वीरगंज । सर्लाहीमा मन्दिरमा तोडफोड गरेको आरोपमा एक युवक पक्राउ परेका छन् । पक्राउ पर्नेमा मलंगवा नगरपालिका–८ का ३३ वर्षीय राकेश बैठा रहेको मधेश प्रदेश प्रहरी कार्यालयका प्रवक्ता प्रहरी उपरिक्षक श्याम कुमार महताेले जानकारी दिए ।
प्रवक्ता महताेका अनुसार मलंगवा नगरपालिका–८ स्थित राजदेवी मन्दिर र मलंगवा नगरपालिका–९ स्थित झिलमिलिया माई मन्दिर भित्र रहेको मूर्ति तोडफोड गरेको आरोपमा बैठालाई पक्राउ गरिएको हो ।
मंगलबार साँझ बैठाले मन्दिर तोडफोड गरेको प्रहरीले जनाएको छ । बैठालाई धर्म सम्बन्धी कसुरमा सर्लाही जिल्ला अदालतबाट पाँच दिन म्याद थप गरेर अनुसन्धान भइरहेकाे मधेश प्रदेश प्रहरी कार्यालय जनकपुरधामले जनाएको छ ।
मुलुकी अपराध संहिता २०७४ को परिच्छेद ९ को धर्म सम्बन्धी कसुरमा धार्मिकस्थल वा पवित्र मानिएको स्थानलाई क्षति पु¥याए धर्म सम्बन्धी कसुरमा अधिकतम पाँच वर्षसम्म कैद र पचास हजार रुपैयाँसम्म जरिवाना हुने व्यवस्था छ ।