वीरगंज । तेरापन्थ युवक परिषद्, वीरगंज आकस्मिक रूपमा रगत आवश्यक परेका एक बिरामीका लागि चार युनिट ए–पोजिटिभ (A+) रगत उपलब्ध गराउँदै मानवीय सेवाको उत्कृष्ट उदाहरण प्रस्तुत गरेको छ ।
परिषद्का अनुसार वीरगंज न्युरो एण्ड जनरल हस्पिटल रिसर्च सेन्टरमा ब्रेन हेमरेजको उपचार गराइरहेका सत्यनारायण प्रसादका लागि तत्काल चार युनिट A+ रगत आवश्यक परेको जानकारी प्राप्त भएको थियो ।
सूचना प्राप्त हुनासाथ परिषद्को ‘ब्लड अन कल’ अभियानका संयोजक आशीष चौरडियाले रक्तदाताहरूसँग समन्वय गरी आवश्यक रगतको व्यवस्था गरेका थिए ।
यस अभियानअन्तर्गत घनश्याम शर्मा, सतीश कुमार सहनी, अखिलेश कुमार शाह तथा तेरापन्थ युवक परिषद्का निवर्तमान अध्यक्ष लोकेश जम्मडले तत्काल ब्लड बैंक पुगेर रक्तदान गरेका थिए । उनीहरूको रक्तदानबाट बिरामीलाई आवश्यक चार युनिट रगत उपलब्ध गराइएको परिषद्ले जनाएको छ ।
तेरापन्थ युवक परिषद्ले रक्तदाताहरूको सेवाभावप्रति आभार व्यक्त गर्दै समयमै गरिएको रक्तदानले बिरामीको जीवन बचाउन महत्वपूर्ण भूमिका खेलेको उल्लेख गरेको छ । साथै, आपत्कालीन अवस्थामा रक्तदान गर्न इच्छुक सबैलाई ‘ब्लड अन कल’ अभियानमा सहभागी भई मानव सेवामा योगदान दिन परिषद्ले आग्रह गरेको छ ।
