वीरगंज । पर्साको सखुवापरसौनी गाउँपालिका–५ स्थित नेपाल राष्ट्रिय माध्यमिक विद्यालय महुवनमा कक्षा ११ शुभारम्भ भएको छ । सो गाउँपालिका र आसपासका विद्यार्थीहरूले आफ्नो घरैबाट १२ कक्षासम्मको शिक्षा हासिल गर्न सकून् भन्ने उद्देश्यले प्लस २ सञ्चालन गरिएको गाउँपालिका अध्यक्ष प्रदिप जयसवालले वताए ।
विद्यालयका प्रधानाध्यापक रामदेवप्रसाद कुर्मीको अध्यक्षतामा बुधबार भएको एक समारोहको बिच कार्यक्रमका प्रमुख अतिथि प्रदेश सांसद मन्जुर अन्सारीले रिबन काटेर कक्षाको औपचारिक सुभारम्भ गरे । गाउँका भद्रभलादमीहरुको सहयोग र गाउँपालिका अध्यक्ष प्रदिप जयसवालको सक्रियतामा महुवनमा प्लस २ संचालन भएको स्थानियहरुले वताएका छन ।
तर कालिकामाई गाउँपालिकाको वडा नं. २ भेडिहारी स्थित रहेको श्री सुकई साह माध्यमिक विद्यालयमा अझै प्लस २ संचालन हुन सकेको छैन । विद्यालयलाई १० प्लस २ बनाउन एक बर्ष पहिला देखी नै मांग हुदै आए पनि अझै सम्म हुन नसकेको हो ।
विद्यालयलाई प्लस २ बनाउन स्थानिय गैर सरकारी संस्था ब्रिलिएन्ट युवा क्लबको अगुवाईमा ज्ञापन पत्र, अन्तरक्रिया, धर्ना, हस्ताक्षर अभियान जस्ता थुप्रै दबाव मुलक कार्यक्रम भए पनि जनप्रतिनिधिरुले सक्रियता नदेखाएका कारण हुन नसकेको गाउँवासीको गुनासो छ । भेडिहारी कै गाउँपालिका अध्यक्ष र उपाध्यक्ष भए पनि प्लस २ संचालन नहुनुले गाउँवासी निराश भएका छन ।