वीरगञ्ज । वीरगञ्ज–रक्सौल जोड्ने ऐतिहासिक मितेरी पुलबाट ११ किलोभन्दा बढी अवैध लागूऔषध चरेससहित एक नेपाली नागरिक पक्राउ परेका छन्।
भारततर्फ ठूलो परिमाणमा लागूऔषध ओसारपसार भइरहेको विशेष सूचनाका आधारमा एसडीपीओ मनिष कुमार आनन्दको कमान्डमा भारतीय प्रहरी र सशस्त्र सीमा बल (एसएसबी) को संयुक्त टोलीले शनिबार साँझ सीमावर्ती क्षेत्रमा विशेष चेकजाँच गरेको थियो।
चेकजाँचका क्रममा वीरगञ्जबाट रक्सौलतर्फ जाँदै गरेको शंकास्पद ई–रिक्सालाई रोकेर खानतलासी गर्दा रिक्साभित्र लुकाएर राखिएको बोराबाट २२ वटा कालो प्लास्टिकका प्याकेटमा प्याक गरिएको ११ किलो २४६ ग्राम चरेस बरामद भएको भारतीय सुरक्षा निकायले जनाएको छ।
चरेससहित पक्राउ पर्नेमा वीरगञ्ज महानगरपालिका–छपकैयाका ३९ वर्षीय अमर चौधरी रहेका छन्। पक्राउ परेका चौधरीलाई बरामद चरेस र ई–रिक्सासहित आवश्यक कानुनी कारबाहीका लागि रक्सौलस्थित हरैया थानाको जिम्मा लगाइएको एसएसबीले जनाएको छ।
प्रारम्भिक अनुसन्धानका क्रममा उक्त चरेस मकवानपुरका विभिन्न स्थानबाट सङ्कलन गरी बारा र पर्साको बाटो हुँदै भारततर्फ लैजान खोजिएको खुलेको बताइएको छ।
मकवानपुरदेखि राजमार्ग तथा विभिन्न सुरक्षा जाँचस्थल पार गर्दै ठूलो परिमाणमा लागूऔषध वीरगञ्जको सीमासम्म पुग्नु र भारतीय भूमिमा प्रवेश गर्ने क्रममा मात्रै बरामद हुनुले नेपालतर्फको सुरक्षा निगरानी तथा चेकजाँच प्रणालीमाथि प्रश्न उठाएको छ।
खुला सीमाको फाइदा उठाउँदै लागूऔषधको अन्तरदेशीय ओसारपसार भइरहेको घटनाले सीमा क्षेत्रमा सुरक्षा निगरानी थप कडाइ गर्नुपर्ने आवश्यकता समेत देखाएको छ।









The gaming experience is top notch. I had a few questions and the customer support answered me right away. Really impressive service! phonyx