वीरगंज । उच्च अदालत जनकपुर अस्थायी इजलास वीरगंजका न्यायाधीश गोकर्ण डाँगी ले मिडिया र पत्रकारबिना मुलुकमा शान्ति स्थापना सम्भव नरहेको बताएका छन् ।
क्रियाशील युवा पत्रकार मञ्च नेपालको दोस्रो साधारण सभालाई सम्बोधन गर्दै उनले मुलुकको विकास, सुशासन र शुद्धीकरणका लागि स्वतन्त्र मिडिया तथा जिम्मेवार पत्रकारिता अपरिहार्य रहेको बताए ।
उनले देशमा जब–जब संकट र परिवर्तनको अवस्था आएको छ, त्यतिबेला नागरिकको पक्षबाट पत्रकारहरू अग्रपंक्तिमा उभिएको उल्लेख गरे । मुलुकको परिवर्तनमा पत्रकार र सञ्चारमाध्यमको भूमिका महत्वपूर्ण रहेको बताउँदै उनले अहिलेका चुनौती र आगामी अवसरलाई आत्मसात गर्दै अघि बढ्नुपर्ने धारणा राखे ।
न्यायाधीश डाँगीले संविधानले मौलिक हकको व्यवस्था गरेसँगै पत्रकारलाई खबरदारी गर्ने अधिकारसमेत सुनिश्चित गरेको उल्लेख गर्दै त्यसको सही प्रयोग गर्न आग्रह गरे ।
उनले समयसँगै सञ्चारमाध्यमको स्वरूप परिवर्तन हुँदै गएको बताउँदै सामाजिक सञ्जालमा आएका सबै कुरा समाचार नहुने भएकाले सत्य र तथ्य छुट्याउने क्षमता आजको आवश्यकता भएको बताए ।
कानुनको पालना गर्दै सञ्चारमाध्यम सञ्चालन गर्न पत्रकारहरूलाई सुझाव दिँदै उनले समयअनुसार आफूलाई पनि परिवर्तन गर्दै लैजानुपर्ने बताए ।
राज्य, जनता र सरकारलाई सचेत बनाउने ‘चौथो अंग’को सम्मान गर्न नसके देश अगाडि बढ्न कठिन हुने उनको भनाइ थियो । केही सञ्चारमाध्यमप्रति जनविश्वास कमजोर बनेको उल्लेख गर्दै उनले स्वतन्त्र, निष्पक्ष र जिम्मेवार पत्रकारितामार्फत सञ्चार क्षेत्रलाई सुदृढ बनाउनुपर्नेमा जोड दिए ।
नागरिकले अपेक्षा गरेअनुसार शब्दको मर्यादा र पत्रकारिताको मूल्य–मान्यता कायम राख्दै अघि बढ्न उनले पत्रकारहरूलाई आग्रह गरे ।
