वीरगंज । विश्व बजारमा टेस्लाका विद्युतीय सवारीसाधनको मूल्य घटेको अवस्थामा नेपालमा आयात भएको गाडीको वास्तविक खरिद मूल्यभन्दा पुरानो आयात मूल्यलाई आधार बनाएर थप राजस्व मागिएको भन्दै कायरोस इन्टरनेशनल प्रालिले आपत्ति जनाएको छ ।
चीनको सांघाईमा उत्पादन भएको टेस्ला मोडल वाई आरडब्लुडी आयात गरेको कायरोसका अनुसार वीरगंज भन्सार कार्यालयले असोज ११ गते पत्र पठाउँदै यसअघि छुट भएको भनिएको भन्सार राजस्व दाखिला गर्न ताकेता गरेको हो । कम्पनीका अनुसार दुईवटा गाडीमा मात्रै प्रतिगाडी करिब ७८ देखि ७९ लाख रुपैयाँका दरले थप राजस्व माग गरिएको छ ।
कम्पनीका भन्सार प्रतिनिधि मधुकुमार बरालले हाल आयात भएका गाडी चीनको सांघाईमा उत्पादन भई हङकङ हुँदै नेपाल ल्याइएको बताए । उनका अनुसार अमेरिकाबाट विगतमा आयात भएका समान मोडलका गाडीको तुलनामा चीनमा उत्पादन भएको गाडीको खरिद तथा ढुवानी लागत कम परेको छ ।
पुरानो र नयाँ आयात मूल्यमा फरक
बरालका अनुसार करिब छ महिनाअघि अमेरिकाबाट टेस्ला गाडी आयात गर्दा ३४ हजार ५०० अमेरिकी डलर अर्थात् करिब ५० लाख ६२ हजार रुपैयाँको मूल्य कायम गरिएको थियो । उक्त गाडीमा विभिन्न शीर्षकमा गरी करिब ७९ लाख ११ हजार रुपैयाँ राजस्व दाखिला गरिएको उनको भनाइ छ ।
तर अहिले चीनको सांघाईमा उत्पादन भएको सोही ब्रान्ड तथा मोडलको गाडीको खरिद मूल्य नै कम परेको कम्पनीको दाबी छ । अन्तर्राष्ट्रिय बजारमा नयाँ मोडल तथा नयाँ उत्पादन बजारमा आउँदा पुराना मोडलको मूल्य घट्नु स्वाभाविक रहेको बरालले बताए ।
कायरोसका अनुसार हाल आयात गरिएको गाडीको हङकङमा रहेको एमआरपी २ लाख ५४ हजार हङकङ डलर भए पनि भ्याट तथा एजेन्सी छुटलगायत रकम समायोजन गर्दा मूल्य करिब २ लाख ५०० हङकङ डलर पर्न आउँछ । नेपाली रुपैयाँमा रूपान्तरण गर्दा यसको आधारभूत मूल्य करिब ३८ देखि ३९ लाख रुपैयाँ हुने कम्पनीको दाबी छ ।
कम्पनीले उपलब्ध गराएको विवरणअनुसार उक्त मूल्यमा भन्सार महसुल, एकीकृत महसुल, सडक सम्भार दस्तुर र भ्याटसमेत गरी कुल कर तथा राजस्व करिब ३५ लाख ८५ हजार रुपैयाँ पर्ने जनाएको छ ।
जाँचपास भइसकेका गाडीमा थप राजस्वको माग
कायरोसका अनुसार चालु आर्थिक वर्षमा जुलाई २९ र सेप्टेम्बर ९ मा दुई खेपमा टेस्ला मोडल वाई आरडब्लुडी नेपाल आयात गरिएको थियो । ती गाडी वीरगंज भन्सारबाट जाँचपास भई ग्राहकलाई बिक्रीसमेत भइसकेका छन् ।
तर जाँचपास भएको केही समयपछि सञ्चारमाध्यममा प्रकाशित समाचारपछि वीरगंज भन्सार कार्यालयको आन्तरिक लेखापरीक्षणबाट कम राजस्व असुल भएको निष्कर्ष निकालिएको भन्दै थप रकम दाखिला गर्न पत्र पठाइएको कम्पनीको भनाइ छ ।
गाडी बिक्री भइसकेकाले ग्राहकबाट पुनः थप रकम उठाउन सम्भव नरहेको कम्पनीले जनाएको छ । ग्राहकले खरिदका बेला तोकिएको मूल्यअनुसार सम्पूर्ण रकम भुक्तानी गरिसकेको कम्पनीको भनाइ छ ।
आयातकर्ता पक्षले भन्सार मूल्यांकन गर्दा गाडी उत्पादन भएको देश, वास्तविक खरिद मूल्य, ढुवानी खर्च, आयातसम्बन्धी कागजात तथा अन्तर्राष्ट्रिय बजारमा उपलब्ध मूल्यलाई समेत आधार बनाउनुपर्ने तर्क गरेको छ ।
कम्पनीले एउटै मोडल विभिन्न देशमा फरक लागतमा उत्पादन हुने र बजारअनुसार मूल्यमा समेत फरक हुन सक्ने भएकाले प्रत्येक आयातको वास्तविक व्यापारिक कागजातका आधारमा मूल्यांकन गर्नुपर्ने जनाएको छ ।
थप राजस्व माग फिर्ता नभए आन्दोलनको चेतावनी
थप राजस्वको माग फिर्ता नभए व्यवसायीहरूले आन्दोलनका कार्यक्रम अघि बढाउने चेतावनी दिएका छन् । आयातकर्ता पक्षले जाँचपास भएर बिक्री भइसकेका गाडीमा पछि गएर ठूलो कर दायित्व सिर्जना हुँदा व्यवसायी र ग्राहक दुवै प्रभावित हुने जनाएको छ ।
व्यवसायीहरूले अन्तर्राष्ट्रिय बजारमा मूल्य परिवर्तन भएको अवस्थामा वास्तविक खरिद मूल्यका आधारमा भन्सार मूल्यांकन गर्ने कि विगतको आयात मूल्यलाई आधार बनाउने भन्ने विषयमा स्पष्ट नीति र व्यवहारिक कार्यविधि आवश्यक रहेको
