सेढवा । पर्सा जिल्लाको जिराभवानी गाउँपालिकालाई पूर्ण साक्षर गाउँपालिकाका रूपमा घोषणा गरिएको छ । नेपाल सरकारले निर्धारण गरेका साक्षरतासम्बन्धी सबै सूचक तथा मापदण्ड पूरा गरेपछि शुक्रबार आयोजित विशेष समारोहबीच गाउँपालिका अध्यक्ष अनोज चौधरीले पालिकालाई औपचारिक रूपमा पूर्ण साक्षर घोषणा गरेका हुन् ।
गाउँपालिकाको सहयोग तथा आसमान नेपालको प्राविधिक सहयोग र समन्वयमा सम्पन्न कार्यक्रममा शिक्षक, विद्यार्थी, अभिभावक, विद्यालय व्यवस्थापन समितिका पदाधिकारी, जनप्रतिनिधि, सञ्चारकर्मी तथा विभिन्न सरकारी तथा गैरसरकारी संस्थाका प्रतिनिधिहरूको उल्लेखनीय सहभागिता रहेको थियो ।
कार्यक्रममा शिक्षा क्षेत्रमा दीर्घकालीन योगदान पुर्याउने विभिन्न व्यक्तित्वहरूलाई सम्मान गरिएको थियो । यसैक्रममा श्री नेपाल राष्ट्रिय माध्यमिक विद्यालय, सेढवाका शिक्षक रमेश कुमार साहलाई पालिकास्तरीय उत्कृष्ट शिक्षक घोषणा गर्दै नगद ५ हजार रुपैयाँ, सम्मानपत्र तथा दोसल्लासहित सम्मान गरिएको थियो ।
कार्यक्रमलाई सम्बोधन गर्दै अध्यक्ष चौधरीले पूर्ण साक्षर घोषणा केवल औपचारिक उपलब्धि नभई गुणस्तरीय, व्यवहारिक तथा प्रविधिमैत्री शिक्षातर्फको नयाँ यात्राको सुरुवात भएको बताए । उनले आगामी दिनमा डिजिटल शिक्षा, सीपमूलक सिकाइ तथा आधुनिक प्रविधिमा आधारित शिक्षालाई प्राथमिकता दिइने प्रतिबद्धता व्यक्त गरे ।
गाउँपालिकाका शिक्षा शाखा प्रमुख शिवराज फुयालले साक्षरता अभियान सफल बनाउन सहयोग गर्ने सबै पक्षप्रति आभार व्यक्त गर्दै अब शिक्षाको पहुँचसँगै गुणस्तर अभिवृद्धिमा विशेष ध्यान केन्द्रित गरिने बताए ।
वडा नं. १ का अध्यक्ष रामशरण खवास तथा वडा नं. २ का अध्यक्ष महादेव महतो थारुले पूर्ण साक्षर घोषणा सम्पूर्ण स्थानीयवासीको साझा उपलब्धि भएको उल्लेख गर्दै विद्यालयको गुणस्तर सुधार, बालबालिकाको नियमित उपस्थितिमा वृद्धि तथा समुदायको सहभागिता सुदृढ बनाउन निरन्तर प्रयास गरिने बताए।
त्यसैगरी आसमान नेपालका कार्यक्रम व्यवस्थापक अजय कुमार यादव, कार्यक्रम अधिकृत धर्मेन्द्र चौरसिया तथा शिक्षकहरू कृपासिन्धु प्रसाद पटवारी र रामाशंकर चौधरीले शिक्षा क्षेत्रमा निरन्तर लगानी, समुदायको सक्रिय सहभागिता तथा विद्यालयहरूको मेहनतका कारण यो उपलब्धि सम्भव भएको धारणा व्यक्त गरे ।
कार्यक्रममा सहभागी विद्यार्थी प्रतिनिधिहरूले शिक्षामा गाउँपालिकाले दिएको प्राथमिकताप्रति खुशी व्यक्त गर्दै आधुनिक तथा प्रतिस्पर्धात्मक युगअनुसार सीपमूलक र प्रविधिमा आधारित शिक्षाको विस्तार आवश्यक रहेको बताए ।
स्थानीयवासी, राजनीतिक दलका प्रतिनिधि, प्रधानाध्यापक, सामाजिक अभियन्ता तथा विभिन्न संघसंस्थाका प्रतिनिधिहरूको उपस्थितिमा सम्पन्न कार्यक्रममा सहभागीहरूले जिराभवानी गाउँपालिकाको पूर्ण साक्षर घोषणा शिक्षा विकासको क्षेत्रमा महत्वपूर्ण कोसेढुङ्गा सावित हुने विश्वास व्यक्त गरे।
गाउँपालिकाले अब शतप्रतिशत बालबालिकालाई विद्यालयको पहुँचमा ल्याउने, प्राविधिक तथा व्यावसायिक शिक्षाको विस्तार गर्ने, डिजिटल शिक्षालाई प्रवर्द्धन गर्ने तथा शिक्षाको गुणस्तर सुधारका लागि विशेष योजना सञ्चालन गर्ने जनाएको छ ।
