वीरगंज । जनता समाजवादी पार्टी (जसपा) नेपालका अध्यक्ष उपेन्द्र यादवले नेपालले भारतको एक इन्च पनि भूमि नमिचेको बताउँदै सीमा सम्बन्धी विवादहरू ऐतिहासिक तथ्य, नक्सा तथा अन्तर्राष्ट्रिय मान्यताका आधारमा समाधान हुनुपर्ने धारणा व्यक्त गरेका छन् ।
रिपोर्टर्स क्लब नेपालको आयोजनामा वीरगंजस्थित होटल भिस्वामा शनिबार आयोजित साक्षात्कार कार्यक्रममा बोल्दै अध्यक्ष यादवले नेपाल आफ्नो सार्वभौमसत्ता र भौगोलिक अखण्डताप्रति स्पष्ट रहेको उल्लेख गर्दै कुनै पनि छिमेकी राष्ट्रको भूमि अतिक्रमण नगरेको बताए ।
“नेपालले भारतको एक इन्च पनि भूमि मिचेको छैन । सीमासम्बन्धी विवाद भएका क्षेत्रहरू ऐतिहासिक दस्तावेज, सन्धि तथा प्रमाणका आधारमा समाधान हुनुपर्छ,” यादवले भने ।
गत फागुन २१ गतेकाे सम्पन्न निर्वाचनपछि पहिलाे पटक वीरगंज आएका अध्यक्ष यादवले नेपाल–भारत सम्बन्धलाई थप सुदृढ र मैत्रीपूर्ण बनाउन दुवै देशले आपसी सम्मान, समानता र विश्वासको आधारमा संवाद अघि बढाउनुपर्नेमा जोड दिए ।
सो अवसरमा अध्यक्ष यादवले संघीयतालाई अझ प्रभावकारी बनाउन हालको सात प्रदेशको संरचनालाई पुनरावलोकन गरी १० प्रदेशको अवधारणा लागू गर्नुपर्ने धारणा राखे । मधेशका जनताले आफूहरूलाई संघीयताको रक्षाका लागि मतदान गरेको उल्लेख गर्दै जनताको अधिकार र विश्वासको रक्षा गर्न जसपा नेपाल प्रतिबद्ध रहेको बताए ।
उनले भूमिहीन सुकुम्बासी तथा अव्यवस्थित बसोबासीहरूको समस्या समाधान गर्न सरकार गम्भीर बन्नुपर्ने बताउँदै उनीहरूलाई घरबारविहीन बनाउने कुनै पनि कदम स्वीकार्य नहुने स्पष्ट पारे ।
सरकारले हालै प्रस्तुत गरेको बजेटप्रति असन्तुष्टि व्यक्त गर्दै यादवले विद्युत्मा मूल्य अभिवृद्धि कर (भ्याट) लगाउने निर्णय गलत भएको बताए । उक्त निर्णय तत्काल फिर्ता लिन सरकारसँग माग गर्दै यसले आम उपभोक्ता तथा उद्योग व्यवसायीलाई थप आर्थिक भार पर्ने धारणा राखे ।
उनले कृषि उत्पादनको मुख्य सिजनमा किसानलाई आवश्यक मलखादको सहज आपूर्ति सुनिश्चित गर्न सरकारसँग माग गर्दै वर्तमान परिस्थितिप्रति अन्तर्राष्ट्रिय मित्र राष्ट्रहरू समेत असन्तुष्ट रहेको दाबी गरे ।
राज्यका सबै समुदायको समान र सम्मानजनक सहभागिता सुनिश्चित हुनुपर्ने उल्लेख गर्दै उनले समावेशी लोकतन्त्रको मर्मअनुसार राज्य सञ्चालन हुनुपर्ने बताए ।
निर्वाचन आयोगको निष्पक्षतामाथि प्रश्न उठाउँदै यादवले प्रत्येक जिल्लाबाट अनिवार्य रूपमा एक–एक सांसद निर्वाचित गर्ने प्रस्तावप्रति आपत्ति जनाए । प्रतिनिधित्वको आधार भूगोलभन्दा जनसंख्या हुनुपर्ने उनकाे भनाई थियाे ।
यस्तै, २३–२४ गते भएका घटनाबारे राष्ट्रिय मानवअधिकार आयोगले सार्वजनिक गरेको प्रतिवेदनका आधारमा सरकारले थप अनुसन्धान गरी सत्यतथ्य सार्वजनिक गर्नुपर्ने माग समेत उनले गरे ।
कार्यक्रममा जसपा नेपालका नेता लालबाबु राउत गद्दी, जितेन्द्र सोनल, रमेश कुर्मी, रामनरेश यादव लगायत नेता तथा कार्यकर्ताहरूको उल्लेखनीय उपस्थिति रहेको थियो । कार्यक्रमकाे संचालन रिपाेर्टस क्लब वीरगंजका अध्यक्ष कन्हैया गुप्ताले गरेका थिए ।
