वीरगंज । वीरगंज भन्सार कार्यालय पछाडिको ईनर्वा गाउँ नाका हुँदै सिमावर्ती भारतीय शहर रक्सौलबाट खसी–बोकाको निर्वाध तस्करी भइरहेको पाइएकाे छ । सशस्त्र प्रहरी बल नेपाल सीमा सुरक्षा गुल्म वीरगंज भन्सारबाट डियुटीमा खटिएका सुरक्षाकर्मीहरुको मिलेमतोमा तस्करी भइरहेको पाइएकाे हाे ।
स्थानीयका अनुसार पछिल्लो समय दिनदहाडै तस्कर समूहले बालबालिकालाई प्रयोग गरेर खसी–बोका नेपाल भित्र्याउने काम गरिरहेका छन् । भारततर्फ खसी–बोका नेपालभन्दा सस्तो मूल्यमा पाइने भएकाले तस्कर समूहले त्यसैको फाइदा उठाउँदै अवैध कारोबार गरिरहेको उनीहरुको भनाइ छ।
स्थानीयवासीले सीमा क्षेत्रमा खटिएका सुरक्षाकर्मीहरुको अगाडिबाटै तस्करी भइरहे पनि कुनै रोकथाम नभएको गुनासो गरेका छन् । तस्कर समूहले मासिक रुपमा रकम बुझाउने सहमतिमै अवैध ओसारपसार भइरहेको आरोप समेत उनीहरुले लगाएका छन्।
उनीहरुका अनुसार सीमाबाट सामान्य सर्वसाधारणले एक सय रुपैयाँभन्दा बढीको सामान ल्याउँदा समेत कडाइ हुने गरेको छ । तर तस्कर समूह भने खुला रुपमा खसी–बोका भित्र्याइरहेको भन्दै स्थानीयले आक्रोश व्यक्त गरेका छन्।
यस विषयमा सशस्त्र प्रहरी बल नेपाल सीमा सुरक्षा गुल्म पर्साका सूचना अधिकारी प्रहरी नायब उपरीक्षक माेहन निराैलासँग बुझ्दा हाम्राे जानकारीमा यस्तो घटना नभएकाे प्रतिक्रिया दिएका छन् । उनले प्राप्त सूचनाका आधारमा अनुसन्धान गरिने र संलग्नता पुष्टि भए दोषीमाथि कारबाही गरिने बताए ।
