वीरगंज । बाराको परवानीपुर गाउँपालिका–१, बुनियादमा शनिबार निःशुल्क आँखा तथा दन्त स्वास्थ्य शिविर सम्पन्न भएको छ। पत्रकार तिवारी यादवको पहल तथा एलएस न्युराे हाेस्पटिल एण्ड मेडिकल कलेजकाे सहयोगमा शिविर सम्पन्न भएकाे हाे ।
स्थानीय श्री नेपाल राष्ट्रिय प्राथमिक विद्यालयको परिसरमा भएको शिविरमा महिला तथा पुरुष गरी करिब ४ सय जनाले निःशुल्क आँखा तथा दन्त परीक्षण गराएका थिए ।
शिविरमा सहभागी स्थानीयवासीको आँखा तथा दाँतको स्वास्थ्य परीक्षण गर्नुका साथै आवश्यक स्वास्थ्य परामर्शसमेत प्रदान गरिएको थियो । ग्रामीण तथा विपन्न समुदायका नागरिकलाई आफ्नै गाउँमा सहज रूपमा विशेषज्ञ स्वास्थ्य सेवा उपलब्ध गराउने उद्देश्यले शिविर आयोजना गरिएको आयोजकले जनाएको छ ।
पत्रकार यादवले स्थानीयवासीले आफ्नै गाउँमा विशेषज्ञ स्वास्थ्यकर्मीबाट निःशुल्क आँखा तथा दन्त परीक्षण सेवा पाउँदा राहत महसुस गरेको बताए । उनले जनप्रतिनिधि र जनताबीचको दूरी बढ्दै गएको गुनासो सुनिन थालेपछि ग्रामीण क्षेत्रका नागरिकलाई प्रत्यक्ष स्वास्थ्य सेवा उपलब्ध गराउने उद्देश्यले शिविरका लागि पहल गरेको बताए ।
यादवले पत्रकारितामार्फत जनताको आवाज उठाउनुका साथै जनताको सुखदुःखमा समेत आफू सधैं साथमा रहने प्रतिबद्धता व्यक्त गरे ।
शिविरमा स्थानीय युवाहरू सन्तोष यादव (भोला), राजेश पण्डित, मनोज मण्डल, सरोज मण्डल, यश मण्डल, कमलेश मण्डललगायतको सक्रिय सहभागिता रहेको थियो ।
