वीरगंज । राष्ट्रीय बाल दिवसको अवसरमा लिभिङ विथ इन्भायोरन्मेन्टकाे आयाेजनामा शनिबार “ओजन फर लाइभ” बिषयक बक्तृत्वकला प्रतियोगीता सम्पन्न भएकाे छ ।
वीरगंज पब्लिक कलेजको सभाहलमा सम्पन्न प्रतियोगितामा गौतम माध्यामिक बिद्यालयका स्पन्दन चौधरी प्रथम, आन्नद चौधरी द्वितिय र माइस्थान बिद्यापीठकी रुपा गिरी तृतिय भएका हुन् । प्रतियोगितामा बिजयी प्रतियोगीहरुलाई पुरस्कार तथा मेडल प्रदान गरिएको लिभिङ विथ इन्भायाेरन्मेन्टका केन्द्रिय अध्यक्ष अकाश चाैहानले जानकारी दिए ।
संस्थाका फिरोज अन्सारीको अध्यक्षतामा भएको प्रतियोगितामा वीरगंजका बिभिन्न एघार बिद्यालयका बिद्यार्थीले भाग लिएका थिए ।प्रतियोगिहरु आफनो मन्तब्यमा ओजनको अवस्थिति, त्यसको काम, मानव जीवनमा त्यसको महत्व, ओजनको संरक्षणकालागि खेल्नु पर्ने भूमिकाका बिषयमा आफना भनाई राखेका थिए ।
कार्यक्रममा डा. सुष्मा तिवारीले बिद्यार्थीले ओजन तहका बारेमा ब्यक्त गरेका बिचारहरु निकै महत्वपूर्ण रहेको बताइन । उनले प्रतियोगितामा सहभागि सबैलाई धन्यवाद समेत दिइन । उनले भनिन “बिगतलाई स्मरण गर्दै यही उमेरमा आफूहरु यसरी मंचमा चढेर बिचार ब्यक्त गर्न सक्ने भएका थिएनौं उनले भनीन अहिले भाईबहीनीहरुमा ढुक्कसंग बिचारको प्रस्तुती गर्ने कला देखेर म निकै खुशी छु ।”
कार्यक्रममा जनमतका जिल्ला अध्यक्ष ओम प्रकाश सर्राफले कार्यक्रम निकै प्रभावकारी रहेको बताए । उनले प्रकृतिको संरक्षणमा आजको युवा पुस्ताले गहन जिम्मेवारी निर्वाह गर्नु पर्ने बताए ।
कार्यक्रममा राष्ट्रिय भूमि आयोग पर्साका अध्यक्ष तवरेज अहमद, नेपाल पत्रकार महासंघका केन्द्रीय सदसइ के.सी.लामिछाने तथा लिभिङ्ग विथ इन्भायोरेन्मेन्टका केन्द्रीय सचिव देवेश सर्राफले निर्णायकको भूमिका निर्वाह गरेका थिए ।
कार्यक्रमको संचालन आयुष्मा सर्राफले गरेकी थिइन । कार्यक्रममा सहभागी सबै प्रतियोगीलाई सहभागिताको लागि सम्मान सहित प्रमाण पत्र प्रदान गरिएको थियो ।
प्रतियोगितामा खालिद रेजा अन्सारी,आशुतोष चौधरी,योगिशा श्रेष्ठ,मुस्कान बरनवाल,सोनी साह कलवार,आकाश साह लगायतले भाग लिएका थिए ।