धानले देखाएको छ ।

‘पहिलेदेखि नै अम्बिकाकी नातीनीसँग आफ्नो छोराको बिहे गराउन वीरेन्द्रले नन्दलाललाई दबाव दिइरहेका रहेछन् । तर नन्दलालले मानिरहेका थिएनन्’ प्रहरी प्रवक्ता राठौरले भने, ‘नन्दलाललाई सिध्याएर भाइका नातीनीसँग छोराको बिहे गरी सम्पत्ति आफ्नो नाममा बनाउन नन्दलालको हत्या गरिएको देखिन्छ ।’