वीरगन्ज, १५ बैशाख ।
पर्साको कालिकामाई गाउँपालिकामा महिला हिंसा तथा दाइजोप्रथा उन्मूलन कार्यक्रम सम्पन्न भएको छ । कालिकामाई गाउँपालिकाको सहयोग र कालिका टाईम्स प्रा.लि. वीरगन्जकोे आयोजनामा संचालित कार्यक्रम सम्पन्न भएको हो । कार्यक्रम अन्तर्गत आइतबार कालिकामाई गाउँपालिकाको वडा नं. २, भेडिहारी स्थित रहेको श्री सुकई साह माध्यमिक विद्यालयमा सांस्कृतिक कार्यक्रम तथा चेतनामूलक नाटक प्रदर्शन भएको थियो ।
जय हनुमान तराई विकास तथा सांस्कृतिक परिषद वीरगंजले महिला हिंसा तथा दाइजो प्रथा सम्बन्धी चेतनामूलक नाटक प्रदर्शन गरेका थिए भने गायक सुनिल पण्डितले सांस्कृतिक कार्यक्रम प्रस्तुत गरेका थिए । यसका साथै श्री सुकई साह मा.वि. भेडिहारी, श्री जनता मा.वि. मुडली र दिव्य कन्या मा.वि. बिरन्चीबर्वाका छात्र/छात्राहरुले गित, नृत्य र चेतनामूलक नाटक प्रदर्शन गरेका थिए । कार्यक्रमका सहभागिहरुले वालविवाह नगर्ने र विवाह गर्दा दाइजो नलिने पनि प्रतिवद्धता जनाएका थिए ।
कालिका टाईम्सका निर्देशक छठु साहको अध्यक्षतामा भएको कार्यक्रममा श्री जनता मा.वि. मुडलीका विद्यालय व्यवस्थापन समिति अध्यक्ष राजिन्द्र प्रसाद कुर्मी, श्री सुकई साह मा.वि. भेडिहारीका विद्यालय व्यवस्थापन समिति अध्यक्ष शिवपुजन साह तेली, नेपाल पत्रकार महासंघ पर्साका उपाध्यक्ष अनुप तिवारी, गाउँ कार्यपालिका सदस्य रामानन्द ठाकुर, गाउँ कार्यपालिका कार्यालयका प्रतिनिधि शतन प्रसाद, वडा नं. १ का वडा सदस्य रामशिष यादव, शिक्षक धुरेन्द्र प्रसाद चौरसिया लगायतकाले मन्तव्य राखेका थिए भने कार्यक्रमको संचालन कालिका टाईम्स डट कमका समाचार सम्पादक शम्भु कुमार सुमनले गरेका थिए । कार्यक्रममा प्रस्तुती राखेका विद्यार्थीहरुलाई पुरस्कार समेत वितरण गरिएको थियो ।
यस अघि बैशाख ५ गते महिला हिंसा तथा दाइजोप्रथा उन्मूलन कार्यक्रम अन्तर्गत नै श्री दिव्य कन्या मा.वि. बिरन्चीबर्वामा महिला हिंसा तथा दाइजोप्रथा विषयक वक्तृत्वकला प्रतियोगिता भएको थियो । जुन प्रतियोगितामा गाउँपालिका अन्तर्गतका सम्पूर्ण माध्यमिक विद्यालयहरुको सहभागिता रहेको थियो ।
