सेढवा । पर्सा जिल्लाको जिराभवानी गाउँपालिका–३, जितपुर गाउँमा पछिल्ला दिनहरूमा चोरीका घटना बढ्दै गएपछि स्थानीयवासी त्रसित बनेका छन् । मोटरसाइकल, कृषि विद्युतीय मिटर र घरपालुवा कुकुरसमेत चोरी हुन थालेपछि गाउँमा सुरक्षा व्यवस्थाप्रति चिन्ता बढेको हो ।
स्थानीय प्रमोद महतो थारुको घरबाट कृष्णमोहन चौधरी थारुको नाममा दर्ता रहेको ना २ प ५५०४ नम्बरको रातो रङ्गको हिरो होन्डा स्प्लेन्डर मोटरसाइकल असार ३० गते राति अज्ञात समूहले चोरी गरेको प्रहरीले जनाएको छ । सोही राति घरमा पालिएको सेतो रङ्गको कुकुर पनि हराएको र चोरी भएको आशंका गरिएको छ ।
इलाका प्रहरी कार्यालय सेढवाका प्रहरी निरीक्षक अरुणकुमार साहका अनुसार मोटरसाइकल र कुकुर चोरी भएको सम्बन्धमा उजुरी प्राप्त भएको छ । घटनाको अनुसन्धान भइरहेको र संलग्न व्यक्तिको खोजी कार्य तीव्र पारिएको उनले बताए ।
यसअघि चार दिनअघि पनि सोही गाउँका शेखर चौधरीको खेतमा सिँचाइका लागि जडान गरिएको कृषि विद्युतीय मिटर चोरी भएको थियो । चौधरीले धानबाली सिँचाइका लागि प्रयोग भइरहेको मिटर अज्ञात व्यक्तिले चोरी गरेको भन्दै इलाका प्रहरी कार्यालय सेढवामा उजुरी दर्ता गराएका छन् ।
लगातार चोरीका घटना दोहोरिन थालेपछि स्थानीयवासीले गाउँमा रातिको सुरक्षा व्यवस्था थप प्रभावकारी बनाउन, नियमित गस्ती बढाउन तथा चोरीमा संलग्न व्यक्तिहरूलाई शीघ्र पक्राउ गरी कानुनी कारबाही गर्न प्रहरी प्रशासनसँग माग गरेका छन् ।
प्रहरीले पछिल्ला चोरीका घटनालाई गम्भीरतापूर्वक लिँदै अनुसन्धानलाई तीव्र बनाइएको जनाएको छ ।
