वीरगंज । पर्सा जिल्ला खेलकुद विकास समितिले जिल्ला स्तरीय १६ औँ राष्ट्रपति रनिङ शिल्ड प्रतियोगिता आयोजना गर्ने भएको छ । प्रतियोगिता जेठ ८, ९ र १० गतेसम्म वीरगंजस्थित नारायणी रंगशालामा सञ्चालन हुने समितिले जनाएको छ ।
विद्यालय तहका खेलाडीहरूको सहभागितामा आयोजना हुन लागेको प्रतियोगितामा एथलेटिक्स, भलिबल, कबड्डी, कराते, तेक्वान्दोलगायत विभिन्न खेल समावेश गरिएका छन् । प्रतियोगितामा जिल्लाका १४ वटै स्थानीय तहबाट खेलाडीहरूको सहभागिता रहने बताइएको छ ।
प्रतियोगितालाई भव्य र सभ्य रूपमा सम्पन्न गर्न पालिका प्रतिनिधि तथा खेलप्रेमीहरूलाई उत्साहजनक सहभागिताका लागि समितिले अनुरोध गरेको छ ।
पर्सा जिल्ला खेलकुद विकास समितिका अध्यक्ष दिपक साह कानुको अध्यक्षतामा बसेको बैठकले प्रतियोगिताको तयारीलाई तीव्र बनाउने निर्णय गरेको हो । बैठकमा पर्सा जिल्ला खेलकुद विकास समितिका प्रमुख महम्द नाजिर हुसेन, पर्साका प्रहरी नायब उपरीक्षक राजु कार्की, सशस्त्र प्रहरी बल नेपाल नम्बर १३ गणका प्रहरी नायब उपरीक्षक मोहनराज निरौला, श्रीजंग गण वीरगंजका गणपति प्रमुख सेनानी लोकेन्द्र कार्की तथा नेपाल खेलकुद पत्रकार मञ्च पर्साका अध्यक्ष तिवारी यादवलगायतको सहभागिता रहेको थियो ।
