वीरगंज । जिल्ला प्रहरी कार्यालय पर्सामा लामो समयदेखि कार्यरत वरिष्ठ प्रहरी नायब निरीक्षक (सई) लोकेन्द्र पण्डितको सरुवा भएको छ । इलाका प्रहरी कार्यालय कालिकामाई दरबन्दी भई जिल्ला प्रहरी कार्यालय पर्साको क्राइम शाखा इन्चार्जका रूपमा कार्यरत पण्डितलाई नेपाल प्रहरी विशेष सुरक्षा गण, कोहलपुर (बाँके) सरुवा गरिएको हो ।
प्रहरी प्रधान कार्यालय, नक्सालले जेठ २९ गते सार्वजनिक गरेको सरुवा सूचीअनुसार उनको सरुवा भएको हो । प्रहरी स्रोतका अनुसार पर्साका तत्कालीन प्रहरी उपरीक्षक गौतम मिश्रको निकट सहयोगीका रूपमा चिनिएका पाण्डितको १६ महिनामा सरुवा भएकाे हाे ।
पण्डितविरुद्ध विगतमा आर्थिक अनियमितता, तस्करीमा संलग्नता तथा आर्थिक लेनदेनसम्बन्धी अडियो सार्वजनिक भएको विषयमा प्रहरी प्रधान कार्यालयमा पटक–पटक उजुरी परेको थियो । तर पहुँच र प्रभावका कारण उनी लामो समयसम्म पर्सामै कार्यरत रहन सफल भएको आरोप लाग्दै आएको थियो ।
उनको मातहतमा कार्यरत रही आर्थिक लेनदेनसम्बन्धी विवादमा मुछिएका आधा दर्जनभन्दा बढी प्रहरी कर्मचारीलाई यसअघि नै कारबाहीस्वरूप विभिन्न पहाडी जिल्लामा सरुवा गरिएको स्रोतको दाबी छ । प्रहरी प्रधान कार्यालयले सार्वजनिक गरेको सूचीअनुसार पण्डितले असार १ गतेदेखि नयाँ कार्यस्थलबाट तलब–सुविधा पाउनेछन् ।
पण्डितसंगै अन्य १० जना वरिष्ठ प्रहरी नायब निरीक्षकको समेत प्रहरी प्राधान कार्यालयले सरुवा गरेकाे छ । सरुवा सूचिमा देखिका अधिकांशहरु लामाे समय सम्म मधेश कै जिल्लामा बसेका र विगतमा प्रहरी संगठनमा राम्राे दबदबा रेहका देखिएका छन् ।
