वीरगंज । जिल्ला अनुगमन समितिको संयुक्त अनुगमन टोलीले मूल्य पारदर्शिता सप्ताह अन्तर्गत शुक्रबार वीरगंज महानगरपालिकाका विभिन्न क्षेत्रमा सञ्चालित होटल तथा क्यान्टिनहरूमा आकस्मिक अनुगमन गरेको छ ।
अनुगमनका क्रममा उपभोक्ता संरक्षण ऐन, २०७५ तथा उपभोक्ता संरक्षण नियमावली, २०७६ विपरीत कार्य गरेको पाइएपछि तीन व्यवसायीलाई कुल ७५ हजार रुपैयाँ जरिवाना गरिएको जिल्ला प्रशासन कार्यालय पर्साले जनाएको छ ।
कार्यालयका अनुसार वीरगंज महानगरपालिका वडा नं. ११ मा सञ्चालित तराई हस्पिटलका क्यान्टिनका सञ्चालक दिपक शाहलाई उपभोक्ता संरक्षण ऐन, २०७५ को दफा १५ बमोजिम कार्य नगरेको तथा दफा ३८ (ट) बमोजिम कसुर गरेको ठहर गर्दै दफा ३९ (१) (घ) अनुसार ५० हजार रुपैयाँ जरिवाना गरिएको छ ।
त्यसैगरी वडा नं. १३ मा सञ्चालित होटल शेखर थापाकी सञ्चालक ज्योति मगरलाई ऐनको दफा १५ विपरीत कार्य गरेको तथा दफा ३८ (घ) अनुसार कसुर गरेको पाइएकाले दफा ३९ (१) (क) बमोजिम २० हजार रुपैयाँ जरिवाना गरिएको जनाइएको छ ।
यस्तै, वडा नं. १३ मै रहेको चौधरी होटलकी सञ्चालक उर्मिला महतोलाई पनि सोही ऐन अन्तर्गत ५ हजार रुपैयाँ जरिवाना गरिएको छ । अनुगमन टोलीले वडा नं. १३ मा व्यवसाय सञ्चालन गर्दै आएकी अनु देवीलाई भने व्यवसाय सुधार गर्न सामान्य निर्देशन दिएको जनाएको छ ।
जिल्ला प्रशासन कार्यालय पर्साले उपभोक्ताको अधिकार संरक्षण तथा बजारलाई व्यवस्थित बनाउन यस्ता अनुगमनलाई निरन्तरता दिइने जनाएको छ ।
