वीरगंज । राष्ट्र, राष्ट्रियता, धर्म, संस्कृति र नागरिक बचाउ महाअभियान नेपालका संयोजक दुर्गा प्रसाईं साेमबार वीरगंज आइपुगेका छन् । उनको आगमनसँगै वीरगंज तथा आसपासका क्षेत्रमा समर्थकहरूको उल्लेख्य उपस्थिति देखिएको छ भने सुरक्षा व्यवस्था पनि कडा पारिएको छ ।
प्रसाईं वीरगंज आउने क्रममा सिमरा विमानस्थलमा उनका समर्थकहरूले भव्य स्वागत गरेका थिए । विमानस्थल परिसरमा समर्थकहरूले फूलमाला, नाराबाजी तथा स्वागत कार्यक्रममार्फत प्रसाईंप्रति समर्थन व्यक्त गरेका थिए ।
वीरगंज प्रवेशपछि विभिन्न स्थानमा उनका समर्थकहरूको चहलपहल बढेको देखिएको छ । सुरक्षा संवेदनशीलतालाई ध्यानमा राख्दै जिल्ला प्रशासन तथा सुरक्षा निकायले वीरगंजका मुख्य क्षेत्रहरूमा निगरानी बढाएको स्रोतहरूले बताएका छन् ।
प्रसाईं निकट स्रोतका अनुसार उनले साेमबार वीरगंजवासीसँग भेटघाट तथा छलफल गर्ने कार्यक्रम तय गरेका छन् । साथै साेमबार राति उनी सिद्धार्थ डियालो होटलमा बसेका छन् ।
त्यसैगरी मंगलबार बिहान १२:३० बजे वीरगंजको प्रसिद्ध धार्मिक स्थल गहवामाई मन्दिरमा पूजा–पाठ गर्ने कार्यक्रम रहेको बताइएको छ । उनी बसेको होटलबाट समर्थकहरूसँग पैदल यात्रा गर्दै मन्दिर दर्शनका लागि जाने कार्यक्रम तय गरिएको छ ।
पछिल्लो समय विभिन्न राजनीतिक तथा सामाजिक मुद्दामा सक्रिय रहँदै आएका प्रसाईंको वीरगंज भ्रमणलाई उनका समर्थकहरूले विशेष महत्वका साथ हेरेका छन् । यद्यपि, उनको भ्रमणको औपचारिक उद्देश्यबारे विस्तृत कार्यक्रम भने सार्वजनिक गरिएको छैन ।
