वीरगंज । वीरगंज उद्याेग वाणिज्य संघका अध्यक्षका अध्यक्ष हरि गौतमले सरकारको वर्तमान विज्ञापन नीतिका कारण निजी सञ्चारमाध्यम र पत्रकारहरू समस्यामा परेको बताएका छन् ।
क्रियाशील युवा पत्रकार मञ्च नेपालको दोस्रो साधारण सभालाई सम्बोधन गर्दै उनले सरकारी विज्ञापन सरकारी सञ्चारमाध्यममै केन्द्रित गर्ने नीतिले निजी मिडियालाई प्रत्यक्ष असर पुगेको बताए ।
उनले निजी मिडिया र पत्रकारहरूको आन्दोलन जायज रहेको उल्लेख गर्दै त्यसमा निजी क्षेत्रको पनि पूर्ण समर्थन रहेको बताए । “निजी मिडियालाई सरकारी विज्ञापनबाट वञ्चित गर्न पाइँदैन,” उनले भने, “सरकारको नीतिका कारण निजी सञ्चारमाध्यम आर्थिक संकटमा परेका छन् ।”
अध्यक्ष गौतमले सरकारलाई निजी मिडिया मन नपरेकाले पनि यस्तो नीति ल्याइएको आरोप लगाए । उनले वर्तमान विज्ञापन नीतिका कारण पत्रकारहरूलाई सञ्चारमाध्यम सञ्चालन र घरपरिवार चलाउन समेत कठिनाइ भएको बताए । आवश्यकता अनुसार निजी क्षेत्रबाट सहयोग गर्ने प्रतिबद्धता समेत उनले जनाए ।
उनले मुलुकको समग्र आर्थिक अवस्था पनि कमजोर बन्दै गएको उल्लेख गर्दै उद्योगी व्यवसायी पलायन हुने जोखिम बढेको बताए । सरकारले उद्योग व्यवसाय सञ्चालनका लागि अनुकूल वातावरण बनाउन नसकेको भन्दै उनले व्यवसायीहरूमा निराशा बढ्दै गएको धारणा राखे ।
आन्तरिक आम्दानी कमजोर हुँदा राज्य सञ्चालनमै समस्या देखिएको उल्लेख गर्दै उनले अहिलेको राजस्वले कर्मचारीको तलबसमेत धान्न कठिन अवस्था रहेको बताए । निजी क्षेत्र स्वयं समस्यामा परेको भन्दै उनले पत्रकारहरूलाई यस्ता विषय समाचारमार्फत उजागर गर्न आग्रह गरे ।
