वीरगंज । प्याब्सन पर्सा र प्याब्सन वीरगन्जको संयुक्त आयोजनामा प्री–प्राइमरी तहका विद्यार्थीलाई लक्षित गरी पहिलोपटक अन्तरविद्यालयस्तरीय ‘प्याब्सन राइम्स फेस्ट २०८३’ आयोजना हुने भएको छ।
आगामी असोज १८ गते आइतबार बिहान १० बजेदेखि वीरगन्जस्थित आर्मी ब्यारेकको उत्तरपट्टि रहेको क्लासिक ब्याङ्क्वेटमा प्रतियोगिता सञ्चालन हुनेछ। प्रतियोगितामा प्याब्सन पर्सामा आबद्ध २० विद्यालयका विद्यार्थीहरूको सहभागिता रहनेछ।
प्रत्येक विद्यालयबाट न्यूनतम ८ देखि अधिकतम १२ जना प्री–प्राइमरी तहका विद्यार्थीले विभिन्न राइम्स प्रस्तुत गर्नेछन्। प्रत्येक विद्यालयलाई प्रस्तुति दिन अधिकतम चार मिनेटको समय दिइने आयोजकले जनाएको छ।
सबै विद्यालयको प्रस्तुति सम्पन्न भएपछि निर्णायकहरूको मूल्यांकनका आधारमा उत्कृष्ट पाँच विद्यालय छनोट गरिनेछ। तीमध्ये प्रथम, द्वितीय र तृतीय हुने विद्यालय तथा विद्यार्थीलाई ट्रफी, प्रमाणपत्र र मेडल प्रदान गरिनेछ। चौथो र पाँचौँ स्थान हासिल गर्ने विद्यालयका विद्यार्थीलाई सान्त्वना पुरस्कारस्वरूप प्रमाणपत्र प्रदान गरिनेछ।
प्रतियोगितामा सहभागी सबै विद्यार्थीलाई सहभागिताको प्रमाणपत्रसमेत प्रदान गरिने आयोजकले जनाएको छ।
प्री–प्राइमरी तहका बालबालिकाको प्रतिभा प्रस्फुटन, आत्मविश्वास अभिवृद्धि तथा सिर्जनात्मक क्षमताको विकास गर्ने उद्देश्यले प्रतियोगिता आयोजना गर्न लागिएको हो। प्रतियोगिताको सम्पूर्ण तयारी पूरा भइसकेको आयोजकले जनाएको छ।
प्रतियोगिताको संयोजन प्याब्सन नगर कार्यसमिति सदस्य विजय कुमार बलले गरेका छन्। प्याब्सन पर्साका जिल्ला सचिव अशोक संग्रौलाले प्रतियोगिताले सानै उमेरदेखि बालबालिकाको प्रतिभा पहिचान, प्रस्तुति क्षमता र आत्मविश्वास विकासमा सहयोग पुग्ने बताए।
बालबालिकाको प्रारम्भिक सिकाइलाई मनोरञ्जनात्मक तथा सिर्जनात्मक गतिविधिसँग जोड्दै विद्यालयबीचको सहकार्य र बालप्रतिभाको विकासमा समेत प्रतियोगिताले योगदान पुर्याउने आयोजकको अपेक्षा छ।
