वीरगंज । राष्ट्रिय स्वतन्त्र पार्टी (रास्वपा) पर्सा क्षेत्र नं. ४ का सभापति जितेन्द्र मिश्रमाथि आइतबार राति आक्रमण भएको छ ।
क्षेत्र अन्तर्गतको छिपहरमाई गाउँपालिकाको वडा नं. २ टिहुकीमा आयोजित वडा अधिवेशनमा सहभागी भएर वीरगंज फर्कने क्रममा कालिकामाई गाउँपालिका वडा नं. १ स्थित मुडली पुल नजिक अज्ञात समूहले उनीमाथि आक्रमण गरेको हो । घटना आइतबार राति करिब ८ बजे भएको बताइएको छ ।
सभापति मिश्रले पार्टीको काम सकेर वीरगंज फर्कने क्रममा आफूलाई ज्यान मार्ने उद्देश्यले आक्रमण गरिएको बताएका छन् । आक्रमणका क्रममा उनी सवार बिइबी ५७८१ नम्बरको गाडीमा तोडफोड गरिएको प्रहरीले जनाएको छ । अज्ञात समुहकाे आक्रमणबाट गाडीको अगाडिको सिसा फुटेको भए पनि मिश्र सकुशल रहेका छन् ।
उक्त गाडीमा रास्वपा पर्साका सहसचिव तथा संगठन विभाग प्रमुख कृष्णा पासवान पनि सवार रहेका थिए । प्रहरीका अनुसार उनी पनि सुरक्षित रहेका छन् ।
घटनाबारे जानकारी दिँदै इलाका प्रहरी कार्यालय पोखरियाका प्रहरी निरीक्षक प्रदिप पौडेलले घटनामा संलग्न व्यक्तिहरुको खोजी कार्य भइरहेको बताए । उनका अनुसार घटनामा संलग्नहरुको पहिचान भए पनि फरार रहेकाले पक्राउ गर्न नसकिएको हो ।
रास्वपाको केन्द्रीय तालिका अनुसार हाल जिल्लाभर वडा अधिवेशन चलिरहेको छ । प्रारम्भिक रूपमा घटना पार्टीभित्रकै असन्तुष्ट पक्षसँग जोडिएको आशंका गरिएको छ ।
