वीरगंज । जिल्ला प्रहरी कार्यालय पर्सामा कार्यरत बरिष्ठ प्रहरी नायब निरीक्षक (बरिष्ठ सई) मेगजन लामा सरुवा भएको एक वर्षभन्दा बढी समय बितिसक्दा पनि आफ्नो दरबन्दी रहेको कार्यालयमा रवाना नभएको पाइएको छ ।
प्रहरी स्रोतका अनुसार लामाको प्रदेश प्रहरी गण, ढल्केबरमा सरुवा भएको भए पनि हालसम्म उनी उक्त कार्यालयमा हाजिर हुन नगई जिल्ला प्रहरी कार्यालय पर्सामै कार्यरत छन् । उनी काज सरुवामार्फत सुबेदार मेजरको जिम्मेवारी सम्हाल्दै पर्सा प्रहरीमा कार्यरत रहेको बताइएको छ ।
प्रदेश प्रहरीको काज सरुवाको अवधि समाप्त भइसकेको अवस्थामा समेत उनी दरबन्दी भएको स्थानमा जान तयार नभएको प्रहरी स्रोतले जनाएको छ ।
स्रोतका अनुसार बरिष्ठ सई लामाकी श्रीमती समेत नेपाल प्रदेश प्रहरी कार्यालय, वीरगंजमा कार्यरत रहेकाले उनी रवाना नभएको अवस्था रहेको छ । पारिवारिक तथा व्यक्तिगत कारण देखाउँदै उनी पर्सामै बस्न चाहेको प्रहरी वृत्तमा चर्चा रहेको स्रोतको दाबी छ ।
बाराको सिमरा उपमहानगरपालिका निवासी लामा घर पायक पर्ने भएकाले प्रहरी संगठनभित्रको प्रभाव प्रयोग गरी सरुवा कार्यान्वयन नगरेको आरोप समेत लाग्दै आएको छ । उनीसंगै सरुवा भएका अधिकांश प्रहरीहरु रवाना भइसकेका छन् ।
जिल्ला प्रहरी कार्यालय पर्साका प्रवक्ता प्रहरी नायब उपरिक्षक हरि बहादुर बस्नेतले आवश्यकताकाे आधारमा संगठनले काजमा खटाउने गरेकाे वताए । पहुँचकाे आधारमा लामाले लामाे समयदेखि काज मै बसेकाे पत्रकारकाे प्रश्नमा प्रवक्ता बस्नेतले त्यसाे नभएकाे भन्दै काजकाे समय सिमा नहुने गरेकाे वताए ।
प्रहरी संगठनभित्र सरुवा निर्णयको कार्यान्वयनमा समान मापदण्ड लागू हुनुपर्ने माग उठिरहेका बेला लामाको विषयले पुनः चर्चा पाएको छ ।
