वीरगंज । क्रियाशील युवा पत्रकार मञ्च नेपालले आफ्नाे दोस्रो साधारण सभाको अवसरमा संस्थाका संस्थापक सदस्य स्वर्गीय नरेश सर्राफलाई मरणोपरान्त सम्मान गरेको छ । शनिबार वीरगंजस्थित होटल मकालुमा आयोजित कार्यक्रममा स्व. सर्राफको पत्रकारिता तथा संस्थाप्रतिको योगदानको कदर गर्दै नगदसहित सम्मान प्रदान गरिएको हो ।
संस्थाका अध्यक्ष प्रणय साहको अध्यक्षतामा सम्पन्न कार्यक्रममा स्व. सर्राफकी छोरीलाई नगद रु ५ हजार १ सयसहित सम्मानपत्र प्रदान गरिएको थियो । कार्यक्रममा प्रमुख अतिथि उच्च अदालत जनकपुर अस्थायी इजलास वीरगंजका मुख्य न्यायाधीश गोकर्ण डाँगीले सम्मान पत्र हस्तान्तरण गरेका थिए ।
कार्यक्रममा बोल्दै वक्ताहरूले स्व. सर्राफले पत्रकारिता क्षेत्र तथा संस्थाको स्थापना र सुदृढीकरणमा पुर्याएको योगदान स्मरणीय रहेको बताए । संस्थाले उनको योगदानको उच्च मूल्यांकन गर्दै सम्मान स्वरूप मरणोपरान्त सम्मान अर्पण गरिएको जनाएको छ ।
साधारण सभामा विभिन्न सञ्चारकर्मी, सामाजिक व्यक्तित्व तथा पत्रकारिता क्षेत्रसँग आबद्ध व्यक्तिहरूको सहभागिता रहेको थियो । वीरगंजका पत्रकार सर्राफकाे २०७९ मंसिर १५ गते अल्पायु मै हृदयघातका कारण निधन भएकाे थियाे ।
