वीरगंज । सर्वोच्च अदालतका प्रधान न्यायाधीश डा. मनोज कुमार शर्मा शनिबार साँझ गृह जिल्ला पर्सा आइपुगेका छन् । गत महिना सर्वोच्च अदालतको प्रधानन्यायाधीशमा नियुक्त भएपछि उनी पहिलोपटक आफ्नो गृह जिल्ला आएका हुन् ।
वीरगंज आगमनलगत्तै प्रधानन्यायाधीश शर्माले चिनिमिलस्थित उच्च अदालत जनकपुर अस्थायी इजलास वीरगंज तथा पर्सा जिल्ला अदालतको स्थलगत अवलोकन गरेका छन् । उनले अदालतको सेवा प्रवाह, सुरक्षा व्यवस्था तथा भौतिक पूर्वाधारको अवस्थाबारे जानकारी लिँदै सम्बन्धित अधिकारीहरूसँग छलफल गरेका थिए ।
पर्सा जिल्ला अदालतका श्रेस्तेदार प्रभाकर कुमार मल्लिकका अनुसार प्रधानन्यायाधीश शर्मा र सर्वोच्च अदालतका मुख्य रजिस्ट्रार विमल पौडेलले अदालत भवनको अवलोकन गर्दै जीर्ण अवस्थामा रहेको भौतिक संरचनाप्रति चासो व्यक्त गरेका थिए । अवलोकनका क्रममा प्रधानन्यायाधीश शर्माले नयाँ र सुविधासम्पन्न अदालत भवन निर्माणका लागि आवश्यक जग्गा व्यवस्थापन गर्न स्थानीय तहसँग समन्वय गरी प्रक्रिया अगाडि बढाउन निर्देशन दिएका थिए ।
अनुगमनका क्रममा पर्सा जिल्ला अदालतका मुख्य न्यायाधीश गोकर्ण डाँगी, पर्साका प्रमुख जिल्ला अधिकारी भोला दाहाल, अदालतका कर्मचारी तथा सुरक्षा निकायका प्रतिनिधिहरूको उपस्थिति रहेको थियो ।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक हरिबहादुर बस्नेतका अनुसार प्रधानन्यायाधीश शर्मा शनिबार राति वीरगंजमै रहने कार्यक्रम रहेको छ । उनको भ्रमणलाई न्यायिक क्षेत्रसँगै स्थानीय तहले पनि विशेष महत्वका साथ हेरेका छन् ।
प्रधानन्यायाधीश शर्माको यस भ्रमणले पर्साको न्यायिक पूर्वाधार, सेवा प्रवाह र अदालत व्यवस्थापनका विषयमा आवश्यक सुधार तथा विकासका लागि सकारात्मक सन्देश दिएको स्थानीय कानुन व्यवसायीहरूको भनाइ छ ।
