वीरगञ्ज । राउन्ड टेबल नेपाल वीरगञ्ज र रोट्र्याक्ट क्लब अफ वीरगञ्ज मेट्रोपोलिसको संयुक्त आयोजनामा शनिबार रक्तदान कार्यक्रम सम्पन्न भएको छ । वीरगञ्जको घण्टाघरस्थित आयोजित कार्यक्रममा ५८ जनाले रक्तदान गरेका छन् ।

कार्यक्रममा देवनाथ राय, सगुन कुमार सिंह, अफरोज अन्सारी, कृष्ण मोहन यादव, सन्जोग थापा, शक्ति श्रेष्ठ, सहिम राउत गद्दी, राहुल महतो लगायतले रक्तदान गरेको आयोजकले जनाएको छ ।

राउन्ड टेबल नेपालका अध्यक्ष सुमित मित्तल र रोट्र्याक्ट क्लब अफ वीरगञ्ज मेट्रोपोलिसका अध्यक्ष रामविनय यादवको संयुक्त अध्यक्षतामा कार्यक्रम सम्पन्न भएको हो । कार्यक्रममा नेपाल रेडक्रस सोसाइटी पर्साका सभापति बृजकिशोर पटेल, नेपाल इनोभेटिभ सोसाइटी वीरगञ्जका अध्यक्ष कमल चौगाईं, दीनानाथ रौनियार, रोटरी क्लब अफ वीरगञ्ज मेट्रोपोलिसका अध्यक्ष राजकिशोर प्रसाद, मोहित राजपाल, समाजसेवी राजेन्द्र भट्टराई लगायतको उपस्थिति रहेको थियो ।

सो अवसरमा राउन्ड टेबल नेपालका अध्यक्ष सुमित मित्तलले संस्था विशुद्ध मानवीय सेवाको उद्देश्यले निरन्तर सामाजिक कार्यमा सक्रिय रहँदै आएको बताए । वीरगञ्जमा रगतको अभाव भएको जानकारी पाएपछि रक्तदान कार्यक्रम आयोजना गरिएको उनले बताए ।

उनले रक्तदान गर्दा रक्तदातालाई कुनै ठूलो घाटा नहुने तर रगत प्राप्त गर्ने व्यक्तिका लागि भने त्यसले जीवन बचाउन महत्वपूर्ण भूमिका खेल्ने बताए । मित्तलले स्वस्थ व्यक्तिहरूलाई नियमित रूपमा प्रत्येक तीन महिनामा रक्तदान गरी मानवता र सामाजिक सेवामा योगदान गर्न आग्रह गरे ।

कार्यक्रममा रक्तसञ्चार केन्द्र वीरगञ्जका प्रमुख सौरवराज पाण्डेको नेतृत्वमा आएको प्राविधिक टोलीले रक्तसंकलनका लागि प्राविधिक सहयोग गरेको थियो ।

वीरगंज । जल तथा मौसम विज्ञान विभागको पूर्वानुमानअनुसार अत्यधिक भारी वर्षा भई नदी–नालामा पानीको बहाव बढ्ने तथा होचा भू–भाग डुबानमा पर्ने उच्च जोखिम देखिएपछि जिल्ला प्रशासन कार्यालय पर्साले सम्पूर्ण जिल्लावासीलाई विशेष सतर्कता अपनाउन आग्रह गरेको छ ।

जिल्ला विपद् व्यवस्थापन समिति, पर्साद्वारा सोमबार जारी सूचनामा सम्भावित विपद्को क्षति न्यूनीकरणका लागि सुरक्षित उच्च स्थान, सामुदायिक आश्रयस्थल तथा नजिकको खुला क्षेत्रको पहिचान गरी तयारी अवस्थामा रहन अनुरोध गरिएको छ । साथै स्थानीय प्रशासन, बाढी पूर्वानुमान महाशाखा तथा आधिकारिक सञ्चारमाध्यमबाट जारी हुने सूचनालाई नियमित रूपमा पछ्याउन र हल्ला तथा अफवाहको पछि नलाग्न पनि आग्रह गरिएको छ ।

प्रशासनले नागरिकता, जग्गाधनी प्रमाणपत्र, शैक्षिक प्रमाणपत्रलगायत महत्वपूर्ण कागजात तथा नगद रकमलाई वाटरप्रूफ झोलामा सुरक्षित राख्न तथा आकस्मिक अवस्थाका लागि चिउरा, चाउचाउजस्ता सुख्खा खाना, अत्यावश्यक औषधि, टर्चलाइट, पावरबैंक र स्वच्छ पिउने पानीसहितको ‘इमर्जेन्सी गो–ब्याग’ तयार राख्न सुझाव दिएको छ ।

सूचनामा बालबालिका, वृद्धवृद्धा, गर्भवती महिला, सुत्केरी तथा अपाङ्गता भएका व्यक्तिहरूको सुरक्षा र उद्धारलाई प्राथमिकता दिनुपर्ने उल्लेख गरिएको छ । बाढी पसेका घर वा पसलमा विद्युतीय सर्ट सर्किटबाट हुन सक्ने दुर्घटनाबाट जोगिन मुख्य विद्युत् स्विच बन्द राख्न तथा नदी–खोलामा पानीको बहाव बढिरहेका बेला माछा मार्ने, पौडी खेल्ने वा काठ–दाउरा संकलन गर्न नदी किनारमा नजान प्रशासनले आग्रह गरेको छ ।

मनसुनजन्य विपद्को अवस्थामा उद्धार, खोज तथा राहतका लागि नेपाल प्रहरी (१००), सशस्त्र प्रहरी बल (१११४) वा जिल्ला आपत्कालीन कार्यसञ्चालन केन्द्र (DEOC) पर्सा (१२३४) मा तत्काल सम्पर्क गर्न प्रशासनले अनुरोध गरेको छ ।

जिल्ला विपद् व्यवस्थापन समितिका तर्फबाट सहायक प्रमुख जिल्ला अधिकारी कृष्ण थापाले जारी गरेको सूचनामार्फत सबै नागरिकलाई उच्च सतर्कता अपनाई सुरक्षित रहन आग्रह गरिएको छ ।