वीरगंज । बाराको परवानीपुर गाउँपालिका–५, नौतनस्थित एलएस हस्पिटल एन्ड मेडिकल कलेज परिसरमा शुक्रबार रक्तदान कार्यक्रम सम्पन्न भएको छ ।
बिरामीको उपचारका क्रममा हुने रगत अभाव न्यूनीकरण गर्दै स्थानीयस्तरमै रगत संकलन गरी मानवीय सेवामा योगदान पुर्याउने उद्देश्यले अस्पतालले रक्तदान कार्यक्रम आयोजना गरेको हो ।
कार्यक्रममा १३ महिलासहित ४८ जनाले रक्तदान गरेका छन् । रक्तदान गर्नेमा पत्रकार तिवारी यादव, विनोद पटेल, सन्तोष यादवलगायत अस्पतालका कर्मचारी, स्वास्थ्यकर्मी तथा विभिन्न क्षेत्रसँग आबद्ध व्यक्तिहरूको सहभागिता रहेको थियो ।
वीरगंजस्थित ब्लड बैंकमा पछिल्लो समय रगतको अभाव देखिँदा उपचारका लागि आउने बिरामी तथा उनीहरूका आफन्तलाई आवश्यक रगत जुटाउन कठिनाइ भइरहेको अवस्थालाई मध्यनजर गर्दै कार्यक्रम आयोजना गरिएको अस्पतालले जनाएको छ ।
संकलित रगत आकस्मिक अवस्था, शल्यक्रिया तथा अन्य उपचारका क्रममा आवश्यक पर्ने बिरामीका लागि उपयोगी हुने अस्पताल प्रशासनले जनाएको छ ।
