वीरगंज । पर्सा निर्वाचन क्षेत्र नम्बर ४ अन्तर्गत आयोजित पार्टी प्रवेश कार्यक्रममा जनमत पार्टीका जगरनाथपुर गाउँपालिकाका अध्यक्ष बृजेश चौधरी राष्ट्रिय स्वतन्त्र पार्टी (रास्वपा) मा प्रवेश गरेका छन्। चौधरीसँगै दर्जनाैं जनमत पार्टीका नेता तथा कार्यकर्ताहरूले पार्टी परित्याग गर्दै रास्वपा रोजेका छन्।

कार्यक्रममा नवप्रवेशीहरूलाई रास्वपाका क्षेत्रीय सभापति जितेन्द्र मिश्र र पर्सा–४ का प्रतिनिधिसभा सदस्य उम्मेदवार टेकबहादुर शाक्यले खादा र फूलमाला लगाएर औपचारिक रूपमा स्वागत गरे।

पार्टी प्रवेश कार्यक्रममा बोल्दै बृजेश चौधरीले रास्वपामार्फत मात्र वास्तविक परिवर्तन सम्भव हुने धारणा व्यक्त गरे। उनले जनमत पार्टीले मधेसी समुदायलाई निरन्तर ठगेको र मधेसी भोटलाई सत्ता पुग्ने भर्‍याङका रूपमा प्रयोग गरेको आरोप लगाए।

चौधरीले भने, “हामीले विश्वास र समर्थन दिएको दलले जनताको अपेक्षा पूरा गर्न सकेन। अब परिवर्तनको मार्ग रास्वपाबाटै सम्भव छ।”

रास्वपाका उम्मेदवार टेकबहादुर शाक्यले पार्टी प्रवेशलाई जनआकाङ्क्षाको प्रतिबिम्बको रूपमा व्याख्या गर्दै भने, “आजको सहभागिता जनताले वैकल्पिक र जिम्मेवार राजनीति खोजिरहेको स्पष्ट सङ्केत हो। रास्वपा विकास, सुशासन र पारदर्शितालाई केन्द्रमा राखेर अघि बढेको छ। हामी पर्सा–४ को समग्र विकास, रोजगारी सिर्जना, शिक्षा र स्वास्थ्य क्षेत्रमा गुणात्मक सुधारका लागि प्रतिबद्ध छौँ।”

त्यसैगरी, क्षेत्रीय सभापति जितेन्द्र मिश्रले पार्टीको संगठन विस्तार र जनआधार मजबुत हुँदै गएको उल्लेख गर्दै नवप्रवेशीहरूलाई पार्टीको नीति र सिद्धान्तअनुसार सक्रिय भूमिका निर्वाह गर्न आग्रह गरे।

कार्यक्रममा स्थानीय नेता, कार्यकर्ता र सर्वसाधारणको उल्लेख्य उपस्थिति रहेको थियो। सहभागीहरूले रास्वपाको नीति, नेतृत्व र आगामी कार्ययोजनाप्रति विश्वास व्यक्त गर्दै आगामी निर्वाचनमा पार्टीलाई जिताउन सक्रिय भूमिका खेल्ने प्रतिबद्धता जनाएका थिए।

वीरगंज । पर्सा निर्वाचन क्षेत्र नम्बर–३ बाट नेकपा (एमाले) का प्रतिनिधिसभा सदस्य पदका उम्मेदवार रुपेश पाण्डेयले आफ्ना प्रतिस्पर्धी तथा पूर्व मन्त्री सुरेन्द्र प्रसाद चौधरीमाथि गम्भीर आरोप लगाउँदै सामाजिक सञ्जालमार्फत कडा प्रतिक्रिया दिएका छन्।

पाण्डेयले केही दिनअघि चौधरीले दिएको अन्तर्वार्ता तथा सार्वजनिक अभिव्यक्तिप्रति आपत्ति जनाउँदै आफूलाई बौद्धिक र विद्वान दाबी गर्ने नेताबाट निरन्तर झुटा आश्वासन, मिथ्या आरोप र अशोभनीय भाषा प्रयोग भएको बताएका छन् । यस्तो अभिव्यक्तिले व्यक्तिगत छविमात्र होइन, समग्र समाजमै नकारात्मक सन्देश जाने उनको भनाइ छ।

सामाजिक सञ्जालमा सार्वजनिक गरिएको पोस्टमा पाण्डेयले केही समयअघि चौधरी आफ्नै मानिकपुर–२ स्थित घरमा आएर चिया–नास्ता गरेको विषय उल्लेख गर्दै उक्त घटनालाई प्रत्यक्ष देखेको हुँदाहुँदै पनि ‘सुनेको छु’ भनेर सार्वजनिक कार्यक्रममा प्रस्तुत गरिएको आरोप लगाएका छन्। यसले चौधरीको इमानदारीमाथि गम्भीर प्रश्न उठ्ने पाण्डेयको दाबी छ।

पाण्डेयले २०४६ सालदेखि नै चौधरीलाई सकारात्मक सोच भएका व्यक्ति ठानेको उल्लेख गर्दै पछिल्ला पाँच वर्षयता भने उनले ‘झुटको राजनीति’ गर्दै आएको आफूले नजिकबाट नियालेको बताएका छन्। चौधरीका बोली, व्यवहार र गतिविधिसम्बन्धी प्रमाणहरू सुरक्षित रहेको जनाउँदै अझै पनि सुधारको अवसर दिन चाहेको उनले बताएका छन्।

उनले चौधरीले विभिन्न व्यक्तिहरूमाथि धम्की दिने, झुटा आरोप लगाउने, सार्वजनिक कार्यक्रममा अशोभनीय भाषा प्रयोग गर्ने तथा व्यक्तिगत रिसइबी र राजनीतिक स्वार्थबाट प्रेरित व्यवहार गर्दै आएको आरोप समेत लगाएका छन्। पाण्डेयले यस्तो ‘दूषित र नकारात्मक राजनीति’ तत्काल त्याग्न आग्रह गरेका छन्।

यसअघि चौधरीले एक सार्वजनिक कार्यक्रममा बोल्दै पाण्डेयमाथि व्यङ्ग्य गर्दै उनलाई ‘राजनीतिक संस्कार नभएको नयाँ नेता’को संज्ञा दिएका थिए। अध्ययन र बौद्धिकता बिना नेतृत्व सम्भव नहुने टिप्पणी गर्दै चौधरीले आफ्नो निजी पुस्तकालयमा ४–५ हजार पुस्तक रहेको र नियमित अध्ययन गर्ने दाबी गरेका थिए।

त्यसको प्रत्युत्तरमा पाण्डेयले विद्वान हुन पुस्तक पढ्नु मात्र पर्याप्त नहुने भन्दै ज्ञानलाई व्यवहारमा उतार्न सक्नुपर्ने बताएका छन्। आफू स्वावलम्बी जीवनशैलीमा विश्वास गर्ने र इमानदारीपूर्वक कमाएको पैसाले जीवनयापन गर्दै आएको उनको भनाइ छ।

पोस्टको अन्त्यमा पाण्डेयले सत्य–असत्यको छिनोफानो गर्न गहवामाई मन्दिरमा सँगै कसम खानसमेत चौधरीलाई चुनौती दिएका छन्।