वीरगंज । पर्सा र बाराका तीन स्थानमा शनिबार आयोजित रक्तदान कार्यक्रममा कुल १२९ जनाले रक्तदान गरेका छन् । रक्तसञ्चार केन्द्र वीरगंजमा देखिएको रगत अभावलाई मध्यनजर गर्दै विभिन्न संघसंस्थाले आकस्मिक रूपमा रक्तदान कार्यक्रम आयोजना गरेका हुन् ।
रक्तसञ्चार केन्द्र वीरगंजका प्रमुख सौरभराज पाण्डेका अनुसार पर्साको दुई स्थान र बाराको एक स्थानमा सम्पन्न कार्यक्रममा ४ महिला सहित १२९ जनाले रक्तदान गरेका हुन् ।
पर्सा बिक्री प्रतिनिधि समूहको आयोजनामा वीरगंजको बसपार्कमा आयोजित कार्यक्रममा एक महिला सहित ५१ जनाले रक्तदान गरेका समूहका बिकी सराफले जानकारी दिए । कार्यक्रममा विनोद श्रेष्ठ, रामाशंकर महतो, कमला मगर, अभिषेक नेलाली, दिपेश कुशवाहा, सन्दिप साह, सन्तोष महतो, बद्रीप्रसाद चौरसिया, प्रमोद पासवान, सगिर अन्सारी लगायतले रक्तदान गरेका थिए ।
त्यसैगरी बाराको प्रसौनी गाउँपालिका वडा नं. २ मा ईलेभेन स्टार क्रिकेट क्लबको आयोजनामा सम्पन्न रक्तदान कार्यक्रममा ३ महिला सहित ४२ जनाले रक्तदान गरेका रक्तसञ्चार केन्द्र वीरगंजका प्राविधिक प्रमुख पाण्डेले बताए ।
यस्तै वीरगंजको माइस्थान पार्कमा आयोजित अर्को रक्तदान कार्यक्रममा ३६ जनाले रक्तदान गरेका छन् ।
रक्तसञ्चार केन्द्र वीरगंजमा पछिल्लो समय रगत अभाव बढ्दै गएपछि आयोजना गरिएका यी कार्यक्रमबाट केही हदसम्म रगत अभाव पूर्ति हुने अपेक्षा गरिएको आयोजकहरूले बताएका छन् ।
