Date
बिहि, मंसिर ३, २०८३
Thu, November 19, 2026
Home Blog Page 721

नेपाल प्रहरी र सशस्त्र प्रहरीका डिआईजी कै संलग्नतामा मधेश प्रदेशमा तस्करी

0

वीरगंज । मधेश प्रदेशमा नेपाल प्रहरी र सशस्त्र प्रहरीको संरक्षणमा तस्करी मौलाएको छ । प्रदेशको नामाकरण र राजधानीको समर्थन र विरोधमा राजनीति गर्माएको बेला नेपाल प्रहरी र सशस्त्र प्रहरीको संरक्षणमा निर्वाध रुपमा तस्करी मौलाएको हाे ।

प्रदेशका ८ वटै जिल्लामा नेपाल प्रहरीका प्रदेश प्रमुख डिआईजी उमेश रंजितकार र सशस्त्र प्रहरी बल नेपाल नं. २ छिन्नमस्ता बाहिनी मुख्यालय महोत्तरीका डिआईजी गणेश ठाडा मगरको संरक्षणमा तस्करी मौलाएको श्रोतले जनाएको छ ।

नेपाल प्रहरी र सशस्त्र प्रहरीका डिआईजीले ८ वटै जिल्लामा आ–आफना छुट्टाछुटै घुमुवा खटाएर तस्करहरूलाई ‘लाइन’ दिएर महिनावारी असुली गरि रहेको श्रोतले जनाएको छ । मधेश प्रदेशका ८ वटै जिल्लाबाट राजनीतिक विवादका कारण सबैको ध्यान अन्यत्र केन्द्रित भएको बेला सिमा क्षेत्र तथा जिल्लाको सुरक्षा मजबुद बनाउने निकाय नै रातको समयमा दैनिक करोडौको तस्करीमा संलग्न हुन थालेसँगै आर्थिक अवस्था समेत धारासायी हुने निश्चित भएको छ ।

अहिले सशस्त्र प्रहरीले रविकान्त मिश्र, आत्माराम पटेल, गगनदेव साह, रामखेलावन यादव, वशिष्ठ पटेल, सुकदेव बैठा र अशोक साहलाई मधेस प्रदेशमा परिचालित गरी रकम संकलन गरी रहेको सशस्त्र प्रहरी निकट श्रोतले जनाएको छ ।

पर्सा

पर्सामा नेपाल प्रहरीका डिआईजीले घुमुवाको रुपमा हवल्दार राजु गुप्तालाई खटाएका छन । बीरगंजबाट तस्कर मदन रून्चे समूहले २० लाख भन्दा बढी र किशोर र पप्पु नाम गरेका तस्करहरुले मासिक १२ लाख रुपैया भिष्वा र जानकी टोलाबाट तस्करी लाईन पाएबापत बुझाउने गरेका छन् ।

त्यसैगरी हरिन्द्र पटेल, मुन्ना मियाँ लगायतले पनि तस्करी लाईन डिआईजीलाई मिलाएर संचालन गरी रहेको श्रोतले जनाएको छ ।

बारा 

बारामा डिआईजीको घुमुवाको रुपमा संजय जयसवाल र सुनिल ठाकुर खटाईएका छन । बारा जिल्लाबाट नेपाल प्रहरी तथा सशस्त्र प्रहरीलाई पैसा खुवाएर भैसी तस्कर सन्तोष गुप्ता, सुरेन्द्र जयसवाल, खसी बोका तस्कर नुनु नाम गरेका व्यक्तिलाई लाइन खुलाएका छन् ।

त्यसैगरी बाराकै मटिअर्वा सिम्रौनगढ क्षेत्रबाट सरोज श्रीवास्तव, खेना, लालबाबु अखोटले तस्करी लाईन संचालन गरेका छन भने सोही क्षेत्रबाट अरविन्द यादव कपडा र हुण्डी कारोवार, बाराको कचोर्वाबाट रन्जित यादव, प्रभु यादव, चन्देश्वर यादव, दिपक यादवसहित कपडाको ठूलो तस्करी गर्ने रेखा देवी र हरेन्द्र साहलाई समेत नेपाल प्रहरी र सशस्त्र प्रहरीले तस्करीको लाईन दिएर करोडौको राजस्व हिनामिना गर्दै आएको श्रोतले जनाएको छ ।

राैतहट

त्यसैगरी रौतहटमा जिल्लाको सम्पूर्ण नाका प्रयोग गरी शम्भु साह, मनोज साह, कौशल साह, सुरेश यादव, ब्रह्मदेव यादव, वीरेन्द्र सिंहलाई तस्करीको लाईन छ । गौरको मुख्य नाकाबाट कपडा भित्र्याउन लाइन दिइएको छ ।

रौतहटका मोतिम अन्सारीलाई कुखुराको चल्ला, कटहरिया नगरपालिकाको उपप्रमुखका श्रीमान नसरुद्दिन मियाँलाई पनि स्पेशल ‘लाइन’ उपलब्ध गराइएको छ । उनी सिजन अनुसार सबथोकको कारोबारमा संलग्न छन् । यसका लागि नेपाल प्रहरीले रौतहटमा डिआईजीको घुमुवाको रुपमा असई राजमंगल सिंह, श्याम साह सोनारलाई खटाएको छ ।

सर्लाही

यसैगरी सर्लाही जिल्लाको संग्रामपुर, मधुवन भन्सार, गोरखकाली, परसा, बारा उदोरणलगायत सम्पूर्ण नाका तस्करहरूलाई उपलब्ध गराइएको छ । सर्लाही जिल्लाबाट प्रकाश यादव, विजय साह, पुकार यादव, परमहंस साह, हीरालाल साह, श्याम साह, अन्तोष साह, रामेश्वर यादव, गुलाम, चन्देश्वर चौधरी, दिनेश महतो, मुन्सीलाई भारतबाट कपडा नेपाल भित्र्याउन लाइन दिइएको छ ।

विनोद साहलाई कुखुराको चल्ला, उमेश पटेललाई केराउ र मरीचको लाइन दिइएको छ । सर्लाहीमा नेपाल प्रहरीका डिआईजीले पैसा उठाउनका लागि असई लालजी यादव, हवलदार विनोद राम, प्रहरी जवान कृष्ण यादव र मन्जित यादवलाई घुमुवाको रुपमा खटाएको श्रोतले जनाएको छ ।

महाेतरी

यसैगरी महोत्तरी जिल्लाको धिरापुर, भिट्ठामोड, सम्सी, मटिहानी, रामगोपालपुर, खैरमणी, इटहर्वा, पोखरभिण्डा, रघुनाथपुर लगायतका नाकाहरू खोलिएको छ ।

यस जिल्लाबाट राजा, कालिया, सिकेन्द्र यादव, मेथुर मण्डल र लक्ष्मी चौधरी, बाला दास तत्मा, सन्दीप यादव, रामकेवल मण्डल, विवेक मण्डल, राजेश यादव, रामविनय यादव, तुफान, रामछबिला यादव, मोती अन्सारी, मोदसिर, विनोद यादव, सरीफुल, बिन्देश्वर नायक लगायतका गिरोहलाई लागुऔषध, गाँजा, कपडा, केराउ, मरीच, छोकडा, खसी, गाईको लाइन उपलब्ध गराइएको छ ।

महोत्तरीमा डिआईजी उमेश रंजितकारले हवलदार बैजु यादव र जवान धर्मेन्द्र यादवलाई खटाएको श्रोतले जनाएको छ ।

धनुषा

यसैगरी धनुषा जिल्लाको विभिन्न नाकाहरु मध्ये जटही, जयनगर, हर्ने हरलाठी, फुलगान्वा, धनौली, ठान्डी, खजुरी, इनर्वा, दुभी, बहुअर्वा, मुखिया पट्टी नाकाबाट मोहन जालान, राजीव महासेठ, धर्मेन्द्र यादव, लेंगडा भन्ने राजु, चाची, सुरेश साह, उमेश साह, जय कुमार, कलाम लगायत गिरोहलाई कपडा, रजनीगंधा, रक्सी, मोटर पार्ट्स, मरीच, केराउको लाइन दिइएको छ ।

यसका लागि धनुषामा डिआईजी रंजितकारले घुमुवाको रुपमा सई नागेन्द्र यादव, हवलदार मनोज महतो, मोतिलाल पटेल, महेन्द्र महतो र जवान उमेश रामलाई खटाएको श्रोतले जनाएको छ ।

सिराहा

सिराहा जिल्लाका तस्कर मुसहर यादव, आजाद यादव, धीरज यादव, मोहन यादव, उपेन्द्र, नन्दालाई कपडा लत्ता, सन्तोषलाई किराना र कलामलाई गाईको लाइन वितरण गरिएको छ । माडर, ठान्डी, बियापट्टी, सखीपुर, झाझपट्टी गरु सिराहा जिल्लाका प्रमुख चारवटै नाका तस्करहरूलाई जिम्मा लगाइएको छ ।

सिराहामा नेपाल प्रहरीका डिआईजीको घुमुवाको रुपमा हवलदार सन्तोष झा, प्रमोद यादव, प्रहरी जवान दिनेश यादव र सरोज यादव खटिएका छन ।

सप्तरी

यसैगरी सप्तरी जिल्लाको नेपाल प्रहरी तथा सशस्त्र प्रहरीको संरक्षणमा सखडा, तिलाठी, बेलाही, हनुमाननगर, झुटकी, कोदरट्टी, सरठी, पातो लगायतका नाकाहरू ओमप्रकाश यादव, जाकिर मियाँ, हरिसुदन यादव, ओमप्रकाश यादव, धुरन साह, मुकेश सिंह, बुटुल सिंह, शम्भु, भुनेश्वर, मनोज, मनिर मिया, सद्दामको गिरोहलाई गाई, गोरु, कपडा, केराउ, मरीच, छोकडा, सुपारी, रक्सीको लाइन दिइएको छ ।

तस्करीको लाईन दिएवापत पैसा उठाउन नेपाल प्रहरीले असई उदय सिंहको कमाण्डमा प्रहरी जवान सत्यनारायण ठाकुर र अनिल यादवलाई खटाएको छ ।

मधेश प्रदेशका पर्सा, बारा, रौतहटसहित आठवटै जिल्लाबाट दैनिक करोडौको तस्करी हुँदा देशको राजश्व मात्र नभई अर्थतन्त्र नै चौपट हुने शंकेत देखिएकाे छ । राज्यकोषको ढुकुटीबाट तलब खानेहरुले चोरी तस्करीलाई नियन्त्रण गर्नु पर्नेमा उल्टै अनियमित ढंगले काम गरेपछि मधेश प्रदेशको अवस्था नाजुक बन्दै गएको छ ।

पोखरियामा जेन्टस, लेडिज पार्लरको उद्घाटन

0
वीरगंज । पर्साकाे दाेस्राे सदरमुकामकाे रुपमा रहेकाे पाेखरियामा सैलुन एण्ड जेन्टस, लेडिज पार्लर पसल खुलेकाे छ । संचालनमा आएकाे टाेनी एण्ड ग्युज पार्लर नामककाे पसलको साेमबार एक कार्यक्रमकाे बिच उद्घाटन गरिएकाे थियाे ।
 
पाेखरिया बजारमा विशाल हनुमान मन्दिर नजिक पश्चिम पटी पर्ने एक घरमा खुलेकाे पसलकाे नेवि संघ पोखरियाका नगर सभापति संतोष महतोले उद्घाटन गरेका थिए । पसलकाे उद्घाटन गर्दै सभापति महताेले आफ्नै गाउँ ठाउँमा सिपकाे प्रयाेग गर्ने कार्य सराहनिय भएकाे वताए ।
 
सैलुन एण्ड जेन्ट्स, लेडिज पार्लर पसलको राजकिशोर ठाकुरको अध्यक्षतामा भएको उद्घाटन कार्यक्रममा स्थानीय भद्रभलादमी, बुद्धिजीवी, विधार्थी लगायतका युवाहरुको सहभागिता रहेकाे थियाे ।

राजधानी माग्दै वीरगंजमा ८ औं दिन पनि प्रदर्शन

0
वीरगंज । मधेश प्रदेशकाे स्थायी राजधानी जनकपुरधाम ताेकिएपछि पर्सामा सुरु भएकाे आन्दाेलन आठाैं दिन पनि जारी रह्याे । वीरगंजलाई प्रदेशकाे राजधानी बनाउनु पर्ने माग राख्दै आन्दाेलन गर्दै आएकाे संयुक्त युवा विद्यार्थी संगठनले आठाैं दिन साेमबार हेलमेट जुलुश प्रदर्शन गरेकाे थियाे ।
 
जिल्ला समन्वय समिति पर्साबाट निस्केकाे हेलेमेट जुलुश पावर हाउस चाैकमा पुगेर काेण सभामा परिणत भएकाे थियाे । हेलमेटसहित जुलुशमा सहभागिहरुले गद्दार मुख्यमंत्री मुर्दाबाद, जनकपुरलाई राजधानी मानदैनाैं, वीरगंजलाई राजधानी कायम गर, गदार बिधायक मुर्दाबाद लागायतको चक्राे नारा लगाएका थिए ।
 
काेराेना भाइरस संक्रमणकाे जाेखिमलाई मध्यनजर गर्दै सरकारी नियम अनुसार २५ जना जतिकाे सहभागितामा आन्दाेलन जारी राखिएकाे आन्दाेलनकारी सुजित गिरीले वताए । काेराेनाकाे जाेखिम हटे संगै हजाराैंकाे संख्यामा गाउँ गाउँमा जारी आन्दाेलनमा सहभागिता गराइनले उनले वताए ।
 
काेण सभामा वाेल्दै गिरीले वीरगंजकाे मतबाट जितेका मुख्यमन्त्री लालबाबु राउतले वीरगंजसंग गद्दारी गरेकाे भन्दै आक्राेश पाेखेका थिए । 

लागु औषधसहित एक जना पक्राउ

0

वीरगंज । लागु औषधसहित एक जनालाई प्रहरीले पक्राउ गरेकाे छ । बाराकाे कलैया उपमहानगरपालिका वडा नं.१३ बलिरामपुर बस्ने वर्ष ३७ को निरज कुमार मेहतालाई प्रहरीले पक्राउ गरेकाे हाे ।

विशेष सूचनाको आधारमा जिल्ला प्रहरी कार्यालय पर्साबाट खटिएको टोलीले  साेमबार दिउसाे २ बजे वीरगंज महानगरपालिकाकाे वडा नं.२५ सिर्सियास्थितबाट मेहतालाई पक्राउ गरेकाे हाे ।

शंकाष्पदरूपमा पैदल हिंडिरहेका मेहताले बोकेको झोला चेकजाँच गर्दा कालो प्लाष्टिकमा लुकाइछिपाई ल्याएको लागु औषध नुफ्रिन ८० एम्पुल, डाइजीपाम ८० एम्पुल र फेनारगण ८० एम्पुल गरी जम्मा २४० एम्पुल फेला परेको जिल्ला प्रहरी कार्यालय पर्साले जनाएकाे छ ।

उल्लेखित लागु औषध बरामद गरी निजलाई नियन्त्रणमा लिई लागु औषध सम्बन्धी कसूरमा अनुसन्धान अगाडि बढाइएको जिल्ला प्रहरी कार्यालय पर्साका प्रवक्ता प्रहरी नायब उपरिक्षक ओमप्रकाश खनालले जानकारी दिए ।

बालक हत्याकाे आराेपमा जगरनाथपुरका ५ जना पक्राउ

0

वीरगंज । बालक हत्याकाे आराेपमा प्रहरीले ५ जनालाई पक्राउ गरेकाे छ । पर्साकाे जगरनाथपुर गाउँपालिका वडा नं. ६ का ६४ बर्षिय गाेवारी राउत अहिर, ५५ बर्षिय नग राउत अहिर, ३२ बर्षिय शत्रुधन प्रसाद यादव, ३० बर्षिय मनमाेहन प्रसाद यादव र २५ बर्षिय राेहन प्रसाद यादवलाई प्रहरीले पक्राउ गरेकाे हाे ।

जगरनाथपुर गाउँपालिकाकाे वडा नं.६ निवासी नागेसर प्रसाद कुर्मीको १२ वर्षिय छाेरा मन्टु प्रसाद कुर्मीको घाँटी थिची कर्तव्य गरी मारी फालेको पांचै जनालाई पक्राउ गरिएकाे प्रहरीले जनाएकाे छ । पक्राउ परेका पांचै जना एकै परिवारका हुन् ।

ईलाका प्रहरी कार्यालय पोखरियाबाट खटिएको टोलीले पर्साकाे छिपहरमाई गाउँपालिका वडा नं.६ भिष्वास्थित नेपाल भारत सीमाबाट माघ ८ गते पांचै जनालाई पक्राउ गरेकाे जिल्ला प्रहरी कार्यालय पर्साले जनाएकाे छ । 

पुस २३ गते दिउँसो ४ बजेको समयमा जगरनाथपुर गाउँपालिकाकाे वडा नं.६ स्थित ऊखु खेतमा घाँटी थिची कर्तव्य गरी मारी फालेको अवस्थामा मन्टुकाे शव फेला परेकाे थियाे । घटनाको अनुसन्धानको सिलसिलामा पीडितबाट प्राप्त किटानी जाहेरी दरखास्त तथा सो सम्बन्धमा हालसम्म खुल्न आएका तथ्यहरूको आधारमा पांचै जनालाई पक्राउ गरिएकाे जिल्ला प्रहरी कार्यालय पर्साका प्रवक्ता एवम् प्रहरी नायब उपरिक्षक ओमप्रकाश खनालले जानकारी दिए ।

पक्राउ परेका सबै जना विरुद्ध अपहरण तथा कर्तव्य ज्यान पर्सा जिल्ला अदालतबाट ७ दिन म्याद लिई अनुसन्धान भइरहेको प्रवक्ता खनालले जानकारी गराए ।

निरहूआसँग भाेजपुरी फिल्म खेल्दै शिल्पा

0

अभिनेत्री शिल्पा पोखरेलको रोमान्स भोजपुरी सुपरस्टार दिनेश लाल यादव निरहुआसँग रहने भएको छ । उनी दुई भाेजपुरी फिल्म ‘निरहुआ चलल लन्दन २’ र ‘हनुमान की गली’ मा निरहुआको अपोजित भूमिकामा देखिन लागेकी हुन् ।

सोनु खत्रीको निर्देशन रहने यी दुबै फिल्ममा शिल्पा हालै अनुबन्धित भएकी हुन् । फिल्ममा अभिनेत्री अम्रपाली दुबेको समेत अभिनय रहनेछ । फिल्म निर्माण घोषणा हालै भएको थियो । कार्यक्रममा  शिल्पाले भोजपुरीमा फिल्म रहरले भन्दा पनि आफ्नो स्थान बनाउन अभिनय गर्न लागेको बताएकी थिइन् ।

यस अगाडि शिल्पाले ‘जय शम्भु’ र ‘प्रेमगीत २’ नाम भोजपुरी फिल्म अभिनय गरेकी छन् । ‘लज्जा’ बाट नेपाली फिल्म अभिनय डेब्यु गरेकी शिल्पाले ‘मंगलम, वीरांगना, हवल्दार सुन्तली, बृन्दावन’ थुप्रै नेपाली फिल्म अभिनय गरेकी छन् । पछिल्लो समय उनी निर्माता पति छविराज ओझासँगको घरायसी झगडाको कारण चर्चामा छाएकी थिइन् ।

भोजपुरी फिल्म अभिनय गर्ने शिल्पा पहिलो नेपाली कलाकार भने होइन । अभिनेता विराज भट्ट, नीता ढुंगाना लगायतले समेत भोजपुरी फिल्म अभिनय गरिसकेका छन् । 

राजधानी माग्दै वीरगंजमा साताैं दिन पनि प्रदर्शन

0

वीरगंज । मधेश प्रदेशको स्थायी राजधानीको रुपमा जनकपुर कायम भएपछि पर्सामा सुरु भएकाे आन्दाेलन साताैं दिन पनि जारी रह्याे । वीरगंजलाई प्रदेशकाे राजधानी बनाउनु पर्ने माग गर्दै आन्दाेलन गर्दै आएका संयुक्त युवा विद्यार्थी संगठन साताैं दिन आइतबार माेटरसाइकल जुलुश निकालेकाे थियाे । 

वीरगंजकाे घण्टाघर चाैकदेखी निस्केकाे मोटरसाइकल र्‍याली नगर परिक्रमा गर्दै मुर्ली चौकमा पुगेर कोणसभामा परिणत भएको थियाे । विराेध र्‍यालीमा सहभागिहरुले जनकपुर राजधानी खारेज गर, वीरगंज राजधानी कायम गर, मुख्यमन्त्री मुर्दावाद, गद्दार विद्यायक मुर्दावाद लगायतका चर्काे नाराबाजी समेत गरेका थिए ।

कोण सभामा बोल्दै विद्यार्थी नेताहरुले बीरगंजलाई बेवास्ता गरिएकोमा चर्को आक्रोश पोखे । बीरगंजलाई राजधानी कायम गराउन निरन्तर विरोधका कार्यक्रमहरु गरिरहने उनीहरुकाे भनाई थियाे ।

सयुंक्त युवा विद्यार्थी संगठनद्वारा लोसपाका युवा नेता राजु गुप्ताको अध्यक्षतामा भएकाे विरोध प्रदर्शनमा नेवि संघका सुधिर पटेल, लाेसपाका सुजित गीरी, महादेव कुर्मी, अली हसन, अमित यादव, सगीर अली लगायतको सहभागिता रहेको थियो ।

आफ्नै गाउँकाे मन्दिर उद्घाटनमा नेता साेनलकाे विराेध

0

वीरगंज । मन्दिर उद्घाटन गर्न पुगेका पूर्वमन्त्री जितेन्द्र सोनल आफ्नै गाउँबासीबाट लखेटिएका छन् । बाराको परवानीपुर गाउँपालिका वडा नं. ३ लिपनीमालमा निर्माण सम्पन्न भएको ब्रह्मबाबाको मन्दिर उद्घाटन गर्न शनिवार मन्त्री सोनल दलबलका साथ लिपनीमाल पुगेका थिए । तर स्थानीयहरुले पूर्वमन्त्री सोनलसँग मन्दिरको उद्घाटन गराउन नमानेपछि विवाद सृजना भएको थियो ।

स्थानीहरुका अनुसार राय सल्लाह बिना पूर्वमन्त्री सोनलले मन्दिरको शिलालेखमा आफ्नो नाम लेखाउनका लागि मन्दिर उद्घाटन गर्न खोजेको भन्दै विरोध जनाएका थिए । स्थानीयहरुले नेता सोनलले मन्दिरमा समेत राजनीति गर्न खोजेको आरोप लगाएका छन् ।

प्रदेश सरकार भौतिक पूर्वाधार विकास मन्त्रालयको ८ लाख एवं स्थानीय सरकारको ५ गरी कुल १३ लाख रुपंैयाको लागतमा निर्माण भएको मन्दिरको शिलान्यसको क्रममा पनि विवाद भएको थियो ।

मन्दिर उद्घाटनको क्रममा कैचीबाट रिबन काट्न खोज्दा हो–हल्ला गर्दै स्थानीयहरु नेता सोनल माथि खनिएका थिए । सो क्रममा विवादले उग्ररुप लिएपछि मन्दिर उद्घाटन गर्न नपाउदैं पूर्वमन्त्री सोनल प्रहरी सुरक्षाको घेरामा भागेका थिए । उनको सुरक्षामा खटिएका प्रहरीलाई भिडलाई नियन्त्रण गर्न हम्मेहम्मे परेको थियो । सो क्रममा स्थानिय तथा पूर्वमन्त्री सोनलका पक्षधरहरु बिच धक्कामुक्की समेत भएको थियो ।

दोहरो विवादको क्रममा मन्त्री सोनल सहितका केही स्थानियहरुलाई समेत सामान्य चोटपटक लागेको स्थानिय युवा नेता राजेश यादवले बताए ।

जिल्ला प्रहरी कार्यालय बाराका प्रहरी नायब उपरीक्षक राजेश थापाका अनुसार परवानीपुरमा मन्दिर उद्घाटनको क्रममा समान्य विवाद भएको भए पनि स्थानियहरुकै रोहवरमा विवाद सामान्य भएको थियो । यता, गाउँबासीको विरोधका कारण मन्दिरको उद्घाटन नगरी नेता सोनल भागेको स्थानीय युवा यादवको भनाई छ ।