वीरगंज । नेशनल मेडिकल कलेज शिक्षण अस्पतालले अन्तर्राष्ट्रिय प्रमाणीकरणअन्तर्गत आईएसओ गुणस्तर व्यवस्थापन प्रणालीको मान्यता प्राप्त गरेको छ ।
अस्पताललाई रोयल ईम्प्याक्ट सर्टिफिकेशन लिमिटेडका निर्देशक रोशन श्रेष्ठबाट उक्त प्रमाणपत्र हस्तान्तरण गरेका हुन् । अस्पताल स्थापना भएको लामो समयपछि मधेश प्रदेशको एक मात्र शिक्षण अस्पताल आईएसओ गुणस्तर व्यवस्थापन प्रणालीबाट सर्टिफाइड भएको अस्पतालले जनाएको छ ।
अस्पतालका प्रबन्ध निर्देशक शाहवनाज अंसारीले आईएसओ प्रमाणपत्र प्राप्तिसँगै अस्पताल अन्तर्राष्ट्रिय मापदण्डअनुसारको गुणस्तरीय स्वास्थ्य सेवा प्रदान गर्ने संस्थाका रूपमा स्थापित भएको बताए । उनले अस्पतालको सम्पूर्ण टोलीको लामो समयको मेहनत र व्यवस्थापन सुधारका कारण यो उपलब्धि हासिल भएको उल्लेख गरे ।
उनका अनुसार अस्पतालले गुणस्तर सुनिश्चितता, व्यवस्थापन प्रणाली सुधार तथा सेवाप्रवाहलाई प्रभावकारी बनाउन विशेष काम गर्दै आएको छ । नेपालमा बिरामी उपचारको स्तर, उपचार पद्धति, गुणस्तर नियन्त्रण तथा व्यवस्थापनलाई व्यवस्थित बनाउन अस्पतालले निरन्तर काम गरिरहेको उनले बताए ।
अस्पतालले स्वास्थ्य विभागबाट प्राप्त निर्देशनअनुसार औषधि उपचार, विभिन्न निकाय तथा संस्थाबाट प्राप्त मापदण्डको पालना, बिरामी परीक्षण तथा निजी प्रयोगशालाको गुणस्तर परीक्षणसमेत गर्दै आएको जनाएको छ ।
त्यसैगरी, अस्पतालले नियामक निकायका लेखापरीक्षण, स्वदेशी तथा आयातित औषधिको गुणस्तर परीक्षण र विश्लेषण, विश्लेषण विधिको प्रमाणीकरण तथा कुशल प्रयोगशाला अभ्याससम्बन्धी निरीक्षण र लेखापरीक्षणको काम पनि गर्दै आएको अस्पतालले जनाएको छ ।
